ބެލްޖިއަމްގެ ގައުމީ ފުޓްބޯޅަ ޓީމުގެ ކޯޗަކަށް ރޯމާގެ ކުރީގެ ކޯޗު ރޫޑީ ގާސިއާ ހަމަޖައްސައިފިއެވެ.
ބެލްޖިއަމްގެ ކޯޗު ކަމަށް އުމުރުން 60 އަހަރުގެ ރޫޑީ ގާސިއާ ހަމަޖައްސާފައިވަނީ ކުރިން އެ މަގާމުގައި ހުރި ޑޮމެނިކޯ ޓެޑެސްކޯ މަގާމުން ވަކި ކުރުމަށްފަހުގަ އެވެ. ދެ އަހަރު ދުވަހު ބެލްޖިއަމްގެ ކޯޗެއްގެ ގޮތުގައި މަސައްކަތްކުރި ޓެޑެސްކޯ މަގާމުން ވަކިކޮށްފައިވަނީ މިދިޔަ ހަފްތާގަ އެވެ.
ގާސިއާ އެންމެ ފަހުން ކޯޗެއްގެ ގޮތުގައި މަސައްކަތް ކޮށްފައިވަނީ އިޓަލީގެ ސެރިއާގެ ކްލަބް ނަޕޯލީގަ އެވެ. 2023 ވަނަ އަހަރު އޭނާ މަގާމުން ވަކިކޮށްފައިވަނީ ޖުމްލަ 16 މެޗަށްފަހުގަ އެވެ.
ނަޕޮލީ އަށް އިރުޝާދު ދިނުމުގެ ކުރިން އޭނާ ވަނީ ފްރާންސްގެ ލިލް އާއި މާސޭގެ އިތުރުން ލިއޯން އަށްވެސް ކޯޗު ކޮށްދީފަ އެވެ. އަދި އޭގެ ފަހުން އިޓަލީގެ ރޯމަށް އިރުޝާދު ދިނުމަށްފަހު އޭނާ ވަނީ ސައުދި އަރަބިއްޔާގެ އަލް ނަސްރަށްވެސް ކޯޗުކޮށްދީފަ އެވެ.
ޓެޑްސްކޯގެ އިރުޝާދުގެ ދަށުން ބެލްޖިއަމްއަށް އެދެވޭ ނަތީޖާތަކެއް ހޯދިފައިނުވާއިރު އެ ގައުމުގެ ބައެއް ކުޅުންތެރިން ވަނީ އޭނާ ކޯޗަކަށް ހުއްޓާ ގައުމީ ޓީމަށް ނުކުޅޭނެ ކަމަށްވެސް ބުނެފަ އެވެ. އޭގެ ތެރެއިން އެއް ކުޅުންތެރިއަކީ ގޯލު ކީޕަރު ޓިބާ ކޯޓުއާ އެވެ.
ފީފާގެ ރޭންކިންގެ އަށް ވަނައިގައި މިވަގުތު އޮތް ބެލްޖިއަމް ދެން އެންމެ އަވަހަށް މެޗެއް ކުޅޭނީ އަންނަ މާޗް މަހު ނޭޝަންސް ލީގުގެ ޕްލޭ އޮފްގައި ޔުކްރޭން އާއި ދެކޮޅަށެވެ.