މިހާރު ކުރިއަށްދާ ދިވެހި ޔޫތު ލީގުގެ 16 އަހަރުން ދަށުގެ ބައިގައި ބޮޑު ތަފާތަކުން ޔުނައިޓެޑް ވިކްޓަރީ (ޔޫވީ) ބަލިކޮށް، މާޒިޔާ ސްޕޯޓްސް އެންޑް ރެކްރިއޭޝަނުން ތާވަލުގެ އެއްވަނައިގައި އޮތް ކުލަބު ވެލެންސިއާއާ ޕޮއިންޓުގެ ގޮތުން ހަމަހަމަކޮށްފިއެވެ.
16 އަހަރުން ދަށުގެ ޔޫތު ލީގުގައި މި ވަގުތު އެއްވަނައިގައި ވެލެންސިއާ އޮތީ 12 ޕޮއިންޓާއެކުއެވެ. މާޒިޔާއިން އިއްޔެ ހޯދި މޮޅާއެކު ތާވަލުގެ ދެވަނައިގައި އޮތީ އެއް މެޗު އިތުރަށް ކުޅެ އެ އަދަދަށް ޕޮއިންޓް ހޯދައިގެންނެވެ. ތިންވަނައިގައި އޮތީ ނުވަ ޕޮއިންޓާއެކު އޮތް ސުޕަ ޔުނައިޓެޑް ސްޕޯޓްސް (ސަސް) ކުލަބެވެ.
ހެންވޭރު ދަނޑުގައި އިއްޔެ ހަވީރު ކުޅުނު މެޗުގައި މާޒިޔާއިން ވަނީ ޔުނައިޓެޑް ވިކްޓަރީގެ މައްޗަށް 8-0 ގެ ތަފާތު ބޮޑު ނަތީޖާއަކުން ކުރިހޯދާފައެވެ. މިމެޗުގައި މާޒިޔާއިން މޮޅު ކުޅުމެއް ދެއްކިއިރު، އެ ޓީމުގެ ލޫތު ބިން ސައުދު ވަނީ ފަސް ލަނޑު ޖަހާފައެވެ. ދެން މި މެޗުގައި މާޒިޔާގެ ލަނޑުތައް ކާމިޔާބުކޮށްދިނީ މުޙައްމަދު ޒީކް އާއި، ޙައްމަދު ލާމިން އަދި ލޫތު އިޒްޔާންއެވެ.
މި އުމުރުފުރާގައި ރޭ ވިކްޓަރީ ސްޕޯޓްސް ކުލަބާއި، ކުލަބު އީގަލްސް ބައްދަލުކުރި މެޗު ނިމުނީ ލަނޑެއް ނުޖެހި އެއްވަރުވެގެންނެވެ. އަންނަ ހަފްތާގައި ލީގު ނިމޭއިރު، މިއަދުވެސް މި މުބާރާތުގައި ދެ މެޗު ކުޅުމަށް ވަނީ ހަމަޖެހިފައެވެ.