ރައީސްގެ ރައްދު: ކޮންމެ ވަޢުދެއްވަނީ ޕްލޭނަކާއެކު، ކުރިއަށްގެންދާނެ ގޮތް ދެނެގަނެގެން

ޕްލޭނެއް ނެތި ވަޢުދުތަކެއް ވެވަޑައިގަންނަވަމުންދާކަމަށް ކުރާ ތުހުމަތުތަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްދުދެއްވައިފިއެވެ. ރައީސުލްޖުމްހޫރިއްޔާ ވިދާޅުވީ އެމަނިކުފާނު ވެވަޑައިގެންނެވި ކޮންމެ ވަޢުދަކީ، އެކަމެއް ފުއްދާނެގޮތުގެ ޕްލޭން ކުރެވި، ކުރިއަށްދާނެގޮތް ދެނެގަނެގެން ވެވަޑައިގަންނަވާ ވަޢުދުތަކެއްކަމަށާއި، އެކަންކަން ފުރިހަމަކުރާނެ ތަރުތީބު ސަރުކާރުގައި އެބައޮތްކަމަށް ރައީސް ވިދާޅުވިއެވެ.

މުރައިދޫ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، އެރަށުގެ ތަރައްޤީއަށް ވަޢުދުތަކެއް ވެވަޑައިގެންފައިވާކަން ފާހަގަކުރައްވައި މިދަތުރުފުޅުގެ އެންމެ މުހިންމު ބޭނުމަކީ ރައްޔިތުންގެ ހާލަތު ދެނެގަނެ، ވެވަޑައިގެންފައިވާ ވަޢުދުތައް ފުއްދުމުގައި ބާރު ސްޕީޑުގައި ކުރިއަށް ގެންދާނެގޮތް ރައްޔިތުންނަށް ހާމަކޮށްދެއްވުންކަމަށް ވިދާޅުވިއެވެ. ރައްޔިތުން އެދޭ ކަންކަން ކޮށްދެއްވާނެކަމުގެ ޔަޤީންކަން ދެއްވަމުންގެންދަވާތީ، ބައެއް ފަރާތްތަކުން އެއީ ޕްލޭނެއް ނެތި ވާ ވަޢުދެއްކަމަށް ކުރާ ތުހުމަތުތަކަށް ރައްދުދެއްވަމުން ރައީސް ވިދާޅުވީ ސަރުކާރުގެ ހުރިހާ ކަމެއްވެސް ތަރުތީބުކުރެވިފައިވާކަމަށެވެ. މިދިޔަ އަހަރު މަޝްރޫޢުތައް ކުރިއަށް ނުގެންދެވުނީ އިޤްތިޞާދީ ކަންކަމަށް އިސްކަންދިނުމާއި ބަޖެޓުގެ ތާށިކަން އޮތުމުންކަމަށް ވިދާޅުވާ ވާހަކަފުޅު ތަކުރާރުކުރައްވާ ރައީސް ވިދާޅުވީ މިހާރު ދައްކަވާ ވާހަކަފުޅުތަކަކީ ކަންކަން ކުރެވޭނެގޮތް މަޝްވަރާކުރައްވައި، ކުރެވޭނެ ގޮތް ކަނޑައަޅުއްވައިގެން އަދި ތަފްސީލުކޮށް ކުރެވޭނެ ގޮތް ހަމަޖެހިގެން ދައްކަވާ ވާހަކަފުޅުތަކެއްކަމަށެވެ.

ރައީސް ވިދާޅުވީ ވަރަށް ގިނަ މަޝްރޫޢުތައް ރަށްރަށުގައި ފެށި ހުއްޓިފައިވާކަމަށާއި މަޝްރޫޢުތައް ހުއްޓިފައި ހުރީ ފައިސާ ނުލިބުންފަދަ ކަންކަމުގައިކަަމަށާއި، އެ ދަތިތައް ހައްލުވެ މިހާރު ކުރިއަށްދާނެ މަގުތައް ހޯދާފައިވާކަމަށެވެ.

"ދެން ފެނިގެންދާނީ އަޅުގަނޑުމެން ފާސްކުރި ބަޖެޓުގެ ތެރެއިން މަޝްރޫޢުތައް ފަށައިގަންނަތަން. ހުއްޓިފައިވާ މަޝްރޫޢުތަކާ އަލަށް ފަށާ މަޝްރޫޢުތައް ހިނގައިގަންނަތަން. މިއަހަރާ އަންނަ އަހަރު ފެންނާނީ މި ދެބާވަތުގެ މަޝްރޫޢުތައް ކުރިއަށްދާތަން. އަޅުގަނޑު ރައްޔިތުންނާ ސަލާމްކުރާއިރު ހުށައަޅަނީ މިފަދަ ކަންކަން ކުރުމަށް އެދިފައި. ރައްޔިތުންގެ އަޑު އެހީމަ އެނގޭ އެކަންކަމުގައި ހުރި ހައްސާސްކަން، މުހިންމުކަން". ރައީސުލްޖުމްހޫރިއްޔާ ވިދާޅުވިއެވެ.

ރައީސް ވިދާޅުވީ ރައްޔިތުން އެންމެ އެދޭކަންކަމަށް އިސްކަންދެއްވައިގެން ކަންކަންކުރާއިރު މެދުރާސްތާއާއި ދުރުރާސްތާގެ ޕްލޭނާއެކު ކުރިއަށްދާކަމަށާއި، ކޮންމެ ކަމެއްވެސް ކުރައްވަނީ ޕްލޭނަކާއެކުކަަމަށެވެ.

އެގޮތުން މުރައިދޫއަށް އެންމެ މުހިންމީ ބަނދަރުގެ މައްސަލައަށް ރަނގަޅު ހައްލެއް އައުންކަމަށާއި، އެކަން ހައްލުކުރަން ބޭނުންވާގޮތް އިތުރަށް ސާފުވަނީ ކައުންސިލާ ރައްޔިތުންނާ ބައްދަލުވުމުންކަމަށެވެ. އެހެންކަމުން ބަނދަރުގެ މައްސަލައަށް ދާއިމީ ހައްލެއް ގެނެސްދެއްވާނެކަމުގެ ޔަޤީންކަން ރައީސް ދެއްވިއެވެ.

"އިރާދަކުރެއްވިއްޔ ރައްޔިތުން އެދޭގޮތަށް ބޭރު ތޮށީގެ މައްސަލަ ހައްލުކުރާނެ. އެމްޓީސީސީ އެއޮތީ މޮބިލައިޒްކުރެވިފައި. އެމްޓީސީސީ މިރަށުން ފައިބާނީ އެ މައްސަލަ ހައްލުކޮށްފައި". ރައީސުލްޖުމްހޫރިއްޔާ ވިދާޅުވިއެވެ.

ރައީސް ވިދާޅުވީ ބަނދަރުގެ މައްސަލަ ހައްލުކުރެއްވުމަށްފަހު، އެރަށުގެ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތް ފުރިހަމަކޮށްދެއްވާނެކަމަށެވެ. އަދި ސިއްޙީ ދާއިރާގައި ހުރި މައްސަލަތައް ހައްލުކޮށްދެއްވާނެކަމުގެ ޔަޤީންކަން ދެއްވަމުން ރައީސް ވިދާޅުވީ ރަށުގެ އާބާދީއާ އެއްވަރަށް ސިއްޙީ ޚިދުމަތުގެ ފެންވަރު މަތިކުރައްވާނެކަމަށެވެ.

ރައީސް ވިދާޅުވީ، ކޮންމެ ރަށެއްގެ ރައްޔިތުން ބޭނުންވާ އަސާސީ ޚިދުމަތާއި އިންސާނީ ވަސީލަތްތައްވެސް ޤާއިމްކޮށްދެއްވާނެކަމަށެވެ. ތަޢުލީމީ ދާއިރާވެސް ތަރައްޤީކުރައްވާނެ ޕްލޭނެއް ހެދުމުގެ މަސައްކަތްކުރިއަށްދާކަމަށާއި، ކޮންމެ ސްކޫލަކަށްވެސް ކްލާސްރޫމާއި ލެބޯޓްރީއާއި މަލްޓިޕާޕަސް ހޯލުފަދަ ކަންކަން ބޭނުންވާކަމަށާއި، އެކަންކުރުމަށް ތަޢުލީމީ ވުޒާރާއި ސްކޫލްތައް ގުޅިގެން އިސްކަންދޭ ތަރުތީބުގެ ޕްލޭން ހަދާ ނިންމަވާނެކަމަށް ރައީސް ވިދާޅުވިއެވެ. އަދި އެ ސިޔާސަތުގެ ތެރެއިން މުރައިދޫގެ ސްކޫލަށް ބޭނުންވާ ވަސީލަތް ޤާއިމްކުރައްވާނެކަމަށްވެސް ރައީސުލްޖުމްހޫރިއްޔާ ވިދާޅުވިއެވެ. އަދި އެރަށުގައި ކުޅިވަރުގެ ވަސީލަތްތައްވެސް ޤާއިމްކޮށްދެއްވާނެކަމަށާއި، އެގޮތުން ފުޓުބޯޅަ ދަނޑާއި ވޮލީ ކޯޓާއި އެނޫންވެސް ކުޅިވަރުގެ ވަސީލަތްތައް ތަރުތީބެއްގެތެރެއިން ކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.