ދެވަނަ ދައުރަކަށް ނުވިސްނަވައި، ރައީސް ބޭނުންފުޅުވަނީ މި ދައުރުގައި ރާއްޖެ އަމާން ބަނދަރަކަށް ގެންގޮސްދެއްވަން: ފަލާޙް

ދެވަނަ ދައުރަކަށް ނުވިސްނަވައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބޭނުންފުޅުވަނީ މި ދައުރުގައި ރާއްޖެ އަމާން ބަނދަރަކަށް ގެންގޮސްދޭން ކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާޙް ވިދާޅުވެއްޖެއެވެ.

ފަލާޙް މިހެން ވިދާޅުވީ ރައީސުލްޖުމްހޫރިއްޔާ ރ. އަތޮޅަށް ކުރައްވަމުން ގެންދަވާ ދަތުރުފުޅުގައި އެ އަތޮޅުގެ އިންނަމާދޫ ރައްޔިތުންނާ ބައްދަލުކުރެއްވުމަށް ބޭއްވި ރަސްމިއްޔާތުގައެވެ.

ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އިބްރާހީމް ފަލާޙް ވިދާޅުވީ މިހާތަނަށް ގިނަ ރައީސުންނާއެކު ސިޔާސީގޮތުން ތަޖުރިބާ ލިބިވަޑައިގެންފައިވާ ކަމަށާއި ނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަކީ ވެރިކަމުގެ މަދު ދުވަސްކޮޅެއްގެ ތެރޭގައި ރާއްޖޭގެ ހުރިހާ ރަށަކަށް ވަޑައިގެން ރައްޔިތުންގެ ހާލު ބައްލަވައިލެއްވި ފުރަތަމަ ރައީސް ކަމަށެވެ. ރިޔާސީ އިންތިޚާބުގައި ރައްޔިތުން ބޭނުންވީ އޯގާތެރި ވެރިއެއް ކަމަށާއި އެކަން އަމަލުން ރައީސް ދައްކަވަމުންދާ ކަމަށް ފަލާޙް ވިދާޅުވިއެވެ.

ފަލާޙް ވިދާޅުވީ ރައީސް ޑރ. މުޢިއްޒު ހައުސިން މިނިސްޓަރުގެ މަޤާމުގައި ހުންނަވައިގެން ރާއްޖޭގައި ތަރައްޤީގެ އެންމެ ބޮޑެތި މަޝްރޫއުތައް ކުރިއަށްގެންދެވީ އެމަނިކުފާނުގެ ހިންގުންތެރިކަމާއި ވިސްނުންތެރިކަމާއެކުގައި ކަމަށެވެ. އަދި މާލޭ ސިޓީގެ މޭޔަރުގެ މަޤާމާއި ވެރިކަމުގައިވެސް މަސައްކަތްކުރައްވަނީ އެ ނަމޫނާ ދައްކަވަމުން ކަމަށް ވިދާޅުވިއެވެ.

ކުރީގެ ރައީސުން މަސައްކަތް ކުރެއްވީ ދެވަނަ ދައުރަކަށް ވިސްނައިގެންކަން ފާހަގަކުރައްވައި ފަލާޙް ވިދާޅުވީ ރައީސް ޑރ. މުޢިއްޒު ބޭނުންފުޅުވަނީ އެމަނިކުފާނުގެ މި 5 އަހަރުގެ ތެރޭގައި ރާއްޖޭގައި ހުރި މައްސަލަތައް ހައްލުކުރައްވައި ރާއްޖެ އަމާން ބަނދަރަކަށް ގެންގޮސްދެއްވުމަށް ކަމަށެވެ.

"މީގެ ކުރީގެ ވެރިން ކުރަންކުރަން ބޭނުންވި އެހެންނަމަވެސް ދެވަނަ ދައުރެއްގެ ދަހިވެތިކަމުގައި ނުކުރެވިހުރި އެތައް މައްސަލަތަކެއް އެމަނިކުފާނުގެ މިވީ އެއް އަހަރާ މަދު ދުވަސްކޮޅެއްގެ ތެރޭގައި މިވަނީ ހައްލުކޮށްދީފައި. ތަރައްގީއަކީ ހަމައެކަނި ރަށެއްގައި ހިންގާ މަޝްރޫއުތަކެއް ނޫން. އެއަށްވުރެ ބޮޑަށް އަޅުގަނޑުމެންގެ ތެރޭގައި އުފެދިފައި ހުރި މަސްތުވާތަކެއްޗާއި އެނޫންވެސް މުޖުތަމައުގައި ހުރި ނުބައި އާދަތައް ހައްލުކޮށްފައި އަޅުގަނޑުމެން ކުރިއަށްދާން މަސައްކަތް ކޮށްފިއްޔާ އަޅުގަނޑުމެންނަށް ދަތުރުކުރެވޭ މިންވަރު މާބޮޑުވާނެ،" ފަލާހު ވިދާޅުވިއެވެ.

ފަލާޙް ވިދާޅުވީ ޒުވާން ޖީލު ސަލާމަތްކުރެވިއްޖެނަމަ ޤައުމުގެ މުސްތަގުބަލު އުޖާލާވާނެ ކަމަށާއި ރައީސް ފިޔަވަޅުތައް އަޅުއްވަމުން ގެންދަވަނީ އެ ކަންކަން ހައްލު ކުރެއްވުމަށް ކަމަށެވެ. އަދި ރައީސް ކުރައްވާ މަސައްކަތްޕުޅުން މުޅި ރާއްޖެ ތަރައްޤީކޮށްދެއްވާނެކަމުގެ ޔަޤީންކަން އެބައޮތް ކަމަށްވެސް އޭނާ ވިދާޅުވިއެވެ.

ރައީސުލްޖުމްހޫރިއްޔާ އަބަދުވެސް އިރުޝާދު ދެއްވަނީ އޫސޫލާއި ހަމަޔާއާއި ޤާނޫނާއި ގަވާއިދުގެ ތެރެއިން ކަންކަން ކުރުމަށް ކަމަށްވެސް އިނގުރައިދޫ ދާއިރާގެ މެންބަރު އިބްރާހީމް ފަލާޙް ވިދާޅުވިއެވެ.