މޯލްޑިވްސް އިކޮނޮމިކް ގޭޓްވޭގެ ފުރަތަމަ ފިޔަވަހިން އުޅަނދުތަކަށް ތެޔޮ އެޅޭނެ އިންތިޒާމް ހަމަޖެހޭނެ: ވަޒީރު ސަޢީދު

މޯލްޑިވްސް އިކޮނޮމިކް ގޭޓުވޭ މަޝްރޫޢުގެ ފުރަތަމަ ފިޔަވަހީގެ ދަށުން އުޅަނދުތަކަށް ތެޔޮ އެޅޭނެ އިންތިޒާމްތަކާއި މުދާ ގެނެސް އީއެކްސްޕޯޓްކުރުމުގެ ޚިދުމަތް ލިބޭނެކަމަށް އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ. ވަޒީރު މިހެން ވިދާޅުވީ، ހއ. އަތޮޅަށް ރައީސް ކުރައްވަމުން ގެންދަވާ ދަތުރުފުޅުގެ ތެރެއިން ޕީއެސްއެމް ނިއުސްއަށް ދެއްވި އިންޓަވިއުއެއްގައެވެ.

ރާއްޖޭގެ އިޤްތިޞާދުގެ އެންމެ ބޮޑު އެއް މަޝްރޫޢުކަމަށްވާ އިހަވަންދިއްޕޮޅުގައި ތަރައްޤީކުރާ މޯލްޑިވްސް އިކޮނޮމިކް ގޭޓުވޭ މަޝްރޫޢުއާއި ގުޅޭގޮތުން ވާހަކަދައްކަވަމުން އިޤްތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުޙައްމަދު ސައީދު ވިދާޅުވީ، މި މަޝްރޫއުގެ ދަށުން މިހާރު ކުރިއަށްދަނީ ފީޒިބިލިޓީ ހެދުމުގެ މަސައްކަތްކަމަށެވެ. ބައިނަލްއަޤްވާމީ ބައެއް ކޮންސަލްޓަންޓުންގެ މަސައްކަތް ބަލައި ރާއްޖޭގެ ބައެއް ދިރާސާތައް ކުރަމުންދާކަމަށް ވަޒީރު ވިދާޅުވިއެވެ. މިހާރު މި ޕްރޮޖެކްޓަށް ޕްރޮޖެކްޓް މެނޭޖްމަންޓެއް ނަގައިގެން މަސައްކަތް ކުރިއަށްދާކަމަށް ވަޒީރު ވިދާޅުވިއެވެ.

"ޕްރޮޖެކްޓް މެނޭޖްމަންޓެއް ނަގާފައި އެއޮތީ. ދެން އޮންނާނެ ހަރަކާތަކީ ރައީސް އެ ވިދާޅުވިގޮތައް ރައީސްގެ މޯލްޑިވްސް އިކޮނޮމިކް ގޭޓްވޭގެ ވިޝަންއާއި އެއްގޮތައް މިއަހަރުގެ ތެރޭގައި އެ މަސައްކަތް ފެށުން. އަޅުގަނޑުމެން މި އަންދާޒާކުރަނީ މިއަހަރުގެ މެދުތެރޭގައި ޕްރެކްޓިކަލީ މަސައްކަތް ފެށޭނެގޮތަކަށް ކަންކަން ކުރުން. އެއީ މި ސަރަހައްދުގެ ތަރައްޤީއަށް އެންމެ ބޮޑަށް ގުޅިފައިވާ ކަންތައް" ވަޒީރު ސައީދު ވިދާޅުވިއެވެ.

މޯލްޑިވްސް އިކޮނޮމިކް ގޭޓުވޭ މަޝްރޫޢުގެ ޢަމަލީ މަސައްކަތް މިއަހަރުގެ މެދުތެރޭގައި ފަށްޓަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ. މި ޕްރޮޖެކްޓުގެ ތެރޭގައި ބައިނަލްއަޤްވާމީ ޕޯޓު ފެސިލިޓީތަކާއި، ބޯޓު މަރާމާތުކުރުމުގެ ޚިދުމަތާއި، ބަންކަރިންގ ޚިދުމަތާއި، ކުރޫޒު ޓޫރިޒަމެއް ތަރައްޤީކުރުމާއި ފަތުރުވެރިކަމާއި ގުޅުންހުރި އިތުރު މަސައްކަތްތަކާއި، ރިއަލް އެސްޓޭޓުގެ ވިޔަފާރިއާއި، އެކްސްޕޯޓު ޕްރޮސެސިންގ ޒޯނެއްވެސް ތަރައްޤީކުރުން ހިމެނެއެވެ.