ދަ ޑިމޮކްރެޓްސް ރައީސަކަށް އިމްތިޔާޒް، ނައިބަކަށް ވަޙީދު

ޑިމޮކްރެޓްސް ޕާޓީގެ ލީޑާޝިޕުން ހުސްވެފައިވާ މަޤާމުތަކުގެ ތެރެއިން، އެޕާޓީގެ ރައީސްކަމަށް މާފަންނު އުތުރު ދައިރާގެ ކުރީގެ މެންބަރު އިމްތިޔާޒު ފަހުމީ ހޮވައިފިއެވެ.

ޕާޓީގެ ލީޑާޝިޕުން ޕާޓީގެ ރައީސް އަދި ނައިބު ރައީސް ކަމުގެ މަޤާމު ހުސްވުމާއެކު، އެޕާޓީގެ ނޭޝަނަލް އެސެމްބްލީގެ ބައްދަލުވުމެއް ވަނީ ބާއްވާފައެވެ. މި މަޤާމުތަކަށް ކުރިމަތިލުމަށް ފުރުސަތު ހުޅުވާލުމާއެކު އެ ދެ މަޤާމަށް ކުރިމަތިލީ ދެ ފަރާތަކުން އެކަންޏެވެ. އެގޮތުން ޕާޓީގެ ރައީސްކަމަށް، މާފަންނު އުތުރު ދައިރާގެ ކުރީގެ މެންބަރު އިމްތިޔާޒު ފަހުމީ ކުރިމަތިލެއްވިއިރު، ޕާޓީގެ ނައިބު ރައީސްގެ މަޤާމަށް ކުރިމަތިލެއްވީ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދެވެ.

ޑިމޮކްރެޓްސްގެ ރައީސާއި ނައިބު ރައީސް ހޮވާފައި މިވަނީ، އެ ޕާޓީގެ ރައީސްކަމުގެ މަޤާމުގައި ހުންނެވި ހަސަން ލަތީފް އަދި ނައިބު ރައީސް ކަމުގެ މަޤާމުގައި ހުންނެވި މުހައްމަދު ޝިފާޒް އިސްތިއުފާ ދެއްވައި ޕާޓީ ދޫކޮށް ވަޑައިގަތުމާއި ގުޅިގެންނެވެ. އެ ޕާޓީގެ ބައެއް އިސް މެންބަރުން ޕާޓީ ދޫކޮށް ދިޔަނަމަވެސް ޕާޓީއަށް ކުރިމަގު އެބައޮތްކަމަށް ޑިމޮކްރެޓްސްއިން ވަނީ ބުނެފައެވެ.

މިގޮތުން ދާދި ފަހުން ބޭއްވި ނޫސްވެރިންގެ ބައްދަލުވުމެއްގައި ޕާޓީން ވަނީ އެ ޕާޓީއަށް މެންބަރުން އިތުރު ކުރުމުގެ މަސައްކަތް މުޅި ރާއްޖެއަށް ފުޅާކުރާނެކަން ހާމަކޮށްފައެވެ. އަދި ސިޔާސީ މަސައްކަތުގައި ދެމިތިބޭނެ ކަމަށް އެ ޕާޓީން ވަނީ ބުނެފައެވެ.