ލުބްނާންގެ މުސްލިމުންގެ ނަސްލުހޭދު ކުރުމަށް ޔަހޫދީ ފައުޖުން ހިންގަމުން ދިޔަ ލާއިންސާނީ ޤަތުލުޢާންމުތައް މެދުކަނޑައިލުމަށް އަމަލު ކުރަމުންދާ އެއްބަސްވުން ދެމި އޮންނާނެ ކަމަށް އެމެރިކާއިން ބުނެފި އެވެ.
އެ އެއްބަސްވުން ފެބްރުއަރީ 18 ވަނަ ދުވަހާ ހަމައަަށް ދެމި އޮންނާނެ ކަމަށް އެމެރިކާއިން ބުނެފައި މިވަނީ އެ އެއްބަސްވުމާ ޚިލާފަށް ޔަހޫދީ ފައުޖުގެ ނިރުބަވެރި ސިފައިން ލާއިންސާނީ ޖަރީމާތައް ހިންގަމުން ދަނިކޮށެވެ. ޔަހޫދީން ވަނީ ލުބުނާނުގެ ދެކުނުގެ އަވަށް ތަކަށް އެނބުރިދާން މަސައްކަތް ކުރި ޢާއްމުންނަށް ހަމަލާދީ އެތައް ބަޔަކު މަރާލައިފަ އެވެ.
ޔަހޫދީންގެ ނިރުބަވެރި އަމަލުތަކާ ގުޅިގެން ސުލްޙައިގެ އެއްބަސްވުން ރޫޅުމުގެ ފުރުޞަތު ބޮޑުވެފައިވާ މި ދަނޑިވަޅުގައި އެމެރިކާއިން ބުނީ، ފެބުރުވަރީ 18ވަނަ ދުވަހާ ހަމައަށް އެއްބަސްވުން ދެމެހެއްޓުމަށް ދެ ފަރާތުން ވެސް އެއްބަސްވެފައިވާ ކަމުގައެވެ. "ލުބްނާނާއި އިސްރާއީލާ ދެމެދު އެއްބަސްވުމުގައިވާ ގޮތަށް، އަދި އެމެރިކާއިން ބަލަމުންދާ ގޮތަށް، 2025 ފެބުރުވަރީ 18ވަނަ ދުވަހާ ޖެހެންދެން އެއްބަސްވުމަށް އަމަލު ކުރަމުންދާނެ،" އެމެރިކާގެ ރިޔާސީ ގަނޑުވަރު، ވައިޓް ހައުސުން ނެރުނު ބަޔާނެއްގައި ބުންޏެވެ.
ލުބްނާންގެ މުޖާހިދުންގެ ޖަމާޢަތް، ޙިޒްބުاللهއާއި ޔަހޫދީންނާ ދެމެދު އަމަލު ކުރަމުންދާ އެއްބަސްވުމުގެ ދަށުން، ލުބްނާންގެ ދެކުނުގެ ރަށްތަކަށް އަރައިގަނެފައިވާ ޔަހޫދީ ސިފައިން އެ ސަރަޙައްދުތައް ދޫކޮށް ފައިބަން ޖެހޭނެއެވެ. އަދި، އެ ސަރަހައްދުތަކުގައި ދިރިއުޅޭ ރައްޔިތުންނަށް އެނބުރި އެ މީހުން ވަޒަނަށް ދަތުރު ކުރުމުގެ ފުރުޞަތު ދޭން ޖެހޭނެއެވެ.
ނަމަވެސް، ޔަހޫދީ ސިފައިން ދަނީ އެ ސަރަހައްދުތަކުން ފޭބުމަށް ދެކޮޅު ހަދަމުންނެވެ. އަދި، އެ ސަރަޙައްދުގެ ރައްޔިތުންނަށް އެނބުރި ގެދޮރަށް ދަތުރު ކުރުމަށް ހުރަސް އަޅަމުންނެވެ. ޔަހޫދީންގެ އަމުރާ ޚިލާފަށް ގެދޮރަށް ދިޔުމަށް މަސައްކަތް ކުރި މީހުންނަށް އަމާޒުކޮށް ޔަހޫދީ ފައުޖުން ވަނީ ނިރުބަވެރި ޙަމަލާތަކެއް ވެސް ދީފައެވެ. އެ ޙަމަލާތަކުގައި 22 މީހުން ޝަހީދު ކޮށްލާފައިވާ ކަން ލުބްނާންގެ އިދާރާތަކުން ހާމަކުރިއެވެ.
އެއްބަސްވުމާ ޚިލާފަށް ލުބްނާންގެ ދެކުނުގެ ސަރަހައްދުތަކަށް ޔަހޫދީ ފައުޖުން ދީފައިވާ ނިރުބަވެރި ޙަމަލާތަކުގައި ޝަހީދު ކޮށްލާފައިވާ މީހުންގެ ތެރޭގައި ލުބްނާންގެ އަސްކަރިއްޔާގެ ސިފައިންގެ މީހަކު ވެސް ހިމެނެއެވެ. އެ ސަރަޙައްދުތަކުން ފޭބުމަށް ޔަހޫދީ ފައުޖުން ދެކޮޅު ހަދައި، ލަސްކުރަމުންދާތީ ލުބްނާންގެ އަސްކަރިއްޔާއިން ވެސް ވަނީ އެ ކަމާ މެދު ކަންބޮޑުވުން ފާޅުކޮށްފައެވެ.
ޙިޒްބުاللهއާއި ޔަހޫދީ ފައުޖާ ދެމެދު ޙަމަލާ ބަދަލު ކުރަން ފަށާފައި ވަނީ، ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރުމަށް ޔަހޫދީން ލާއިންސާނީ ޖަރީމާތަކެއް ހިންގަން ފެށުމާ ގުޅިގެންނެވެ. ޙިޒްބުاللهގެ ޙަމަލާތަކުގެ އަމާޒަކީ ފަލަސްޠީނުގެ މިނިވަން ކަަމަށް ޖިހާދު ކުރަމުންދާ މުޖާހިދުންނާއި، ފަލަސްޠީނުގެ ރައްޔިތުންނަށް ވާގިވެރިވުމެވެ. އަދި، ޣައްޒާ ޢުދުވާން މެދުކަނޑައިލުމަށް ޔަހޫދީންނަށް މަޖުބޫރު ކުރުވުމެވެ.