ޗައިނާއާއި އިންޑިއާއާ ދެމެދު ޚިޔާލާއި ވިސްނުން އެއްގޮތްވާ ކަންކަމުގައި އެއްގަލަކަށް އަރައި، ދެ ޤައުމުން ގުޅިގެން މަސައްކަތް ކުރަން ޖެހޭ ކަމުގައި ޗައިނާގެ ޚާރިޖީ ވަޒީރު ވޮންގ ޔީ ވިދާޅުވެއްޖެއެވެ. އޭނާ މި މޭރުމުން ވިދާޅުވެފައި ވަނީ، އިންޑިއާގެ ފޮރިން ސެކްރެޓަރީ ވިކްރަމް މިސްރީއާ އެކު ޗައިނާގެ ވެރިރަށް ބެއިޖިންގގައި ބޭއްވެވި ބައްދަލުވުމެއްގައި ވާހަކަފުޅު ދައްކަވަމުންނެވެ.
މިއީ، ހުސްވި އަހަރުގެ އޮކްޓޫބަރު މަހު، ދެ ޤައުމުގެ ސަރަޙައްދީ ރޮނގު ކައިރީގައި އުފެދިފައިވާ ނުތަނަވަސް ކަން މައިތިރި ކުރުމަށް އެއްބަސްވުމަކަށް އަމަލު ކުރަން ފެށި ފަހުން ދެ ޤައުމުގެ އިސްވެރިންގެ މެދުގައި ބާއްވާފައިވާ މި ފަދަ ފުރަތަމަ ބައްދަލުވުމެވެ. ދެ ޤައުމުގެ ދެމެދުގައި އެންމެ ފަހުން ނުތަނަވަސް ކަން ބޮޑުވެ، ގުޅުން ގޯސްވެފައި ވަނީ 2020ވަނަ އަހަރު ދެ ޤައުމުގެ ސަރަޙައްދީ ރޮނގު ބަލަހައްޓާ ސިފައިންގެ ދެމެދުގައި ހިނގި ކުރިމަތިލުންތަކަކާ ގުޅިގެންނެވެ.
މިސްރީއާ އެކު ބޭއްވެވި ބައްދަލުވުމުގައި ވޮންގ ވިދާޅުވީ، ދޭދޭ ގުޅުންތައް ހަރުދަނާ ކުރުމުގެ ގޮތުން ދެ ޤައުމުގެ މެދުގައި އެއްބާރުލުން ދޭން ޖެހޭ ކަމަށާއި، ޚިޔާލާއި ވިސްނުން އެއްގޮތްވާ ކަންތައްތަކުގައި ގުޅިގެން މަސައްކަތް ކުރުމަށް އިސްކަން ދޭން ޖެހޭ ކަމުގައެވެ. އަދި، ޝައްކު ކުރުމާއި، އެއް ޤައުމުން އަނެއް ޤައުމު އެކަހެރި ކޮށްލުމުގެ ގޮތުން ހިންގަމުންދާ އަމަލުތަކުން އެއްކިބާވާން ޖެހޭ ކަމުގައި ވެސް ވޮންގ ވިދާޅުވިއެވެ.
ފަހަކަށް އައިސް ދެ ޤައުމުގެ ދެމެދުގައި އޮތް ގުޅުންތައް ބަދަހިވަމުން އަންނަ މަންޒަރު ފެންނަމުންދާ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ. މި ގޮތުން، ދެ ޤައުމުގެ އިސް އޮފިޝަލުންގެ މެދުގައި ބާއްވަމުންދާ ބައްދަލުވުންތައް ވެސް ވަނީ އިތުރުވެފައެވެ. ހުސްވި އަހަރުގެ އޮކްޓޫބަރު މަހު ޗައިނާގެ ރައީސް ޝީ ޖިންޕިންގއާއި އިންޑިއާގެ ބޮޑުވަޒީރު ނަރެންދްރަ މޯދީ ބައްދަލު ކުރައްވައި، ދެ ޤައުމުގެ ދެމެދުގައި އޮތް ދޭދޭ ގުޅުން އިތުރަށް ހަރުދަނާ ކުރުމާ ގުޅޭ ގޮތުން މަޝްވަރާ ކުރައްވާފައިވެއެވެ.