ހުޅުދުއްފާރުގައި ބީއެމްއެލް އާއި އެމްއައިބީގެ އޭޓީއެމް ބެހެއްޓުމުގެ މަސައްކަތް ކައުންސިލަށް

މާޅޮސްމަޑުލު އުތުރުބުރީ ހުޅުދުއްފާރުގައި، ބޭންކް އޮފް މޯލްޑިވްސްގެ އޭޓީއެމަކާއި، އިސްލާމިކް ބޭންކްގެ އޭޓީއެމެއް ބެހެއްޓުމުގެ އެއްބަސްވުމުގައި ސޮއިކޮށްފިއެވެ.

މިއެއްބަސްވުމުގައި ސޮއިކޮށްފައިވަނީ ރައީސުލްޖުމްހޫރިއްޔާ ރ.އަތޮޅަށް މިހާރު ކުރައްވަމުން ގެންދަވާ ޒިޔާރާތުގެ ތެރެއިން ހުޅުދުއްފާރު ރައްޔިތުންނާއި ކުރެއްވެވި ބައްދަލުވުމުގެ ތެރެއިންނެވެ.

މުޅި ރާއްޖޭގެ މީހުން ދިރިއުޅޭ ހުރިހާ ރަކަށަށް ބޭންކިން ޚިދުމަތް ފުޅާކުރުމަށް، ސަރުކާރުންވަނީ ޚާއްސަ މަޝްރޫޢެއް ފަށްޓަވާފައެވެ. އެގޮތުން މިމަޝްރޫޢުގެ ދަށުން ރ. ހުޅުދުއްފާރުގައި އޭޓީއެމް ބެހެއްޓުމަށް ވަނީ ހަމަޖެހިފައެވެ.

މި މަސައްކަތުގެ އެއްބަސްވުމުގައި ހުޅުދުއްފާރު ކައުންސިލުގެ ފަރާތުން ސޮއިކުރެއްވީ، އެ ރަށު ކައުންސިލުގެ ރައީސް މުހައްމަދު އާތިފްއެވެ. ބޭންކް އޮފް މޯލްޑިވްސްގެ ފަރާތުން ސޮއިކުރެއްވީ، އެ ބޭންކުގެ ޑިރެކްޓަރ އޮފް ރީޓެއިލް އެންޑް އެސްއެމްއީ ބޭންކިން ބަދުރުއްދީން ހަސަންއެވެ. އިސްލާމިކް ބޭންކުގެ ފަރާތުން އެޓީއެމް ބެހެއްޓުމުގެ އެއްބަސްވުމުގައި ސޮއިކުރެއްވީ ބޭންކުގެ މެނޭޖިންގް ޑިރެކްޓަރ މުފައްދަލް އިދްރީސް ޚުމްރީ އެވެ.

ބޭންކް އޮފް މޯލްޑިވްސް އާއި މޯލްޑިވްސް އިސްލާމިކް ބޭންކުގެ އޭޓީއެމް ހުޅުދުއްފާރުގައި ބެހެއްޓުމުގެ މަސައްކަތް ހަވާލުކޮށްފައިވާއިރު އިއްޔެ ވަނީ އެއަތޮޅުގެ އިތުރު 3 ރަށެއްގައި އޭޓީއެމް ބެހެއްޓުމުގެ އެއްބަސްވުންތަކުގައި ސޮއިކޮށްފައެވެ. އެގޮތުން ރ. ވާދޫ، ރަސްގެތީމު އަދި އެއަތޮޅު އަނގޮޅިތީމުގައި އޭޓީއެމް ބެހެއްޓުމުގެ އެއްބަސްވުމުގައިވަނީ ސޮއިކޮށްފައެވެ.

ސަރުކާރުން ފަށްޓަވާފައިވާ މަސައްކަތުގެ ދަށުން މިއަހަރުގެ މާރިޗު މަހުގެ ނިޔަލަށް 17 ރަށެއްގައި އޭޓީއެމް ބެހެއްޓުމަށް ދަނީ މަސައްކަތް ކުރައްވަމުންނެވެ. އަދި މިހާރު ޚިދުމަތް ނުދެވޭ ރަށްތަކުގައި އޭޓީއެމް މިއަހަރު ނިޔަލަށް ބަހައްޓާނެއެވެ. މި މަސައްކަތުގެ ދަށުން މޯލްޑިވްސް އިސްލާމިކް ބޭންކުން 19 ރަށެއްގައި މިއަހަރު ނިޔަލަށް އޭޓީއެމް ބެހެއްޓުމަށް ވަނީ ނިންމާފައެވެ.