މިފްކޯއިން 4.6 މިލިޔަން ޑޮލަރު މާރުކޮށްފި؛ ސަރުކާރުން ދެނީ ދެމެހެއްޓެނިވި ނިޒާމެއްގެ ޔަޤީންކަން

މަސްވެރިންނަށް ފައިސާ ދިނުމުގައި މިހާރު ޤާއިމްކޮށްފައިވަނީ ދެމެހެއްޓެނިވި ނިޒާމެއް ކަމަށާއި، މިފްކޯ މެދުވެރިކޮށް ބޭރު ފައިސާ މިހާރު ބޭންކިންގ ނިޒާމުގެ ތެރެއަށް ވައްދާ ކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.

މަސްވެރިންނަށް 48 ގަޑިއިރުތެރޭ ފައިސާ ދިނުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ރިޔާސީ ވަޢުދެކެވެ. މި ވަޢުދާއި އެއްގޮތަށް، މަސްވެރިންނަށް ފައިސާ ދޫކުރަން ފަށާފައިވާއިރު މިކަން ދެމެހެއްޓެނިވި ގޮތެއްގައި ކުރިއަށް ގެންދިއުމަށް އިންތިޒާމުތަކެއް ހަމަޖައްސާފައިވާ ކަމަށް ސަރުކާރުން ވަނީ ވިދާޅުވެފައެވެ.

މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހުމަދު ޝިޔާމް ވިދާޅުވީ، މަސްވެރިންނަށް ފައިސާ ދިނުމުގެ ކަންކަން ރައީސުލްޖުމްހޫރިއްޔާގެ ވަޢުދާއި އެއްގޮތަށް ކުރިއަށްދާއިރު މިކަން ދެމެެހެއްޓެނިވި ގޮތެއްގައި ކުރުމަށް، ސަރުކާރުން ރަނގަޅު އިންތިޒާމުތަކެއް ވަނީ ހަމަޖައްސާފައި ކަމަށެވެ.

" މިފްކޯއަކީ ދިވެހި ރާއްޖެއަށް އެންމެ ގިނަ ބޭރު ފައިސާ ވައްދާ ކުންފުނިތަކުން ކުންފުންޏެއް. މަސްވެރިކަން ރަނގަޅުވީމަ ބޭރުފައިސާ ވަންނަވަރު އިންތިހާއަށް ރަނގަޅު އެބަވޭ. މިފްކޯގެ ކަންކަން ހަރުދަނާ ކުރުމަށް ރައީސުލްޖުމްހޫރިއްޔާ އަދި އަޅުގަނޑުވެސް ވަރަށް ގާތުން ބަލަމުން މިދަނީ. މީގެ ތެރެއިން މިފްކޯއަށް ވަންނަ ބޭރުފައިސާ އާންމުންނަށްވެސް ލިބޭނެ އިންތިޒާމެއް އެބައޮތް ހަމަޖެހިފައި. އެއީ ބީއެމްއެލްއަށް މި ފައިސާ މާރުވާނެ މެކޭނިޒަމްތަކެއް މިހާރު އެބައޮތް. " މަސްވެރިކަމާއި ބެހޭ ވަޒީރު ޝިޔާމް ވިދާޅުވިއެވެ.

މިފްކޯއަށް މެދުވެރިކޮށް ބޭރުފައިސާ ބޭންކިން ނިޒާމުގެ ތެރެއަށް ވައްދާ ގޮތަށް ހަމަޖެހިގެން ދިޔައީ، މިފްކޯއާއި، ބީއެމްއެލް އަދި މާލީ ވުޒާރާ ދެމެދު ވެވުނު އެއްބަސްވުމުގެ ތެރެއިންނެވެ. މީގެ ކުރީން މަސް އެކްސްޕޯޓުކޮށްގެން މިފްކޯއަށް ލިބޭ ބޭރުފައިސާ މާރުކުރަމުން ދިޔައީ ޕެރެލަލް މާކެޓުގައި ނަމަވެސް، މިހާރު އެފައިސާ ސީދާ ވައްދަމުން ދަނީ ބޭންކަށެވެ.

ވަޒީރު ވިދާޅުވީ، މިކަމުގެ ސަބަބުން ބޭންކް އޮފް މޯލްޑިވްސް އަށާއި، އެ ބޭންކުގެ ކަސްޓަމަރުންނަށް އަދި މަސްވެރިންނަށްވެސް ފައިދާ ވެގެންދާ ކަމަށެވެ. މިހާރު ހަމަޖެހިފައިވާ އިންތިޒާމުގެ ދަށުން، މަސްވެރިންނަށް 48 ގަޑިއިރު ތެރޭ ބޭންކު މެދުވެރިކޮށް ފައިސާ ޖަމަޢުކޮށްދެއެވެ. އަދި މިކަމަށް ބޭނުންވާ ފައިސާ މިފްކޯއިން ދެނީ ޑޮލަރުންނެވެ.

މިކަމާއި ގުޅޭގޮތުން މިފްކޯއިން ޕީއެސްއެމްއާއި ހިއްސާ ކުރި ތަފާސްހިސާބުތަކަށް ބަލާއިރު، 48 ގަޑިއިރު މަސްވެރިންނަށް ފައިސާ ދޫކުރަން ފެށި ފަހުން މަސް އެކްސްޕޯޓުކޮށްގެން 4.6 މިލިޔަން ޑޮލަރު މިފްކޯއިން ވަނީ ބޭންކަށް މާރުކޮށްފައެވެ.

މިފްކޯއިން ލަފާކުރާގޮތުގައި، އަހަރުގެ ތެރޭގައި އެވްރެޖްކޮށް 300 މެޓްރިކް ޓަނުގެ މަސް އެވްރޭޖްކޮށް ކިރުވަމުންދާނަމަ 50 މިލިޔަން ޑޮލަރު ލިބޭނެއެވެ. އަދި މިއީ މިފްކޯގެ އަމާޒަށްވާއިރު ސަރުކާރުން ވަނީ މިއަދަދު 90 މިލިޔަން ޑޮލަރަށް މަތި ކުރުމަށް އަމާޒު ހިފާފައެވެ. އެގޮތުން ސްޓޯރޭޖް ކެޕޭސިޓީ އިތުރުކޮށް ރާއްޖެއިން ބޭރުކުރެވޭ މަހުގެ މިންވަރު އިތުރުކުރުމަށް ސަރުކާރުން ދަނީ މަސައްކަތް ކުރަމުންނެވެ.