ސޫރިޔާގެ ދެކުނުގައިވާ ބައެއް ބިންތަކަށް ވެރިވެގަނެފައިވާ ޔަހޫދީ ސިފައިން އެ ސަރަޙައްދުތަކުން އަނބުރާ ނުގެންދާނެ ކަމަށް ޔަހޫދީ ދައުލަތުން ބުނެފި އެވެ. ޔަހޫދީ ފައުޖުގެ ނިރުބަވެރި ސިފައިން އަތްގަދަ ކޮށްފައި ވަނީ ސޫރިޔާގެ ދެކުނުގައި އޮންނަ ފަރުބަދައެއް ކަމަށްވާ ޖަބަލް އަލް-ޝައިޚްގެ ސަރަޙައްދުތަކަށެވެ. ޔަހޫދީ އިސްތިޢުމާރީ ސިފައިން އެ ސަރަޙައްދަށް ވެރިވެގަތީ، ސޫރިޔާގެ ރައީސް ބައްޝާރް އަލް-އަސަދުގެ ސަރުކާރު ވައްޓައިލުމާ ދިމާކޮށެވެ.
އަސަދުގެ ސަރުކާރު ވައްޓައިލާފައި ވަނީ ނިރުބަވެރި ޖަމާޢަތެއް ކަމުގައިވާ ހަޔިއަތު ތަޙްރީރް އަލް-ޝާމް (އެޗްޓީއެސު)ން ހުސްވި އަހަރުގެ ޑިސެންބަރު މަހުގެ 8ވަނަ ދުވަހުއެވެ. އެޗްޓީއެސްގެ ހަނގުރާމަވެރިން ވެރިރަށް ދިމިޝްޤަށް އަރައިގަތުމާ އެކު އަސަދު ވަނީ ފިއްލަވައިގެން ރަޝިޔާއަށް ވަޑައިގަންނަވާފައެވެ. އަދި، މޮސްކޯގެ ޙިމާޔަތަށް އެދިވަޑައިގަންނަވާފައެވެ.
އަސަދުގެ ސަރުކާރު ވައްޓައިލުމާ ދިމާކޮށް ޖަބަލް އަލް-ޝައިޚްގެ ސަރަޙައްދުތަކަށް ވެރިވެގަނެފައިވާ ޔަހޫދީ ސިފައިން އެ ސަރަޙައްދުން ނުފައިބާނެ ކަން އިޢުލާނު ކޮށްފައި ވަނީ ޔަހޫދީ ދައުލަތުގެ ހައްދުފަހަނަ އެޅި ދިފާޢީ ވަޒީރު އިސްރައެލް ކަޓްޒެވެ. އޭނާ ބުނީ، އެ ސަރަޙައްދުގައި ޔަހޫދީ ސިފައިން މުއްދަތެއް ނެތް ގޮތަށް ދެމިތިބޭނެ ކަމުގައެވެ. އޭނާ މި ކަން ހާމަކޮށްފައި ވަނީ، އެ ސަރަޙައްދުގައި ތިބި ޔަހޫދީ ސިފައިންނަށް ކުރި ޒިޔާރަތެއްގައެވެ.
ޖަބަލް އަލް-ޝައިޚަކީ އަސްކަރީ ގޮތުން ބަލާއިރު މުހިންމު ތަނެކެވެ. އެ ފަރުބަދައިގެ ބޮޑު ސަރަޙައްދަކަށް އަތްގަދަ ކުރުމާ އެކު، ދިމިޝްޤުގެ އިތުރުން ލުބްނާންގެ ސަރަޙައްދުތަކަށް ޙަމަލާ ދިނުމަށް ޔަހޫދީ ފައުޖަށް ފަސޭހަވެގެން ދާނެއެވެ. މީގެ އިތުރުން، 1967ވަނަ އަހަރު ޔަހޫދީން އަތްގަދަ ކޮށްފައިވާ ސޫރިޔާގެ އަލް-ޖޫލާންގެ އުސްބިންތައް ވެސް އެ ފަރުބަދައިގައި ތިބެ، ބެލެހެއްޓޭނެ ކަމުގައި މަސްރަޙު ދިރާސާ ކުރާ ފަރާތްތަކުން ބުންޏެވެ.
އަލް-ޝައިޚް ފަރުބަދައިގެ ސަރަޙައްދުތަކަށް ޔަހޫދީ ފައުޖުން ވެރިވެގަނެފައި ވަނީ ބައިނަލްއަޤުވާމީ ޤާނޫނުތަކާ ޚިލާފަށެވެ. އަދި، ސޫރިޔާއާއި ޔަހޫދީ ދައުލަތް ދެމެދު ޙަމަލާ ބަދަލު ކުރުން ހުއްޓުވުމަށް އދން ފާސްކޮށްފައިވާ ޤަރާރުތަކާ ވެސް ދެކޮޅަށެވެ. މި ކަމާ މެދު ބައިނަލްއަޤުވާމީ މުޖުތަމަޢުން ކަންބޮޑުވުން ފާޅުކޮށްފައިވާއިރު، ގިނަ އަދަދެއްގެ ޤައުމުން ވަނީ އެ ސަރަޙައްދުން ޔަހޫދީ ސިފައިން ބޭލުމަށް ގޮވައިލާފައެވެ.