ބަޑީގެ ޙަމަލާއެއްގަައި އީރާނުގެ ސުޕްރީމް ކޯޓުގެ އިސް ދެ ފަނޑިޔާރުން އަވަހާރަ ކޮށްލައިފިއެވެ.
އީރާނުގެ ވެރިރަށް ތަހްރާނުގައި ހުންނަ ސުޕްރީމް ކޯޓުގެ ތެރޭގައި ދިން މި ޙަމަލާގައި އަވަހާރަ ކޮށްލާފައިވަނީ ފަނޑިޔާރު މުޙައްމަދު މުޣީސާ އާއި އަލީ ރާޒިނީއެވެ. ދެ ބޭފުޅުންނަކީ ވެސް ޤަައުމީ ސަލާމަތާ ބެހޭ މައްސަލަތަކާއި ޖާސޫސްކުރުމާއި ނިރުބަވެރިކަމާ ގުޅޭ މައްސަލަތައް ބައްލަވާ ދެ ފަނޑިޔާރުންނެވެ. އެ ޙާމަލާގައި ފަނޑިޔާރުންގެ ހަށިފާރަވެރިއަކު ވެސް ޒަޚަމް ވެފައިވެއެވެ.
ދެ ފަނޑިޔާރުން އަވަހާރަ ކޮށްލާފައި ވަނީ ކޮން ބޭނުމެއްގައި ކަމެއް މިހާތަނަށް ސާފު ވެފައެއް ނުވެއެވެ. ނަމަވެސް އީރާނުގެ ޝަރުޢީ ދާރިއާގެ ތަރުޖަމާނު އަސްޣަރު ޖަހަންގީރު ވިދާޅުވީ ފާއިތުވި އަހަރުގެ ތެރޭގައި އީރާނުގެ ޝަރުޢީ ދާއިރާއިން އެ ޤައުމުގައި ޙަރަކާތްތެރިވާ ޖާސޫސުންނާއި ނިރުބަވެރި ޖަމާޢަތްތައް ފާހަގަ ކުރުމަށް ގިނަ މަސައްކަތްތަކެއް ކޮށްފައިވާ ކަމަށެވެ. އޭގެ ސަބަބުން ނިރުބަވެރި ޖަމާޢަތްތަކާއި ދުޝްމަނުންގެ ހިތުގައި ރުޅިވެރިކަމާއި ބަދަލު ހިފުމުގެ ރޫހު އާލާ ވެފައިވާ ކަމަށް އޭނާ ވިދާޅުވިއެވެ.
އީރާނުގެ ރަސްމީ ޓީވީން ބުނީ ފަނޑިޔާރުން ބައްލަވަމުން ދިޔައީ ޔަހޫދީ ދައުލަތާއި އީރާނުގެ އިދިކޮޅު ޕާޓީއާ ގުޅުން ހުރި އެމެރިކާއިން ވާގިވެރިވާ ބައެއްގެ މައްސަަލަ ކަމަށެވެ. ނަމަވެސް އޭގެ ތަފްޞީލެއް ދީފައެއް ނުވެއެވެ. ސަރުކާރާ ދެކޮޅު ބައެއް ވެބްސައިޓުތަކުގައި ފަނޑިޔާރު މުޣީސާއަކީ ސިޔާސީ ހައްޔަރީންގެ މައްސަލަތައް ބައްލަވާ ފަނޑިޔާރެއް ކަމަށް އެކި ފަހަރު މަތިން ލިޔެފައި ވެއެވެ.
މީގެ އަހަރުތަކެއް ކުރިން 1998ވަނަ އަހަރު ވެސް ފަނޑިޔާރު ރާޒިނީ އަވަހާރަ ކޮށްލަން ޙަމަލާއެއް ދީފައި ވެއެވެ.