ވަޒީރު އިޙްސާންގެ އިތުބާރު ނެތްކަމުގެ މައްސަލަ ފެއިލްކޮށްލާނަން: ޕީއެންސީ ޕީޖީ
-
މިމައްސަލަ ހުށަހެޅި އިދިކޮޅު އެމްޑީޕީގެ 12 މެންބަރުން ސޮޔާއެކު
-
ޕީއެންސީ ޕީޖީގެ އިތުބާރު ވަޒީރު އިޙްސާނަށް އޮތް ކަމަށް ޕީޖީ ގްރޫޕުން ވިދާޅުވޭ
ރައްޔިތުންގެ މަޖިލީހަށް ހުށަހަޅާފައިވާ ދާޚިލީ ސަލަމަތާއި ފަންނީއްޔާތާ ބެހޭ ވަޒީރު ޢަލީ އިޙްސާންގެ އިތުބާރު ނެތްކަމުގެ މައްސަލަ ފެއިލްކޮށްލާނެ ކަމަށް ޕީޕަލްސް ނެޝެނަލް ކޮންގްރެސް، ޕީއެންސީގެ ޕީޖީ ގްރޫޕުން ވިދާޅުވެއްޖެއެވެ. މިމައްސަލަ މަޖިލީހަށް ވައްދާފައިވަނީ އިދިކޮޅު އެމްޑީޕީންނެވެ.
ދާޚިލީ ސަލާމަތާއި ފަންނީއްޔާތާ ބެހޭ ވަޒީރު ޢަލީ އިޙްސާންގެ އިތުބާރުނެތްކަމުގެ މައްސަލައެއް އިދިކޮޅު އެމްޑީޕީން މަޖިލީހަށް ވެއްދީ ވަޒީރު ޤާނޫނާއި ޚިލާފަށް މަސައްކަތް ކުރަމުންދާ ކަމަށް ތުހުމަތު ކޮށެވެ. މި މައްސަލަ ރައްޔިތުންގެ މަޖިލީހަށް ހުށަހެޅީ އެ ޕާޓީގެ ޕާލަމެންޓަރީ ގްރޫޕުގެ 12 މެންބަރުންގެ ސޮޔާއެކުގައެވެ.
މިމައްސަލައާއި ގުޅިގެން ރައްޔިތުންގެ މަޖިލީހުގެ މެޖޯރިޓީ އޮންނަ ޕީއެންސީގެ ޑެޕިއުޓީ ޕީޖީ ލީޑަރ ވިލިމާލެ ދައިރާގެ މެންބަރު، މުޙައްމަދު އިސްމާޢިލް ވިދާޅުވީ، ދާޚިލީ ވަޒީރުގެ މައްޗަށް ޕީއެންސީގެ ޕީޖީގެ ފުރިހަމަ އިތުބާރު އެބައޮތް ކަމަށެވެ. ރައީސުލްޖުމްހޫރިއްޔާގެ އިތުބާރު ވަޒީރުގެ މައްޗަށް އޮތްހާހިނދަކު މި މައްސަލަ ކުރިއަށް ގެންދަން އެޕާޓީގެ ޕީޖީ ގްރޫޕުން ފުރުޞަތު ނުދެއްވާނެ ކަމަށް އޭނާ ވިދާޅުވިއެވެ. ޕީއެންސީގެ ޕީޖީން ވަނީ މި މައްސަލަ ފެއިލްކޮށްލާނެކަމަށް ވިދާޅުވެފައެވެ.
ވަޒީރު އިޙްސާން މައްޗަށް އިތުބާރުނެތްކަމުގެ ވޯޓެއް ނެގުމަށް އިދިކޮޅުން މަސައްކަތް ކުރަމުންދާއިރު، ދާޚިލީ ވުޒާރާއަކީ ސަރުކާރުގެ ތަންފީޒީ އިދާރާތަކުގެ ބެލެނިވެރި ފަރާތެވެ. ރައީސުލްޖުމްހޫރިއްޔާގެ އިރުޝާދުފުޅާއެކު ވަޒީރު އިޙްސާން އިސްކޮށް ހުންނަވާ ދަނީ ގިނަ މަސައްކަތްތަކެއް ކުރައްވަމުންނެވެ.
އެގޮތުން އިމިގްރޭޝަން މެދުވެރިކޮށް ބިދޭސީންގެ މައްސަލަ ހައްލުކުރުމަކީ ސަރުކާރުގެ އެއް އަމާޒުކަމަށްވާއިރު، މިމަސައްކަތަކީ ސަރުކާރުން ކަމިޔާބުކަމާއެކު ކުރަމުންދާ މަސައްކަތެއް ގޮތުގައި ގިނަ ބަޔަކު ޤަބޫލުކުރެއެވެ. ޤަވާއިދާއި ޚިލާފަށް ބިދޭސީން ކުރަމުންދާ ވިޔަފާރިތައް ހުއްޓުވައި، ޤަވާއިދާއި ޚިލާފަށް ރާއްޖޭގައި އުޅުމުންދާ ބިދޭސީން އަނބުރާ ޤައުމަށް ފޮނުވާލުމުގެ މަސައްކަތް ވަޒީރު އިޙްސާންގެ ބެއްލެވުމުގެ ދަށުން އިމިގްރޭޝަނުން އަންނަނީ ކުރަމުންނެވެ.
މީގެ އިތުރުން ފުލުހުންގެ އެންމެ އިސްވެރިއެއްގެ ހައިސިއްޔަތުން ރާއްޖެ އެތެރެވާ މަސްތުވާތަކެއް ހުއްޓުވުމަށާއި، ގޭންގު ކުށްތައް ހުއްޓުވުމަށް ގިނަ މަސައްކަތްތަކެއް ދަނީ ކުރަމުންނެވެ. މިގޮތުން ޤާނޫނަށް ގެންނަން ޖެހޭ ބަދަލު ގެނެސް ޤާނޫނުތައް ތަންފީޒުކުރެއްވުމުގެ މަސައްކަތް ދާޚިލީ ވުޒާރާއިން ދަނީ ކުރަމުންނެވެ.
ދާޚިލީ ސަލަމަތާއި ފަންނީއްޔާތާ ބެހޭ ވަޒީރު ޢަލީ އިޙްސާން މައްސަލަ މަޖިލީހަށް ވެއްދި ނަމަވެސް އިތުބާރު ނެތްކަމުގެ ވޯޓަކުން ވަޒީރަކު މަޤާމުން ވަކިކުރަން ބޭނުންވާ މިންވަރަށް އެމްޑީޕީގެ މެމްބަރުން މަޖިލީހުގައި ނެތެވެ.