މޯލްޑިވްސް އިންފްލައިޓް ކޭޓަރިންގެ މުވައްޒަފުންނަށް ޚާއްސަ ތަމްރީން ޕްރޮގްރާމެއް ބާއްވައިފި

މޯލްޑިވްސް އިންފްލައިޓް ކޭޓަރިންއިން އެ ކުންފުނީގެ ދަށުން ހިންގާ ދެ މަރުކަޒެއް ކަމުގައިވާ ހުޅުލޭ އައިލެންޑް ހޮޓަލާއި މަޑިފުށި ޕްރައިވެޓް އައިލެންޑްގެ މެނޭޖްމަންޓް މުވައްޒަފުންނަށް އަމާޒުކޮށްގެން ޚާއްޞަ ތަމްރީނު ޕްރޮގްރާމަތަކެއް ބާއްވައިފިއެވެ.

މި ތަމްރީނު ޕްރޮގްރާމަކީ ދެ މަރުކަޒުގެ މުވައްޒަފުންގެ މެދުގައި އޮންނަ ގުޅުން އިތުރަށް ހަރުދަނާކޮށް، މަސައްކަތުގެ މާޙައުލުގައި ކުރިމަތިވާ ގޮންޖެހުންތަކަށް އެކަށީގެންވާ ޙައްލުތައް ހޯދުމާއި، އަދި މުވައްޒަފުންނަށް އުފެއްދުންތެރި އަދި ހިތްގައިމު މާޙައުލެއް ޤާއިމުކުރުމަށް އަމާޒުކޮށްގެން ކުރިއަށް ގެންދިޔަ ޕްރޮގްރާމެކެވެ.

މި ތަމްރީނު ޕްރޮގްރާމުގައި މެނޭޖްމަންޓް ފެންވަރުގެ 26 މުވައްޒަފުން ބައިވެރިވެރިވިއެވެ. މި ތަމްރީނު ޕްރޮގްރާމުގެ ފުރަތަމަ ސެޝަން މި މަހުގެ 22 ވަނަ ދުވަހު ބާއްވާފައިވާއިރު، ދެވަނަ ސެޝަން ބާއްވާފައިވަނީ މިއަދެވެ. މި ދެ ސެޝަނުގައިވެސް މުވައްޒަފުންގެ ފަރާތުން ފާހަގަކުރެވޭ ޝައުޤުވެރިކަމަކާއި އުފެއްދުންތެރި ބައިވެރިވުމެއް ފެނިގެން ދިޔައެވެ.

މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި އެސްއޭޓީ ޕްރައިވެޓް ލިމިޓެޑް ގުޅިގެން އުފައްދާފައިވާ މޯލްޑިވްސް އިންފްލައިޓް ކޭޓަރިންގއިން ރާވައި ހިންގި މި ޕްރޮގްރާމަކީ ކުންފުނީގެ އިސް މަޤާމުތަކުގައި މަސައްކަތްކުރައްވާ މުވައްޒަފުންގެ ހުނަރުތައް އިތުރަށް ތަރައްޤީކޮށް، އެ މުވައްޒަފުންގެ ލީޑަރޝިޕް ސްކިލްސް ކުރިއެރުވުމަށް އަމާޒުކޮށްގެން ކުރިއަށްގެންދިޔަ ޚާއްޞަ ތަމްރީނު ޕްރޮގްރާމެކެވެ. މި ސެޝަންތަކުގައި ކުންފުނީގެ އިސް މުވައްޒަފުންނަށް ނިންމުންތައް ނިންމުމުގައި ދުރުވިސްނުމާއި، ވިސްނުންތެރިކަމާއެކު މަސައްކަތްކުރުމަށް ބޭނުންވާ މުހިންމު މަޢުލޫމާތާއި އަގުހުރި އިރުޝާދުތައް ފޯރުކޮށްދެވިފައިވެއެވެ.

މި ތަމްރީނު ޕްރޮގްރާމުގެ ބައިވެރިންނަށްވަނީ ހަނދާނީ ލިޔުމެއް ދީފައެވެ.

މި ތަމްރީނު ޕްރޮގްރާމުގެ ސަބަބުން މުވައްޒަފުންގެ މެދުގައި އޮންނަ ގުޅުން އިތުރަށް ބަދަހިވެ، އެއްބައިވަންތަކަން އިތުރުވެގެންދާނެއެވެ. މީގެ ސަބަބުން ކުންފުނީގެ މަސައްކަތްތައް އިތުރަށް ހަރުދަނާވެ، ޚިދުމަތުގެ ފެންވަރު މަތިވެގެންދާނެކަމަށް އެކުންފުނިން ވިދާޅުވިއެވެ. ޚާއްޞަކޮށް، މެނޭޖްމަންޓް ފެންވަރުގެ މުވައްޒަފުންނަށް މިފަދަ ތަމްރީނު ޕްރޮގްރާމްތައް ބޭއްވުމަކީ ކުންފުނީގެ މުސްތަޤުބަލަށް ކުރާނެ އިންވެސްޓްމަންޓެއްކަމަށް މޯލްޑިވްސް އިންފްލައިޓް ކޭޓަރިންއިން ފާހަގަކުރެއްވިއެވެ.

"މައިޑްފުލް ލީޑާސް"ގެ ނަމުގައި ހުޅުލޭ އައިލޭންޑް ހޮޓަލުގައި ކުރިއަށްދިޔަ މި ޕްރޮގްރާމުގެ ބައިވެރިންނަށް، ގިނަކަންތަތަކެއް ވަނީ ކިޔައިދީފައެވެ. އެގޮތުން އިދާރީގޮތުން އަންނަ ބަދަލުތަކައް ހޭނުމާއި، މަސައްކަތުގެ މާހައުލުގައި އުފެއްދުންތެރިކަން އިތުރުކުރުމަށް ކުރެވިދާނެކަންކަން ވަނީ ދަސްކޮށްދީފައެވެ. އަދި މިފަދަ ތަމްރީނުގެ ސަބަބުން މުވައްޒަފުންނަށް، މަސައްކަތުގެ މާހައުލުގެ މައްސަލަތައް ހައްލުކުރުމުގެ ހުނަރުތައް ދަސްވެގެންދާނެކަމަށްވެސް މޯލްޑިވްސް އިންފްލައިޓް ކޭޓަރިންއިން ވިދާޅުވިއެވެ.