ސްޕެއިންގެ ލަލީގާގައި ރޭ ގެޓާފޭ އާއި ދެކޮޅަށް ބާސެލޯނާ ކުޅުނު މެޗު 1-1 ގެ ނަތީޖާއަކުން އެއްވަރުވެއްޖެ އެވެ.
މި މެޗުގެ ނަތީޖާ އެއްވަރުވެފައިވާއިރު މިއީ ލަލީގާގައި އެ ޓީމުން އެންމެ ފަހުން ކުޅުނު ހަތަރު މެޗުގެ ތެރެއިން ތިން މެޗުން ވަނީ އެއްވަރުވެފަ އެވެ. މި މެޗުގެ ނަތީޖާ އެއްވަރުވެފައިވާއިރު ލީގުގައި މިހާތަނަށް ކުޅުނު 20 މެޗުން ބާސެލޯނާއަށް ލިބިފައިވަނީ 39 ޕޮއިންޓެވެ. އެއްވަނައިގައި އޮތް އެތްލެޓިކޯ މެޑްރިޑަށް 44 ޕޮއިންޓް ލިބިފައިވާއިރު ދެ ޓީމުގެ ދެމެދުގައި 5 ޕޮއިންޓުގެ ފަރަގެއް އެބައޮތެވެ.
ގެޓާފޭ އާއި ދެކޮޅަށް ރަށުން ބޭރުގައި ބާސެލޯނާ ކުޅުނު މި މެޗުގައި އެ ޓީމުގެ ޑިފެންޑަރ އަލެހަންދްރޯ ބަލްޑޭ އަށް ނަސްލީ ގޮތުން ދިމާކޮށްފައިވާތީ އޭނާ ވަނީ އެކަން ރެފްރީގެ ސަމާލުކަމަށް ގެނެސްފަ އެވެ. އަދި މެޗުގެ ވަކި ހިސާބަކުން އެފަދަ ކަމެއް ތަކުރާރު ނުކުރުމަށް އެދި ސްޓޭޑިއަމްގައި ވަނީ އިއުލާން ކޮށްފަ އެވެ.
މެޗަށްފަހު އޭނާ ބުނެފައިވަނީ މެޗު ކުޅެމުންދިޔައިރު އޭނާއަށް ނިސްބަތްކޮށް ތަކުރާރުކޮށް ނަސްލީގޮތުން ދިމާކޮށްފައިވާ ކަމަށެވެ. އަދި މިއީ އެއްވެސް ހާލަތެއްގައި ބަލައިގަނެވޭނެ ކަމެއް ނޫން ކަމަށާއި އެހެންކަމުން އެކަން ރެފްރީގެ ސަމާލުކަމަށް ގެނައި ކަމަށެވެ.
ބާސެލޯނާގެ ކޯޗު ހެންސީ ފްލިކްވެސް ބުނެފައިވަނީ މިއީ ފުޓްބޯޅައިގެ ތެރޭގައި ފެނިގެންވާނެ ކަމެއް ނޫން ކަމަށާއި މިފަދަ ކަންތައްތަކަކީ ބަލައިގަނެވޭނެ ކަމެއް ނޫން ކަމަށެވެ. އަދި މިފަދަ ކަންތައްތަކާއި ދެކޮޅަށް އެންމެ ގުޅިގެން މަސައްކަތް ކުރުމަށްވެސް އޭނާ ވަނީ ގޮވާލާފަ އެވެ.
މި މެޗުގެ ނުވަވަނަ މިނިޓުގައި ޖޫލްސް ކޯންޑޭ ވަނީ ލަނޑެއް ޖަހާ ބާސެލޯނާއަށް ކުރި ހޯދަދީފަ އެވެ. ނަމަވެސް ފުރަތަމަ ހާފުގެ ކުޅުން ނިމެން 11 މިނިޓަށް ވެފައިވަނިކޮށް ގެޓާފޭ ގެ މައުރޯ އަރަމްބަރީ ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ.
މެޗުގެ ފަހު ވަގުތުގައި މެޗުން މޮޅުވުމަށް ބާސެލޯނާއަށް ރަގަޅު ފުރުސަތެއް ލިބުނު ނަމަވެސް ފްރެންކީ ޑެޖޮންގް ފޮނުވާލި ބާރު ހަމަލާ ގެޓާފޭގެ ކީޕަރު ވަނީ ދިފާއުކޮށްފަ އެވެ.