ކަނދުފަތީގެ ޑިޒައިނަށް ބަދަލު ގެނައުމަށް މަޝްވަރާ ބައްދަލުވުމެއް ބާއްވައިފި

ރާއްޖޭގެ މަސްވެރިކަމުގައި މިހާރު ބޭނުންކުރަމުންދާ ކަނދުފަތީގެ ޑިޒައިންއަށް ބަދަލުގެނައުމަށް މި ދާއިރާގައި މަސައްކަތްކުރާ ފަރާތްތަކުގެ ޚިޔާލު ހޯދުމަށް ބައްދަލުވުމެއް ބާއްވައިފިއެވެ. ރާއްޖޭގައި މިވަގުތު ބޭނުންކުރަމުންދާ ކަނދުފަތީގެ ޑިޒައިނަކީ މީގެ 20 އަހަރު ކުރިން ހަދާފައިވާ ޑިޒައިނެކެވެ.

މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް މިދިޔަ އަހަރު އިޓަލީވިލާތައް ކުރެއްވި ދަތުރުފުޅުގެ ތެރެއިން އެފްއޭއޯއާއެކު ވަނީ ރާއްޖޭގައި މިވަގުތު ބޭނުންކުރާ ކަނދުފަތިތަކުގެ ޑިޒައިންއަށް ބަދަލު ގެނައުމަށް އެއްބަސްވުމެއް ޤާއިމްކޮށްފައެވެ.

މި ޕްރޮޖެކްޓްގެ ފެށުން ފާހަގަކުރުމަށް އެ ވުޒާރާއިން ވަނީ ކަމާގުޅުންހުރި ފަރާތްތަކާއެކު މަޝްވަރާ ބައްދަލުވުމެއް ބާއްވާފައެވެ. މި ބައްދަލުވުމުގައި މަޝްވަރާކޮށްފައިވަނީ ކަނދުފަތީގެ ޑިޒައިންއަށް ގެންނާނެ ބަދަލުތަކާ ގުޅޭގޮތުންނެވެ.

ބައްދަލުވުމުގައި ވާހަކަފުޅުދައްކަވަމުން ވަޒީރު ޝިޔާމް ވިދާޅުވީ، މި ޕްރޮގްރާމަކީ ކަނދުފަތި ޤާއިމްކުރުމުގެ މަސައްކަތުގައި މިވީ 40 ވަރަކަށް އަހަރުގެ މުއްދަތުގައި ތެރޭގައި ކަނދުފަތީގެ ޑިޒައިންއަށާއި ކަނދުފަތި ޤާއިމްކުރުމުގެ މަސައްކަތް އިތުރަށް ތަރައްޤީކުރުމަށް ހިންގީ އެންމެ ބޮޑު މަސައްކަތަށް ވެގެންދާނެކަމަށެވެ.

މި ވޯކްޝޮޕްގެ އެންމެ ބޮޑު އަމާޒަކީ މި ވޯކްޝޮޕް މެދުވެރިކޮށް މިހާރު ހުރި ކަނދުފަތިތަކުގެ ޕާފޯމަންސް އިވެލުއޭޓްކޮށް، ދިމާވާ މައްސަލަތައް ދެނެގަނެ، މަސްލަހަތުވެރިންގެ ކަންބޮޑުވުންތައް ދެނެގަތުންކަން ވަޒީރު ފާހަގަކުރެއްވިއެވެ.

މަސްވެރިކަމާ ބެހޭ ވުޒާރާއިން ވިދާޅުވީ ރާއްޖޭގައި މިވަގުތު ބޭނުންކުރަމުންދާ ކަނދުފައްޗަކީ މީގެ 20 އަހަރު ކުރިން ޑިޒައިން ކޮށްފައިވާ ކަނދުފަތިތަކެއްކަމަށެވެ. އެހެންކަމުން އަވަހަށް ކަނދުފަތިތައް ކަނޑައިގެންގޮސް މަސްވެރިންނަށް ދަތިތަކާއި ކުރިމަތިލާންޖެހޭކަމަށެވެ. އަދި މީގެ ސަބަބުން ހަރަދުވެސް ބޮޑުކަމަށް އެ ވުޒާރާއިން ވަނީ ފަހަގަކުރައްވާފައެވެ.

އަލަށް ޑިޒައިންކުރާ ކަނދުފަތިތަކަކީ ޒަމާނަށް ފެތޭ ޓެކްނޮލޮޖީއާއި ރަހުމަތްތެރި ކަނދުފަތިތަކަށް ވާނެކަމަށް އެ ވުޒާރާއިން ވަނީ ވިދާޅުވެފައެވެ. އެފްއޭއޯއާއިއެކު ކުރިއަށްގެންދާ މި ޕްރޮޖެކްޓްގެ ދަށުން އެފްއޭއޯގެ ޓެކްނިކަލް އަދި މާލީ އެހީއާއެކު އައު ޑިޒައިންގެ 2 ކަނދުފަތި މިއަހަރުގެ ތެރޭގައި ރާއްޖޭގެ 2 ސަރަހައްދެއްގައި އަޅާނެއެވެ.

މިވަގުތު ރާއްޖޭގައި 2 ބާވަތެއްގެ ކަނދުފަތި ވަނީ އަޅާފައެވެ. އެއީ ދޮށީގެ މަސްވެރިކަމަށް އަޅާފައިވާ 65 ކަނދުފައްޗާއި ސްޕޯރޓްސް ފިޝިންއަށް އާޅާފައިވާ 26 ކަނދުފައްޗެވެ.