ފައިނުގައި އެއަރޕޯޓެއް ހަދަން ރައްޔިތުންގެ އެއްބާރުލުން ބޭނުންވޭ: ރައީސް
-
ފައިނުގައި އެއަރޕޯޓެއް ތަރައްޤީކޮށްދެއްވުމަކީ ރައީސްގެ ވަޢުދުފުޅެއް
-
އެއަރޕޯޓުގެ މަސައްކަތް އަންނަމަހު އެމްޓީސީސީއާ ޙަވާލުކޮށް މަސައްކަތް ފަށާނެ
-
ރައީސް ވަނީ ފައިނުގެ ކައުންސިލާއި ޑަބްލިއުޑީސީގެ މެންބަރުންނާ ބައްދަލުކުރައްވާފައި
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ފައިނު ކައުންސިލާއި، އ.ތ.މ ކޮމިޓީ އަދި މުއައްސަސާތަކުގެ އިސްވެރިނާއި ބައްދަލުކުރައްވައި، ފައިނުގައި އެއާރޕޯޓެއް އެޅުމަށް ރައްޔިތުންގެ އެއްބާރުލުން ވަރަށް ބޭނުންވާކަމުގައި ވިދާޅުވެއްޖެއެވެ. މި ބައްދަލުކުރެއްވުން ކުރިއަށްދިޔައީ މިއަދު ފައިނު ސުކޫލުގައެވެ.
މި ބައްދަލުކުރެއްވުމުގައި ވާހަކަފުޅު ދައްކަވަމުން، ރަށުގެ ކައުންސިލުން ވަނީ ރަށުގެ ތަރައްޤީއަށް މުހިންމު ކަންކަން ރައީސުލްޖުމްހޫރިއްޔާއާ ޙިއްޞާކުރައްވާފައެވެ. އެގޮތުން ރަށުގެ ރައްޔިތުންނަށް އެއްރަށުން އަނެއްރަށް ދިއުމުގައި ހުރި ގޮންޖެހުންތައް ފާހަގަކުރައްވައި ދަތުރުފަތުރުގެ ނިޒާމެއް ތަރައްޤީ ކޮށްދެއްވުމަށް ކައުންސިލުން އެދިވަޑައިގެންނެވިއެވެ. އަދި ބަނދަރު ޖާގައިގެ ދަތިކަން ހައްލުކޮށްދެއްވުމަށްވެސް ކައުންސިލުން އެދިވަޑައިގެންނެވިއެވެ. މީގެ އިތުރުން ކައުންސިލުންވަނީ ރަށުގެ ސުކޫލާއި، ފެނާއި ނަރުދަމާ ނިމިފައިވާތީ އެކަމަށް ސަރުކާރަށް ޝުކުރުއަދާކުރައްވާފައެވެ.
މިއަދުގެ ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރެއްވި ކަންކަމުގެ ފަހުގެ މަޢުލޫމާތުތައް ޙިއްޞާކުރައްވާފައެވެ.
ފައިނުގައި އެއަރޕޯޓެއް ތަރައްޤީކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. އެމަނިކުފާނު މިއަދު ފައިނަށް ވަޑައިގެން ރައްޔިތުންނާއެކު ބޭއްވެވި ބައްދަލުކުރެއްވުމުގައި ވަނީ އެމަނިކުފާނުގެ ވަޢުދުފުޅާއެއްގޮތަށް އެރަށުގައި އެއަރޕޯޓު ތަރައްޤީކޮށްދެއްވާނެކަމުގެ ޔަޤީންކަން ދެއްވާފައެވެ. އެގޮތުން އަންނަމަހު އެމްޓީސީސީއާއެކު އެ މަޝްރޫޢުގެ އެއްބަސްވުމުގައި ސޮއިކޮށް ޢަމަލީ މަސައްކަތް ވީހާވެސް އަވަހަށް ފެށިގެންދާނެކަމަށް ރައީސް ވަނީ ވިދާޅުވެފައެވެ.