ސޫރިޔާގައި ހަރަކާތްތެރިވާ ކުރުދީ ހަނގުރާމަވެރި ޖަމާޢަތްތަކުން ބޭނުންވާ ލުއިތައް ދިނުމަށް އެ ޤައުމުގައި ވެރިކަން ކުރާ އިންތިޤާލީ ސަރުކާރުން ދެކޮޅު ހަދައިފިއެވެ. ސޫރިޔާގައި ވެރިކަން ކުރަނީ ނިރުބަވެރި ޖަމާޢަތެއް ކަމުގައިވާ ހަޔިއަތު ތަޙްރީރް އަލް-ޝާމް (އެޗްޓީއެސު)ން އެކުލަވައިލާފައިވާ އިންތިޤާލީ ސަރުކާރަކުންނެވެ. ސޫރިޔާގައި ހަރަކާތްތެރިވާ ހަތިޔާރު އެޅި ޖަމާޢަތްތަކަށް، ހަތިޔާރު ބެހެއްޓުމަށް ފަހު، އަސްކަރިއްޔާއާ ގުޅުމުގެ ފުރުޞަތު އެޗްޓީއެސްގެ ސަރުކާރުން އޮތީ ހުޅުވައިލާފައެވެ.
އެޗްޓީއެސްގެ ނިރުބަވެރިން ސޫރިޔާގެ ވެރިކަން ފޭރިގަނެފައި ވަނީ ހުސްވި އަހަރުގެ ޑިސެންބަރު މަހުގެ 8ވަނަ ދުވަހުއެވެ. ނިރުބަވެރިންގެ ލަޝްކަރުތަކުން ވެރިރަށް ދިމިޝްޤަށް އަރައިގަތުމާ އެކު، ރައީސް ބައްޝާރް އަލް-އަސަދު ވަނީ ފިއްލަަވައިގެން ޢާއިލާއާ އެކު ރަޝިޔާއަށް ދަތުރު ކުރައްވާފައެވެ. އަދި، މޮސްކޯގެ ޙިމާޔަތަށް އެދިވަޑައިގަންނަވާފައެވެ.
އެޗްޓީއެސްގެ ސަރުކާރުގެ ދިފާޢީ ވަޒީރު މުރްހަފު އަބޫ ޤަޞްރާ ބުނީ، ހަތިޔާރު ބެހެއްޓުމަށް ފަހު އަސްކަރިއްޔާއާ ގުޅުމަށް ހުށަހަޅާފައިވާ ފުރުޞަތަށް އެ ޤައުމުގައި ހަރަކާތްތެރިވާ ކުރުދީ ހަނގުރާމަވެރިންގެ ޖަމާޢަތްތަކުން ޖަވާބުދީފައިވާ ކަމުގައެވެ. އަދި، އެ ޖަމާޢަތްތަކުން ބޭނުން ވަނީ، އަސްކަރިއްޔާއާ ގުޅުނު ނަމަވެސް، ވަކި ގޮތްޕެއް ނުވަތަ ލަޝްކަރެއްގެ ގޮތުގައި ދެމިއޮތުމަށް ކަމުގައެވެ. ނަމަވެސް، އެ ފުރުޞަތު ދިނުމަށް އިންތިޤާލީ ސަރުކާރުން ބޭނުން ނުވާ ކަމުގައި ވެސް އޭނާ ބުންޏެވެ.
ސޫރިޔާގައި ހަރަކާތްތެރިވާ ކުރުދީ ހަނގުރާމަވެރިންގެ މައި ޖަމާޢަތަކީ ސީރިޔަން ޑިމޮކްރެޓިކް ފޯސަސް (އެސްޑީއެފެ)ވެ. އެއީ، އެމެރިކާއިން ވާގިވެރިވާ، އެމެރިކާގެ އެހީތެރިކަމާ އެކު ހަރަކާތްތެރިވާ ޖަމާޢަތެކެވެ. އަދި، އެމެރިކާއިން ހަތިޔާރާއި އަސްކަރީ އެހީތެރިކަން ފޯރުކޮށްދެމުންދާ ޖަމާޢަަތެކެވެ. އަބޫ ޤަޞްރާ ބުނީ، ސޫރިޔާގެ އަސްކަރިއްޔާއާ ގުޅުމަށް ހުޅުވައިލާފައިވާ ފުރުޞަތުގެ ބޭނުން ހިފުމަށް އެސްޑީއެފުން ފަސްޖެހެމުންދާ ކަމުގައެވެ. އަދި، އެ ކަމުގައި ގޮތެއް ނިންމުން ލަސް ކުރަމުންދާ ކަމުގައެވެ.
14 އަހަރަށް ދެމިގެން ދިޔަ ސޫރިޔާގެ ދާޚިލީ ހަނގުރާމައިގެ ތެރެއިން އެސްޑީއެފުން ވަނީ އެ ޤައުމުގެ ބައެއް ސަރަހައްދުތަކަށް އަތްގަދަ ކޮށްފައެވެ. އެޗްޓީއެސުން ސޫރިޔާގެ ވެރިކަން ފޭރިގަނެފައިވީ ނަމަވެސް، އެ ސަރަޙައްދުތައް އަދިވެސް އޮތީ އެސްޑީއެފްގެ ބާރުގެ ދަށުގައެވެ. ނަމަވެސް، އެސްޑީއެފުން މި ވަގުތު ދަނީ އެޗްޓީއެސްގެ ސަރުކާރާ އެކު މަޝްވަރާތަކުގައި ބައިވެރިވަމުންނެވެ.
އެސްޑީއެފްގެ ކޮމާންޑަރު މަޟްލޫމް ޢަބްދީ ބުނީ، ސޫރިޔާގެ އަސްކަރިއްޔާއާ ގުޅުމަށް އެ ޖަމާޢަތުން އެއްބަސްވެފައިވާނެ ކަމުގައެވެ. ނަމަވެސް، އެ ޖަމާޢަތަކީ އަސްކަރިއްޔާގެ ވަކި ބަޔެއްގެ ނުވަތަ ގޮތްޕެއްގެ ގޮތުގައި ބޭއްވުމަށް ޝަރުޠު ކޮށްފައިވާނެ ކަމުގައެވެ. ނަމަވެސް، އަބޫ ޤަޞްރާ ވިދާޅުވީ، އެއީ އެއްބަސްވެވޭނެ ފަދަ ޝަރުޠެއް ނޫން ކަމުގައެވެ. އަދި، އެ ފުރުޞަތު ނުދިނުމަށް ނިންމާފައިވާ ކަމުގައެވެ.
އިންތިޤާލީ ސަރުކާރުގެ ދިފާޢީ ވަޒީރު ކަމުގެ މަޤާމާ ޙަވާލުވެފައިވާ އަބޫ ޤަޞްރާގެ މައިގަނޑު ޒިންމާއަކީ، އަސަދުގެ ސަރުކާރާ ދެކޮޅަށް ހަނގުރާމަ ކުރި ފެކްޝަންތަކާއި ހަތިޔާރު އެޅި ޖަމާޢަތްތައް އެއްގަލަކަށް އެރުވުމެވެ. އަދި، އެ ފަރާތްތަކުގެ ބައިވެރިވުމާ އެކު އަސްކަރިއްޔާ އަލުން އެކުލަވައިލުމެވެ. ނަމަވެސް، އެސްޑީއެފްގެ އަމަލުތަކާ އެކު އޭނާގެ ޒިންމާއަށް މި ވަނީ ބޮޑެތި ގޮންޖެހުންތަކެއް ކުރިމަތިވެފައެވެ.
އެސްޑީއެފަކީ ތުރުކީވިލާތުގެ ސަލާމަތާއި ރައްކާތެރި ކަމަށް އޮތް ނުރައްކަލެއްގެ ގޮތުގައި އެ ޤައުމުން ވެސް ޤަބޫލު ކުރެއެވެ. ނަމަވެސް، އެމެރިކާއިން ޤަބޫލު ކުރާ ގޮތުގައި އެސްޑީއެފަކީ އެމެރިކާގެ މުހިންމު ބައިވެރިއެކެވެ. ނިރުބަވެރި ޖަމާޢަތެއް ކަމުގައިވާ އައިއެސާ ދެކޮޅަށް އެމެރިކާއިން އިސްވެ ކުރި ހަނގުރާމައިގައި އެސްޑީއެފުން ވަނީ އިސް ދައުރެއް އަދާ ކޮށްފައެވެ.
މާރިޗު 1ވަނަ ދުވަހުގެ ކުރިން ސޫރިޔާގައި ހަރަކާތްތެރިވާ ހުރިހާ ހަތިޔާރު އެޅި ޖަމާޢަތްތަކެއް އެއްގަލަކަށް އަރުވައި، ގުޅިފައިވާ އަސްކަރިއްޔާއެއް އެކުލަވައިލުމަށް އަބޫ ޤަޞްރާ ދަނީ މަސައްކަތް ކުރަމުންނެވެ. ސަބަބަކީ، އެ ދުވަހު އިންތިޤާލީ ސަރުކާރުގެ ދައުރު ނިމުމަކަށް އައުމެވެ. އެޗްޓީއެސްގެ ސަރުކާރުގެ ބައެއް ނިންމުންތަކާ މެދު ބައިނަލްއަޤުވާމީ މުޖުތަމަޢުން ދަނީ ނުރުހުމާއި ކަންބޮޑުވުން ފާޅު ކުރަމުންނެވެ. އެ ފަދަ ބައެއް ނިންމުންތަކުގެ ތެރޭގައި، ބޭރު ޤައުމުތަކުގެ ހަނގުރާމަވެރިންނަށް ސޫރިޔާގެ އަސްކަރިއްޔާގައި ޚިދުމަތް ކުރުމުގެ ފުރުޞަތު ދިނުމަށް ނިންމުން ހިމެނެއެވެ. އޭގެ ތެރޭގައި މިޞްރާއި އުރުދުނުން ސޫރިޔާއަށް ދަތުރު ކޮށްފައިވާ ހަނގުރާމަވެރިން ހިމެނެއެވެ.