އެޗްއާރުސީއެމްގެ ނައިބު ރައީސަކަށް މުއުމިނާ ޢައްޔަނުކުރައްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ހިއުމަން ރައިޓްސް ކޮމިޝަނުގެ ނައިބު ރައީސްގެ މަޤާމަށް، މ. ޖިއެނާ، މުއުމިނާ ވަޙީދު މިއަދު ޢައްޔަންކުރައްވައިފިއެވެ.

މި މަޤާމަށް މުއުމިނާ ވަޙީދު ޢައްޔަންކުރައްވާފައި ވަނީ ހިއުމަން ރައިޓްސް ކޮމިޝަނުގެ ޤާނޫނުގެ 8 ވަނަ މާއްދާގައިވާ ގޮތުގެމަތީންނެވެ.

އެޗްއާރުސީއެމްގެ ނައިބު ރައީސްގެ މަގާމަށް މުއުމިނާ ވަޙީދު ޢައްޔަންކުރެއްވުމަށް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވެވީ މި މަހުގެ 16 ވަނަ ދުވަހުއެވެ. އަދި އޭނާ އެ މަޤާމަށް އައްޔަންކުރުމަށް ފާސްކޮށްފައިވަނީ 67 މެންބަރުންގެ ވޯޓުންނެވެ.

އެޗްއާރްސީއެމްގެ މެންބަރުކަމަށް މުއުމިނާ ޢައްޔަންކުރެއްވީ 2020 ސެޕްޓެމްބަރު 8 ވަނަ ދުވަހުއެވެ. އޭނާ ވަނީ އޮސްޓްރޭލިއާގެ ޔުނިވާސިޓީ އޮފް ސިޑްނީން ހިއުމަން ރައިޓްސް އެންޑް ޑިމޮކްރަޓައިޒޭޝަންއިން މާސްޓާސް ހާސިލުކުރައްވާފައެވެ. މުއުމިނާ ވަނީ އިކޮނޮމިކް މިނިސްޓްރީގައި ކޮންސަލްޓެންޓެއްގެ މަގާމުވެސް ކުރިން އަދާކުރައްވާފައެވެ.

މީގެ އިތުރުން އެޗްއާރްސީއެމްގެ މެމްބަރަކަށް ވެވަޑައިގެންނެވުމުގެ ކުރިން، އެ ކޮމިޝަންގެ އެސިސްޓެންޓް ރިސާރޗް އޮފިސަރުގެ މަގާމާއި ޕްލޭނިން އޮފިސަރުގެ މަގާމުގެ އިތުރުން ކޯޕަރޭޓް އެފެއާޒް ޑިޕާޓްމެންޓުގެ ޑިރެކްޓަރުގެ މަގާމުވެސް މުއުމިނާ ވަނީ އަދާކުރައްވާފައެވެ.

އެޗްއާރްސީއެމަށް ނައިބު ރައީސަކު އައްޔަންކުރެއްވުމަށް ރައީސުލްޖުމްހޫރިއްޔާ ފޮނުއްވެވީ އެ ކޮމިޝަންގެ ކުރީގެ ނައިބު ރައީސް ޑރ. އަޙްމަދު އަދުހަމް ޢަބްދުﷲ މަޤާމުން އިސްތިއުފާދެއްވުމާ ގުޅިގެންނެވެ.

މޫމިނާގެ އިތުރުން އެޗްއާރުސީއެމްގެ މިވަގުތު4 ބޭފުޅުން ތިއްބަވައެވެ. އެއީ ކޮމިޝަނުގެ ރައީސް މަރްޔަމް މުނާއާއި، މެންބަރު އާމިނަތު ޝިފާއަތު އަބްދުއްރައްޒާގާއި، މެންބަރު ސަމާއު އަހުމަދު ނަޖީބުގެ އިތުރުން، މެންބަރު އިސްމާޢީލް ހަބީބު ޢަބްދުއްރަޙްމާނެވެ.

އެޗްއާރުސީއެމްގެ މެންބަރުކަމުގެ ދައުރަކީ 5 އަހަރު ދުވަހެވެ.