ބޭނުންވަނީ މަޝްރޫޢުތައް އަވަހަށް ކުރިއަށް ގެންގޮސް ނަތީޖާ ނެރެން: ރައީސް

ބޭނުންފުޅުވަނީ އަވަހަށް މަޝްރޫޢުތައް ކުރިއަށްގެންގޮސް ނަތީޖާ ނެރެންކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ހއ. މާރަންދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ރިޔާސީ އިންތިޚާބުގައި މާރަންދުއަށް ވެވަޑައިގެންނެވި ވަޢުދުތައް ހަނދާން އެބަހުރިކަމަށާއި، މިއަހަރު އެ ހުރިހާކަމަކަށް އަމަލީ ސިފަ ގެނައުމަކީ އެމަނިކުފާނުގެ އަމާޒުކަމަށެވެ.

ރައީސް ވަނީ ކުރިން ފަށާފައިވާ މަޝްރޫޢުތަކާއި ސޮއިކޮށްފައިވާ މަޝްރޫޢުތަކެއް މާރަންދޫގައިވެސް ކުރިއަށް ނުގޮސް ހުރިކަން ފާހަގަކުރައްވާ އެކަމަށް މިދިޔަ އަހަރުގެ ބަޖެޓުގައި ފައިސާ ކަނޑައަޅާފައި ނެތްކަމަށް ވިދާޅުވެފައެވެ. އެހެންކަމުން އެކަން މިދިޔަ އަހަރު ނުވިނަމަވެސް، މިއަހަރު އެމަޝްރޫޢުތައް ކުރިއަށް ގެންދިއުމަށް މިއަހަރުގެ ބަޖެޓުގައި ފައިސާ ކަނޑައަޅާފައިވަކަމަށް ރައީސް ވިދާޅުވިއެވެ.

އެގޮތުން މާރަންދޫގައި ސޮއިކޮށްފައިވާ ބަނދަރުގެ މަޝްރޫޢު ކުރިއަށްގެންގޮސް މައްސަލަ ހައްލުކޮށްދޭނެކަމުގެ ޔަޤީންކަން ރައީސް ދެއްވިއެވެ. އަދި ސްކޫލަށް ދިމާވެފައިވާ ޖާގައިގެ ދަތިކަމަށްވެސް ހައްލު ގެނެސްދެއްވާނެކަމަށް ވިދާޅުވިއެވެ. މާރަންދޫ ސްކޫލްގައި ކްލާސް ރޫމް ޢިމާރާތްކުރަން ހަވާލުކޮށްފައިވަނީ އެއްފަހަރާ އެތައް މަޝްރޫޢުތަކެއް ހަވާލުކޮށްފައިވާ ކުންފުންޏަކާކަމަށާއި، އެހެންކަމުން އެކަން ކުރިއަށް ނުގޮސް އޮތްނަމަވެސް، މިހާރު އެމަޝްރޫޢުތައް ކުރިއަށް ގެންދެވޭނެ ގޮތް ހޯދާފައިވާކަމަށް ރައީސް ވިދާޅުވިއެވެ.

"މިހާރު ހަވާލުކޮށްފައިވާ ކުންފުނިން ކުރިއަށް ނުގެންގޮސްފިނަމަ ޓަރމިނޭޓްކޮށް، ސަރުކާރުގެ ތެރެއިން އެހެން ގޮތްތަކެއް ހޯދައި އެހެން ބަޔަކާ ހަވާލުކުރާނަން. އިރާދަކުރެއްވިއްޔާ އެ މަޝްރޫޢު ކުރިއަށް ގެންދެވޭނެ" ރައީސުލްޖުމްހޫރިއްޔާ ވިދާޅުވިއެވެ.

ރައީސް ވިދާޅުވީ ކުޅިވަރުގެ ވަސީލަތްތައްވެސް މާރަންދޫގައި ތަރައްޤީކޮށްދެއްވާނެކަމަށާއި، އެގޮތުން އައު ފުޓްބޯޅަ ދަނޑެއް ތަރައްޤީކޮށްދެއްވާނެކަމަށެވެ. މާރަންދޫ ސިއްޙީ މަރުކަޒުން މިހާރު 16 ގަޑިއިރު ޚިދުމަތް ދިންނަމަވެސް މުވައްޒަފުންގެ ދަތިކަން އޮތުމުން އެކަމަށް ހައްލު ގެންނަވައި، ލެބޯރެޓަރީގެ ޚިދުމަތް މިއަހަރު ފައްޓަވާނެކަމަށްވެސް ރައީސް ވިދާޅުވިއެވެ.

އެހެންކަމުން ކުރިއަށް އޮތް ދުވަސްތަކުގައި ފެންނާނީ މައްސަލަތައް ހައްލުކޮށް އަމަލީގޮތުން ކުރިއަށްދާނެ ދުވަސްތަކެއްކަމުގެ އުފާވެރި ޚަބަރު ރައީސް ދެއްވިއެވެ.

ރައީސް ވިދާޅުވީ، އާރުޓީއެލް ފެރީގެ ޚިދުމަތް ޝެޑިއުލެއްގެ ތެރެއިން މާރަންދޫއަށް ކުރުމަށް ހަމަޖައްސަވާފައިވާކަމަށެވެ. އަދި 21 ރަށެއްގައި ކުނި މެނޭޖުކުރުމުގެ މަސައްކަތް ކުރިއަށް ގެންދިއުމަށް ކުރީ ސަރުކާރުން ކުންފުންޏަކާ ހަވާލުކޮށް އެޑްވާންސް ފައިސާވެސް ދީފައިކަމަށާއި، ނަމަވެސް އެ ކުންފުނިން އެ މަސައްކަތް ކުރިއަށް ގެންގޮސްފައިނުވާކަމަށެވެ. ވުމާއެކު އެ ދަތިތައް ފިލުވައި ކުރިއަށް ގެންދެވޭނެ ގޮތް ހޯދާފައިވާކަމަށާއި، މާރަންދޫ ހިމެނޭހެން އެ ހުރިހާ ރަށެއްގައި އެ މަޝްރޫޢު ކުރިއަށްގެންދާނެ ގޮތް މިހާރު ހޯދާފައިވާކަމަށް ރައީސް ވިދާޅުވިއެވެ.

ރައީސް ވިދާޅުވީ، އެމަނިކުފާނު ބޭނުންފުޅުވަނީ މަޝްރޫޢުތައް އަވަހަށް ކުރިއަށްގެންގޮސް ނަތީޖާ ނެރެންކަމަށެވެ. ވަޒީރުންނާއެކު ރަށްރަށަށް ވަޑައިގަންނަވަނީ ސީރިއަސް މަސައްކަތްތަކެއް ކުރެއްވުމަށްކަމަށްވެސް ރައީސް ވިދާޅުވިއެވެ.

"އަޅުގަނޑު ބޭނުންވަނީ މާލޭގައި އަރާމުގައި ތިބުމުގެ ބަދަލުގައި ކަމާއިގުޅުންހުރި ވަޒީރުން އަޅުގަނޑާއެކީ އައިސް ކައުންސިލާ ޒިންމާދާރު ފަރާތްތަކާއެކު މަޝްވަރާކޮށް، ވީހާވެސް އަވަހަށް ކުރިއަށްދެވޭނެ ގޮތްތަކެއް ހޯދުން." ރައީސުލްޖުމްހޫރިއްޔާ ވިދާޅުވިއެވެ.

ރައީސް ވިދާޅުވީ ސީރިއަސް ވަގުތުތަކެއް ހޭދަކުރަނީ މައްސަލަތަކަށް ހައްލު ގެނައުމަށްކަމަށާއި، އެގޮތުން މާރަންދޫގެ ތަރައްޤީއަށް މަސައްކަތްކޮށް، ދެ އަހަރު ދުވަހުގެ ތެރޭގައި މަޝްރޫއުތައް ނިންމުމަށް މަސައްކަތްކުރައްވާނެކަމަށް ރައީސް ވިދާޅުވިއެވެ.

ކުރިއަށް އޮތީ ތަރައްޤީގެ ދުވެލީގައި ބައިވަރު މަޝްރޫއުތަކެއް ކުރިއަށްދާނެ ދުވަސްތަކެއްކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.