މީސްމީޑިޔާގައި ޙިއްޞާ ކުރާ މަޢުލޫމާތަށް ބާރު ފޯރުވުމަށް ޤާނޫނެއް ހަދަން ޕާކިސްތާނުގެ ސަރުކާރުން ހުށަހެޅި ބިލެއް ޕާލަމެންޓުން ފާސްކުރުމުން އެކަމާ ދެކޮޅަށް އެ ޤައުމުގެ އެތައް ސަތޭކަ ނޫސްވެރިންނެއް މުޒާހަރާ ކޮށްފިއެވެ.
ޕާކިސްތާނުގެ ސަރުކާރުން ހުށަހަޅާފައިވާ ބިލު ގާނޫނަކަށް ވުމުން އެ ޤާނޫނުގެ ދަށުން، މީސްމީޑިޔާގައި ޙިއްޞާ ކުރާ މަޢުލޫމާތުތައް ބަލައި ފިޔަވަޅު އެޅުމަށް ޚާއްޞަ އިދާރާއެއް ޤާއިމު ކުރާނެއެވެ. މީސްމީޑިޔާގައި ހަޤީޤަތާ ޚިލާފު މަޢުލޫމާތު ޙިއްޞާ ކޮށްފި ނަމަ އަދަބެއްގެ ގޮތުގައި ތިން އަހަރުގެ ޖަލު ހުކުމެއް އެ ބިލުގައި ވަނީ ކަނޑައަޅައިފައެވެ. އަދި 7,200 އެމެރިކާ ޑޮލަރާ ހަމައަށް ޖޫރިމަނާ ކުރުމަކީ ވެސް އެ ބިލުގަައި އޮތް އަދަބެކެވެ. މިދިޔަ ހަފުތާގެ ތެރޭގައި ޕާކިސްތާނުގެ ޤާނޫނު ހަދާ މަޖިލީހުން ވަނީ އެ ބިލު ފާސް ކުރި ނަމަވެސް އަދި އެ ޤައުމުގެ ރައީސް އެ ބިލު ތަސްދީޤު ކުރައްވައިފައެއް ނުވެއެވެ.
އެ ބިލާ ދެކޮޅަށް އަޑުއުފުލަމުންދާ ޕާކިސްތާނުގެ ނޫސްވެރިން ބުނަމުން ދަނީ އެ ބިލުން ހަދާ ޤާނޫނުގެ ބޭނުމަކީ ނޫސްވެރިކަމުގެ މިނިވަންކަަމަށް ހުރަސްއެޅުމާއި އިންޓަނެޓު މެދުވެރިކޮށް ޚަބަރުފަތުރާ ތަފާތު ވަޞީލަތްތަކަށް ބާރު ފޯރުވުން ކަމަށެވެ. ނަމަވެސް ޕާކިސްތާނުގެ ސަރުކާރުން ބުނަމުންދަނީ އެ ޤާނޫނުގެ ބޭނުމަކީ މީސްމީޑިޔާގައި ހާޤީޤަތާ ޚިލާފު ދޮގު މަޢުލޫމާތު ފެތުރުން ހުއްޓުވުން ކަމަށެވެ.
އެ ޤާނޫނާ ދެކޮޅަށް ޕާކިސްތާން ފެޑެރަލް ޔޫނިއަން އޮފް ޖާނަލިސްޓްސް (ޕީއެފްޔޫޖޭ)ން އިންތިޒާމް ކޮށް އެ ޤައުމުގެ ވެރިކަންކުރާ އިސްލާމްއާބާދާއި ކަރާޗީއާއި ލާހޯރުގައި ވަނީ އެއްވުންތައް ބާއްވާފައެެވެ. ސަރުކާރުން ހުށަހަޅާފައިވާ ބިލު އަނބުރާ ގެންދިއުމަށް މުޒާހަރާގެ ބައިވެރިން ދަނީ ގޮވައިލަމުންނެވެ. އިސްލާމްއާބާދުގައި ކުރިއަށް ދިއަ މުޒާހަރާގައި ވާހަކަދައްކަވަމުން ޕީއެފްޔޫޖޭގެ ރައީސް އަފްޒަލް ބަޓް ވިދާޅުވީ އެ ޤާނޫނަކީ ނޫސްވެރިކަމުގެ މިނިވަންކަމާ ދެކޮޅަށް ދެވޭ ސީދާ ޙަމަލާއެއް ކަމަށެވެ. އޭނާ ވިދާޅުވީ އެ ބިލު އަނބުރާ ގެންދިއުމުން ނޫނީ މުޒާހަރާތައް ހުއްޓާ ނުލާނެ ކަމަށެވެ.
މީގެ ކުރިން ޕާކިސްތާނުގެ ޓެލެކޮމް އިދާރާތަކުން ވަނީ އެ ޤައުމުގެ އިންޓަނެޓު ޚިދުމަތް ލިބޭ ދުވެލި ވެސް މަޑު ކޮށްފައެވެ. އެ ޤައުމުގައި މީސްމީޑިޔާ ވަޞީލަތެއް ކަމަށްވާ އެކްސްއަށް ނުވަދެވޭ ގޮތަށް މަނާ ކޮށްފަ އޮންނަތާ އަހަރަކަށް ވުރެ ގިނަ ދުވަަަސް ވަނީ ވެފައެވެ.
ނޫސްވެރިކަމުގެ މިނިވަންކަމުގެ ދިފާޢުގައި ވަކާލާތުކުރާ ޖަމްޢިއްޔާއެއް ކަމަށްވާ ރިޕޯޓަރސް ވިތައުޓް ބޯޑަރސުން 2024ވަނަ އަހަރު ޕާކިސްތާނު ހިމަނާފައި ވަނީ ނޫސްވެރިކަމުގެ މިނިވަންކަން ގިންތިކުރާ ލިސްޓުގެ 152ވަނަ ދަރަޖައިގައެވެ. އެއީ ޖުމްލަ 180 ޤައުމުގެ ތެރެެއިންނެވެ. އެ ޖަމްޢިއްޔާއިން ވަނީ ޕާކިސްތާނަކީ ނޫސްވެރިން މަސައްކަތްކުރަން އެންމެ ނުރައްކާތެރި އެއް ޤައުމު ކަމަށް ބުނެފައެވެ.