ހުޅަނގު އައްސޭރިއަށް ވެރިވެގަތް ޔަހޫދީންނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް ޓްރަމްޕް އުވާލައްވައިފި

ފަލަސްޠީނުގެ ހުޅަނގު އައްސޭރިއަށް ވެރިވެގަނެ، ބޮޑެތި ޖަރީމާތައް ހިންގި ޒަޔަނިސްޓު އިސްރާއީލުގެ ހައްދުފަހަނަ އެޅި ކަނާތު ފިޔައިގެ މީހުންނާ ދެކޮޅަށް އެމެރިކާގެ ސަރުކާރުން އަޅާފައިވާ ދަތިކުރުމުގެ ފިޔަވަޅުތައް، އެމެރިކާގެ އައު ރައީސް ޑޮނަލްޑް ޓްރަމްޕް އުވާލައްވައިފިއެވެ.

ހުޅަނގު އައްސޭރީގައި އަމަން ނަގައިލުމާއި ހަމަނުޖެހުން އުފެއްދުމުގެ ތުހުމަތުކޮށް، އެމެރިކާގެ ކުރީގެ ރައީސް ޖޯ ބައިޑެންގެ ސަރުކާރުން ވަނީ، އެ ސަރަޙައްދަށް ވެރިވެގަތް މީހުންނާއި ކުންފުނިތަކުން އެމެރިކާގައި ވިޔަފާރުކުރުމާއި، ހަރުމުދާތައް ހިފަހައްޓައިފައެވެ. ނަމަވެސް، އެމެރިކާގެ 47 ވަނަ ރައީސްގެ ގޮތުގައި މަޤާމުގެ ހުވައި ކުރައްވައި، އެނބުރި ވެރިކަމަށް ރޭ ވަޑައިގެންނެވި ޓްރަމްޕް ވަނީ އެ ޤަރާރު ބާތިލުކުރައްވައިފައެވެ.

ހުޅަނގު އައްސޭރިއަށް ޔަހޫދީން ވެރިވެގަނެފައި ވަނީ 1967ވަނަ އަހަރުއެވެ. ހުޅަނގު އައްސޭރީގެ އިތުރުން ޣައްޒާއަށް ވެރިވެގަނެ، ޔަހޫދީން ހިންގަމުން ދަނީ އިސްތިޢުމާރީ ވެރިކަމެއް ކަމުގައި ބައިނަލްއަޤުވާމީ މުޖުތަމަޢުން ވެސް ޤަބޫލު ކުރެއެވެ. ބައިޑެންގެ ސަރުކާރުން ވެސް ހުޅަނގު އައްސޭރިއަސް ވެރިވެގަތް މީހުންނާ ދެކޮޅަށް ދަތިކުރުމުގެ ފިޔަވަޅު އެޅީ، ފަލަސްޠީނުގެ މިނިވަން ދައުލަތެއް ޤާއިމުކުރުމަށް ބާރުއެޅުމުގެ ގޮތުންނެވެ.

ނަމަވެސް، 2017ން 2021 އެމެރިކާގައި ވެރިކަން ކުރެއްވި ޓްރަމްޕްގެ ފުރަތަމަ ސަރުކާރުގައި ވެސް، ހުޅަނގު އައްސޭރީގައި ޔަހޫދީން ވެރިވެގަތުމަކީ ޤާނޫނީ ޚިލާފު ޢަމަލެއްގެ ގޮތުގައި ބަލައިގަންނަން ވަނީ ދެކޮޅު ހަދައިފައެވެ. ސަބަބަކީ، ޔަހޫދީން ވެރިވެގަނެފައިވާ ޤުދުސަކީ އިސްރާއީލުގެ ވެރިރަށުގެ ގޮތުގައި ކަނޑައެޅުމަށް 2017ވަނަ އަހަރު ނިންމުމުން، އެ ކަމަށް ތާޢީދު ކުރައްވައި، ތެލް އަވީވުގައި ހުރި އެމެރިކާގެ އެމްބަސީ ޤުދުސަށް ބަދަލު ކުރަން ޓްރަމްޕް ނިންމެވުމެވެ. މީގެ އިތުރުން، ފަލަސްޠީނުގެ ބިންތަކުގައި ޔަހޫދީން އާބާދު ކުރުމަށް ތަންފީޒު ކުރަމުންދާ ސިޔާސަތުތަކަށް ވެސް ޓްރަމްޕް ވަނީ ތާޢީދު ކުރައްވާފައެވެ.

މި ނިންމުމުގެ އިތުރުން، ރޭ ވެރިކަމަށް ވަޑައިގެންނެވި ޓްރަމްޕް ވަނީ، ޔަހޫދީ ދައުލަތަށް 2،000 ޕައުންޑުގެ ބޮޑެތި ބޮން ވިއްކަން ބައިޑެންގެ ސަރުކާރުން ހުއްޓުވާފައި އޮތް އޮތުން ނިމުމަކަށް ގެންނަވާފައިވާ ކަމަށް ބައެއް މީޑިޔާ ރިޕޯޓުތައް ވަނީ ބުނެފައެވެ.