އޭނާއަށް ލިބުނީ މެންޗެސްޓާ ޔުނައިޓެޑުގެ 147 އަހަރުގެ ތާރީޚުގައިވެސް އޮތް އެންމެ ބަލި ޓީމު ކަމަށް ކޯޗު ރުބެން އަމޮރިމް ބުނެފިއެވެ.
އޭނާ މިހެން ބުނީ އިނގިރޭސި ޕްރެމިއާ ލީގުގައި ރޭ ބްރައިޓަން އަތުން 3-1އިން ބަލިވި މެޗަށް ފަހު އެވެ.
ކޯޗުކަމުން އެރިކް ޓެންހަގް ވަކިކޮށް، ނޮވެމްބަރު މަހު ޓީމާ ހަވާލުވި އަމޮރިމްގެ ކޯޗުކަމުގައި މިހާތަނަށް ކުޅުނު 11 މެޗުން ޔުނައިޓެޑަށް ލިބިފައިވަނީ އެންމެ 11 ޕޮއިންޓެވެ. މި ހުރިހާ މެޗަކުން މޮޅުވިނަމަ ޔުނައިޓެޑަށް 33 ޕޮއިންޓް ލިބެންޖެހޭނެ އެވެ. ނަމަވެސް ޓީމު މި ވަގުތު އޮތީ ޓޭބަލުގެ 13 ވަނާގަ އެވެ.
"މިދިޔަ 10 މެޗުން އަހަރުމެން މޮޅުވީ އެންމެ ދެ މެޗުން. ނިކަން ވިސްނަބަލަ މި ނަތީޖާގެ ސަބަބުން ޔުނައިޓެޑަށް ވާނެ ގޮތް. މި ނަތީޖާގެ ސަބަބުން އަހަރެންނަށް ވާނެގޮތް. އަހަރުމެން (ޔުނައިޓެޑުން) އަލަށް ގެނައި ކޯޗު (އަހަރެން) މިހުރީ ކުރީގެ ކޯޗަށްވުރެ ގިނަ މެޗުން ބަލިވެފައި. އަހަރެންނަށް މިކަމުގެ (ނުތަނަވަސްކަން) ވަރަށް ރަނގަޅަށް އެބެ ވިސްނޭ،" އަމޮރިމް ބުންޏެވެ.
އޭނާ ބުނީ ނޫސްވެރިން އެންމެ ބޭނުންވާ ސުރުހީއަކަށްވާނީ އޭނާގެ އަނގައިން މިހާރު އޮތް ޓީމަކީ ޔުނައިޓެޑް ދުށް އެންމެ ބަލި ޓީމު ކަމުގައި ބުނުން ކަމަށެވެ.
"އެކަމަކު އެހެން ނުބުނެ ވާކަށް ވެސް ނެތް. ނޫސްވެރިން ގޯސް ވާހަކަ ލިޔަން ބޭނުންވާނެ. އެކަމަކު އަހަރުމެން އެބަ ޖެހޭ މި ހަގީގަތް ގަބޫލުކުރަން،" ކޯޗު ބުންޏެވެ.
ޔުނައިޓެޑް އެންމެ ފަހުން ޓޭބަލުގެ 13 ވަނާގައި އޮތީ 87/1986ގެ ސީޒަނުގަ އެވެ. ނަމަވެސް ކޯޗު ބުނީ ކިތަންމެ ނަތީޖާތައް ދަށްވި ނަމަވެސް އޭނާގެ ފޯމޭޝަނާއި ސްޓައިލް ބަދަލު ނުކުރާނެ ކަމަށެވެ.
"އަހަރެންނަށް އެނގޭ މުޅިން ތަފާތު ހިޔާލަކާއި ވިސްނުމެއްގައި ކުޅެން ފެށުމަކީ ފަސޭހަ ކަމެއް ނޫންކަން ސީޒަނުގެ މެދުތެރެއިން އަހަރެން އައިސްގެން. އެކަމަކު ޖެހިޖެހިގެން ތިން މެޗުން ބަލިވުމަކީ ވަރަށް ބޮޑުވަރު. އަހަރުމެން އެއްވެސް ވަރަކަށް ކޮންސިސްޓެންޓެއް ނޫން. އަދި އަމުދުން މިހާ ގޯސް ނަތީޖާތަކަކާއި އަމިއްލަ ދަނޑުގައި ވެސް މިހާ ގިނަ މެޗުތަކަކަކުން ބަލިވުމަކީ އަރައިގަންނަން އުނދަގޫވާނެ ކަމެއް،" ކޯޗު ބުންޏެވެ.
އޭނާ ބުނީ ނަތީޖާ ގޯސްވުމުގައި ވަކި ކުޅުންތެރިއަކު ގޯސްނުކުރާނެ ކަމަށާއި ބަލިވަނީ ޓީމެއްގެ ގޮތުގައި ކަމަށެވެ. އަދި ޔުނައިޓެޑް އޮތީ އަލުން ބިނާކުރަން ޖެހިފައި ކަމަށާއި އެކަމަށް ބޭނުންވާ ކުޅުންތެރިންނާއި ވިސްނުމާއެކު ކުރިއަށްގޮސް ވެސް ވަގުތު ވެސް ނަގާނެ ކަމަށެވެ.
އޭނާ މިހެން ބުނިއިރު ޔުނައިޓެޑަށް ކުޅުންތެރިން ގެނެވެން އޮތީ މިހާރު ތިބި ކުޅުންތެރިންގެ ތެރެއިން ބަޔަކު ވިއްކާލައިގެންނެވެ. އެކަން މިހާތަނަށް ވެފައިވަނީ އުނދަގޫ ކަމަކަށެވެ.