ޢިލްމީ ދިރާސާތައް ކުރިއަށްގެންދިޔުމަށް، އެމްއެންޔޫއާއި މަހިޑޮލް ޔުނިވަރސިޓީއާ ދެމެދު އެއްބަސްވުމެއް

ޢިލްމީ ދިރާސާތައް ކުރިއަށްގެންދިޔުމަށް، މޯލްޑިވްސް ނޭޝަނަލް ޔުނިވާސިޓީ، އެމްއެންޔޫއާއި ތައިލޭންޑުގެ މަހިޑޮލް ޔުނިވަރސިޓީއާ ދެމެދު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގެ ދަށުން ދެ ޔުނިވަރޓީއިން ގުޅިގެން ޤައުމީ ފެންވަރުގައި އަދި ދުނިޔޭގެ ފެންވަރުގައި ފާހަގަކޮށްލެވޭ ކަންކަމަށް ދިރާސާތައް ކުރިއަށްގެންދާނެއެވެ.

މި އެއްބަސްވުމުގައި އެމްއެންޔޫގެ ފަރާތުން ސޮއިކުރެއްވީ ވައިސް ޗާންސެލަރ ޑރ އައިޝަތު ޝެހެނާޒް އާދަމް އާއި ޑެޕިއުޓީ ވައިސް ޗާންސެލަރ ޑރ ރަހީމާ އަބްދުއްރަހީމެވެ. އަދި މަހިޑޮލް ޔުނިވަރސިޓީގެ ފަރާތުން ސޮއިކުރެއްވީ، އެ ޔުނިވަރސިޓީގެ ރައީސް ޕިޔާމިތްރް ސްރިތާރާ، އަދި އެސޯސިއޭޓް ޕްރޮފެސަރ ނޮޕްރެނިއު ސަޖަރަކްސް ދިރާތީއެވެ.

އެމްއެންޔޫއިން ވިދާޅުވީ މި އެއްބަސްވުމުގެ ސަބަބުން ގިނަ ފައިދާތަކެއް ފެކަލްޓީގެ މުވައްޒަފުންނަށާއި ދަރިވަރުންނަށް ލިބިގެންދާނެ ކަމަށެވެ. އެގޮތުން 2 ޔުނިިޔަރސިޓީއިން ގުޅިގެން ފުޅާ ދާއިރާއެއްގައި ދިރާސާތައް ކުރުމަށް މަގު ފަހިވެގެންދާނެ ކަމަށެވެ.

މިއީ ދިރާސާތަކުގެ އަލީގައި ހައްލުތައް ހޯދައިދިނުމަށް އެމްއެންޔޫ އާއި މަހިޑޮލް ޔުނިވަރސިޓީއިން ކުރާ މަސައްކަތްތަކަށް ދޭ އަހައްމިއްޔަތުކަން މި އެއްބަސްވުމުން ދައްކުވައިދޭ ކަމަށްވެސް އެމްއެންޔޫއިން ވިދާޅުވިއެވެ.

ދިވެހިރާއްޖޭގެ ޤައުމީ ޔުނިވާރސިޓީން ދަނީ ތަފާތު އެކި ދާއިރާތަކުން ދިރާސާ ކުރުމަށާއި މީހުން ތަމްރީނުކުރުމަށް އެކި އިދާރާތަކާއި މުއައްސަސާތަކާއެކު އެއްބަސްވުންތަކުގައި ސޮއިކުރަމުންނެވެ. އަދި ރާއްޖެއަށް ބޭނުންވެފައިވާ މުހިއްމު ދާއިރާތަކަށް ޚާއްސަކޮށްގެން ތަފާތު ދިރާސާތައްވެސް ޤައުމީ ޔުނިވަރސިޓީންދަނީ ހަދަމުންނެވެ.