ރާއްޖެއާއި އިންޑިއާގެ ގުޅުން ވަރުގަދަކުރުމުގައި ފުރިހަމަ އެއްބާރުލުން ލިބޭނެ: އިންޑިއާގެ ބޮޑުވަޒީރު
-
ދެ ޤައުމުގެ ގުޅުމަށް އިޙްތިރާމްކުރައްވާކަން ބޮޑުވަޒީރު ފާހަގަކުރެއްވި
ރާއްޖެއާއި އިންޑިއާގެ ގުޅުން އިތުރަށް ބަދަހިކޮށް ވަރުގަދަކުރުމުގައި ފުރިހަމަ އެހީތެރިކަން ލިބިގެންދާނެކަމުގެ ޔަޤީންކަން އިންޑިއާގެ ބޮޑުވަޒީރު ނަރެންދްރަ މޯދީ ދެއްވައިފިއެވެ.
އިންޑިއާގެ ބޮޑުވަޒީރު މި ޔަޤީންކަން ދެއްވާފައިވަނީ އިންޑިއާގެ ޖުމްހޫރީ ދުވަހުގެ މުނާސަބަތުގެ ތަހުނިޔާ ވިދާޅުވެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކްސްގައި ކުރެއްވި ޕޯސްޓަށް ރައްދުދެއްވާ ކުރެއްވި ޕޯސްޓެއްގައެވެ.
އިންޑިއާގެ ބޮޑުވަޒީރު ނަރެންދްރަ މޯދީ ކުރެއްވި ޕޯސްޓުގައި މިއަދު ފާހަގަކުރާ އިންޑިއާގެ ޖުމްހޫރީ ދުވަހުގެ މުނާސަބަތުގައި ތަހުނިޔާ ވިދާޅުވިކަމަށްޓަކާ ރައީސުލްޖުމްހޫރިއްޔާއަށް ވަނީ ޝުކުރު އަދާކުރައްވާފައެވެ. އަދި އިންޑިއާއާއި ރާއްޖެއާ ދެމެދު އޮތް ޒަމާންވީ ގާތްގުޅުމާ ގުޅޭގޮތުން ރާއްޖޭގެ އިޙްސާސްތައް ފުރިހަމައަށް ދެނެވަޑައިގަންނަވާކަމަށެވެ.
މި ގުޅުން އިތުރަށް ބަދަހިކޮށް ވަރުގަދަކުރުމަށް އިންޑިއާއިން ސާބިތުކަމާއެކު ދެމިތިބޭނެކަމުގެ ޔަޤީންކަން އިންޑިއާގެ ބޮޑުވަޒީރުގެ ޕޯސްޓުގައި ވަނީ ދެއްވާފައެވެ.
Thank you President @MMuizzu for your wishes on India’s Republic Day. I fully share your sentiment regarding the long standing partnership between India and Maldives. We are committed to deepen these bonds of friendship and cooperation. https://t.co/HDb0An1oTy
— Narendra Modi (@narendramodi) January 26, 2025
ރާއްޖެއާއި އިންޑިއާގެ ގުޅުން ހަރުދަނާކުރުމަށް އިންޑިއާގެ ފުރިހަމަ އެއްބާރުލުން ލިބޭނެކަމުގެ ޔަޤީންކަން އެ ޤައުމުގެ ބޮޑުވަޒީރު ދެއްވާފައިވާއިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވެސް ވަނީ އިންޑިއާއާއެކު ގުޅިގެން މަސައްކަތް ކުރުމުގައި ދިވެހިރާއްޖޭން ސާބިތުކަމާއެކު ތިބޭނެކަމަށް ވިދާޅުވެފައެވެ.
އިންޑިއާގެ ޖުމްހޫރީ ދުވަހުގެ މުނާސަބަތުގައި ތަހުނިޔާ ވިދާޅުވެ ކުރެއްވި ޕޯސްޓުގައި ރައީސުލްޖުމްހޫރިއްޔާ ވަނީ އިންޑިއާއާއެކު އޮންނަ ގާތް ރަޙުމަތްތެރިކަމުގެ ގުޅުމަށް ރާއްޖޭން އަބަދުވެސް އިޙްތިރާމް ކުރައްވާނެކަމަށް ވިދާޅުވެފައެވެ. އަދި މި ގާތް ގުޅުމަކީ ދެ ޤައުމުގެ ދެމެދުގައި އޮތް އިޙްތިރާމާއި އެއްގޮތް ވިސްނުންތަކުގެ ސަބަބުން އުފެދިފައިވާ ގުޅުމެއް ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
މިއަހަރު ފާހަގަކުރަމުންދަނީ އިންޑިއާގެ 75 ވަނަ ޖުމްހޫރީ ދުވަހެވެ.