ބޯން މެރޯ ހެދުމަށްފަހު 6 ކުއްޖަކު ރާއްޖެއައިސްފި، ލިސްޓުގައި 22 ކުދިން އެބަތިބި

ތެލެސީމިއާ ކުދިންގެ ތެރެއިން މިދިޔަ އަހަރު ބޯން މެރޯ ހެދުމަށް ފޮނުވި 6 ކުއްޖަކު ބޯން މެރޯ ހެދުމަށްފަހު ރާއްޖެއައިސްފިއެވެ.

ބޯންމެރޯ ހަދަނީ ކޮންމެ އަހަރަކު ވަކި ޢަދަދަކަށް ރާއްޖެއިން ބޭރަށް ކުދިން ފޮނުވައިގެންނެވެ. މިދިޔަ އަހަރުގެ އެކި ދުވަސްވަރުގެ މަތިން 14 ކުއްޖަކު ބޯން މެރޯ ހެދުމަށް ރާއްޖެއިން ބޭރަށް ފޮނުވާފައިވެއެވެ. އޭގެތެރެއިން 6 ކުއްޖަކު މިހާރު ބޯން މެރޯ ޓްރާންސްޕްލާންޓް ކާމިޔާބުކަމާއެކު ހެދުމަށްފަހު ރާއްޖެވަނީ އައިސްފައެވެ.

ސިއްޙީ ވުޒާރާއިން ޕީއެސްއެމް ނިއުސްއަށް ހިއްސާކޮށްފައިވާ މަޢުލޫމާތަށް ބަލާއިރު ބޯންމެރޯ ހެދުމަށް މިވަގުތު ރާއްޖެއިން ބޭރުގައި 7 ކުއްޖަކު އެބަތިއްބެއެވެ. ފަރުވާއަށްފަހު 3 ކުއްޖަކު އަންނަ މަހު ރާއްޖެއަށް އަންނާނެކަމަށާއި ބަކީ ތިބި 4 ކުދިންގެ ފަރުވާ ކުރިއަށް ދާކަމަށް ސިއްޙީ ވުޒާރާއިން ވިދާޅުވެއެވެ.

ބޯންމެރޯ ހެދުމަށް މިިދޔަ އަހަރު ފޮނުވި 1 ކުއްޖަކު ވަނީ ނިޔާވެފައެވެ. ބޯންމެރޯއަށްފަހު 3 މަހާއި 6 މަހުގެ މުއްދަތެއް އެ ކުދިން ފަރުވާގައި ރާއްޖެއިން ބޭރުގައި ހޭދަކުރެއެވެ.

ޒަކާތު ފަންޑުގެ އެހީގައި ކޮންމެ އަހަރަކު 10 ކުދިން، ބޯންމެރޯ ހެދުމަށް ފޮނުވުމަށް ސަރުކާރުން ވަނީ ނިންމަވާފައެވެ. މީގެތެރެއިން މިއަހަރު ފޮނުވާ 10 ކުދިން ކަނޑައެޅުމުގެ މަސައްކަތްތައް މިހާރު ދަނީ ކުރަމުންނެވެ. މީގެތެރެއިން ފުރަތަމަ 5 ކުދިން ވަނީ ބޯންމެރޯ ސްޕެޝަލިސްޓް ރިވިއު ކުރުމަށް ފަހު ބޯންމެރޯގެ ކުރިއަށް ވާންޖެހޭ ތައްޔާރީތައް ވާން ފަށާފައެވެ. ސިއްޙީ ވުޒާރާއިން ވިދާޅުވީ ބޯންމެރޯ ހެދުމުގެ ލިސްޓުގައި މިވަގުތު 22 ކުދިން އެބަތިބިކަމަށެވެ.

ރާއްޖެއަކީ އާބާދީގެ ނިސްބަތުން ތެލަސީމިއާ އާބާދީ އެންމެ ބޮޑު އެއް ޤައުމެވެ. ރާއްޖޭގެ ތެލަސީމިއާ ދަފްތަރުގައި 959 މީހުން ރެޖިސްޓަރކޮށްފައިވާއިރު، 666 މީހުން މިވަގުތު ދުނިޔޭގައި އެބަތިއްބެވެ. ރާއްޖޭގެ މުޅި އާބާދީގެ %16.6 މީހުންނަކީ ތެލަސީމިއާ ވާރުތަކުރާގޮތް ހުންނަ މީހުންނެވެ.

ތެލަސީމިއާ މީހުންގެ ދެބައިކުޅަ އެއްބައި އާބާދީ ދިރިއުޅެނީ މާލެ ސަރަޙައްދުގައެވެ.