ބްރޯޑްކޮމްގެ މެމްބަރުކަމަށް މުޙައްމަދު ޢަބްދުﷲ އާއި ޞަރާޙަތު އައްޔަންކޮށްފި

މޯލްޑިވްސް ބްރޯޑްކާސްޓިންގ ކޮމިޝަންގެ މެމްބަރުކަމުގެ މަޤާމަށް އެކޮމިޝަނުގެ ކުރީގެ މެންބަރު، އަލްއުސްތާޛާ އާމިނަތު ޞަރާޙަތު ޢިއްޒަތާއި މަޖިލީހުގެ އިހަވަންދޫ ދާއިރާގެ ކުރީގެ މެންބަރު މުޙައްމަދު އަބްދުﷲ އައްޔަންކޮށްފިއެވެ.

މޯލްޑިވްސް ބްރޯޑްކާސްޓިންގ ކޮމިޝަނުން ވިދާޅުވީ އެ ދެ ބޭފުޅުން މަގާމަށް އައްޔަންކޮށްފައިވަނީ ހޯމަދުވަހު ކަމަށެވެ. އެދެބޭފުޅުން އެ މަގާމަށް އައްޔަންކުރުމަށް ރައްޔިތުންގެ މަޖިލީހުން ރުހުން ދީފައިވަނީ މިދިޔަ ބުރާސްފަތި ދުވަހުއެވެ. މިދެ ބޭފުޅުންގެ ތެރެއިން ކޮމިޝަންގެ މެމްބަރުކަމަށް ސަރާހަތު އައްޔަންކުރަން ފާސްވީ 68 މެންބަރުންގެ ވޯޓުންނެވެ. މުޙައްމަދު އަބްދުﷲ އައްޔަން ކުރަން ފާސްވީ 58 މެންބަރުންގެ ވޯޓުންނެވެ.

ބްރޯޑްކޮމްގެ ދެ މަގާމު ހުސްވީ އެ ކޮމިޝަންގެ ރައީސާއަކަށް ހުންނެވި މަރިޔަމް ވަހީދާއާއި މެންބަރު އަލީ ޔޫސުފްގެ ދައުރު މިދިޔަ ޑިސެންބަރު މަހުގެ ފަހަކަށް ހަމަވުމުންނެވެ. ބްރޯޑްކޮމްގެ ހުސްވެފި ދ މަގާމަށް ކުރިމަތިލުމަށް ހުޅުވާލުމުން 12 މީހަކު އެމަގާމަށް ކުރިމަތިލިއެވެ.