ތިލަފުށީގައި ޤާއިމުކޮށްފައިވާ އަމިއްލަ ފަރާތްތަކުގެ ބަނދަރުގެ މަސައްކަތްތައް ވަޒީރު އަމީން ބައްލަވައިލައްވައިފި

ކ. ތިލަފުށީގައި ޤާއިމުކުރެވިފައިވާ އަމިއްލަ ފަރާތްތަކުގެ ބަނދަރުގެ މަސައްކަތްތައް ކުރިއަށްދާ ގޮތް ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުޙައްމަދު އަމީން ބައްލަވައިލައްވައިފިއެވެ.

މި ދަތުރުފުޅުގައި އެވުޒާރާގެ އިސް ބޭފުޅުން ވަނީ ބައިވެރިވެވަޑައިގެންފައެވެ. ދަތުރުފަތުރާ ބެހޭ ވުޒާރާއިން ވިދާޅުވީ މި ޒިޔާރަތުގެ މަޤްޞަދަކީ ތިލަފުށީގައި ޤާއިމުކުރެވިފައިވާ އަމިއްލަ ފަރާތްތަކުގެ ބަނދަރުގެ މަސައްކަތްތަކާ ގުޅޭގޮތުން ކަމާބެހޭ ފަރާތްތަކާ ބައްދަލުކޮށް، އެ މަސައްކަތް ކުރިއަށްދާގޮތް ބެލުންކަމަށެވެ.

ދަތުރުފަތުރާއި މަދަނީ އުދުހުންތަކާއި ބެހޭ ވުޒާރާއިން ވިދާޅުވީ، ވަޒީރުގެ މި ދަތުރުފުޅުގައި، އަމިއްލަ ފަރާތްތަކުން ކުރިއަށްގެންދާ ބަނދަރުގެ މަސައްކަތްތައް ބައްލަވާލެއްވުމުގެ އިތުރުން މި މަސައްކަތްތަކުގައި އެފަރާތްތަކަށް ކުރިމަތިވާ ގޮންޖެހުންތަކާއި، އެކަންކަމަށް ހައްލު ހޯދޭނެގޮތްތަކާ ގުޅޭގޮތުން މަޝްވަރާކުރައްވާފައިކަމަށެވެ.

ވަޒީރުގެ މި ޒިޔާރަތަކީ، އަމިއްލަ ފަރާތްތަކުން ކުރިއަށްގެންދާ އިޤްތިޞާދީ މަޝްރޫޢުތަކަށް ސަރުކާރުން ދެއްވާ އަހައްމިއްޔަތުކަމުގެ ހެއްކެއްކަމަށާއި މިފަދަ މަޝްރޫޢުތަކުގައި ދިމާވާ ދަތިތަކަށް ޙައްލު ހޯދައިދިނުމަށް ސަރުކާރުން މަސައްކަތްކުރައްވާކަމުގެ މިސާލެއްކަމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ވިދާޅުވެއެވެ.