ޣައްޒާގެ މުސްލިމުން ނަސްލުހޭދު ކުރުމަށް ޢުދުވާނީ ޙަމަލާތައް ދެމުންދިޔަ ޔަހޫދީންގެ ކުރިމަތީގައި ކުޑަކަކޫ ނުޖަހާ ފަލަސްޠީނުގެ މުޖާހިދުން ކުރި މިންނަތް މަސައްކަތުގެ ނަތީޖާއެއްގެ ގޮތުން ޔަހޫދީން ޖަލުތަކުގައި ތިބި ފަލަސްޠީނުގެ އިތުރު 110 ޤައިދީން މިނިވަން ވެއްޖެއެވެ.
ޔަހޫދީންނާއި ޣައްޒާގައި ވެރިކަން ކުރާ ޙަމާސާ ދެމެދު ޢުދުވާން ހުއްޓާލުމުގެ އެއްބަސްވުމެއް ޤާއިމުކޮށް, އެ އެއްބަސްވުން ތަންފީޒު ކުރީ ޖަނަވަރީ މަހުގެ 19ވަނަ ދުވަހުއެވެ. އެ އެއްބަސްވުމުގެ ދަށުން އަސީރުން ބަދަލުކުރުމަށް ހަމަޖެހިފައި ވަނީ ތިން މަރުޙަލާއަކަށް ބަހާލައިގެންނެވެ. ކޮންމެ މަރުޙަލާއެއް ވެސް 42 ދުވަހަށް ދެމިގެން ދާނެއެވެ. ފުރަތަމަ މަރުަޙަލާގައި ޙަމާސުން ޖުމްލަ 33 އަސީރުން ދޫކޮށްލުމަށް ހަމަޖެހިފައިވެއެވެ. މި މަރުޙަލާގައި ދޫކުރާނީ އަންހެނުންނާއި ކުޑަކުދިންނާއި އުމުރުން 50 އަހަރުން މަތީގެ މީހުންނެވެ. އޭގެ ބަދަލުގައި 2,000އަށް ވުރެ ޤައިދީން ޔަހޫދީން މިނިވަން ކުރާނެއެވެ.
މީގެ ކުރިން އެއްބަސްވުމުގެ ދަށުން ދެ ފަހަރެއްގެ މަތިން ފަލަސްޠީނުގެ 290 ޤައިދީން ވަނީ މިނިވަން ކޮށްފައެވެ. އެއީ ޙަމާސުން ރަހީނު ކޮށްފައިވާ 8 ޔަހޫދީންގެ ބަދަލުގައެވެ. ދެވަނަ ބުރަކަށް އަސީރުން ބަދަލު ކުރިތާ ފަސް ދުވަސް ފަހުން އަނެއްކާ ވެސް މި ވަނީ އަސީރުން ބަދަލު ކޮށްފައެވެ. އެގޮތުން ޙަމާސުން ވަނީ ޔަހޫދީ ދައުލަތަށް ނިޞްބަތްވާ ތިން މީހުންނާއި ފިލިޕީންސްގެ 5 ރައްޔިތުން މިނިވަން ކޮށްފައެވެ. އޭގެ ބަދަލުގައި ޔަހޫދީންގެ ޖަލުތަކުގައި ތިބި ފަލަސްޠީނަށް ނިޞްބަތްވާ 110 ޤައިދީން ވަނީ މިނިވަން ކޮށްފައެވެ. އެއާއެކު ޢުދުވާން ހުއްޓާލުމުގެ އެއްބަސްވުމުގެ ދަށުން މިހާތަނަށް މިނިވަން ކުރި ފަލަސްޠީނުގެ ރައްޔިތުންގެ ޢަދަދު ވަނީ 400އަށް އިތުރުވެފައެވެ.
ޔަހޫދީ ޖަލުތަކުން އެންމެ ފަހުން މިނިވަން ކުރި ޤައިދީންގެ ތެރޭގައި ފަލަސްޠީނުގެ 30 ކުޑަކުދިން ވެސް ހިމެނެއެވެ. އޭގެ އިތުރުން ފަލަސްޠީނުގެ މަޝްހޫރު މުޖާހިދެއް ކަމަށްވާ ޒަކަރިއްޔާ ޒުބައިދީ ވެސް ހިމެނެއެވެ. އޭނާއަކީ އެއް ޒަމާނެއްގައި އަލް-އަޤްޞާ މާޓިއަރސް ބްރިގޭޑުގެ އިސްވެރިޔާއެވެ. އޭނާއަކީ ޔަހޫދީންގެ އެންމެ ވަރުގަދަ އެއް ޖަލުން ފިލައި ޔަހޫދީންނަށް ސިހުން ގެނުވި ވަރުގަދަ ޝަޚުސިއްޔަތެކެވެ.
ޙަމާސުން ރަހީނުން ދޫކޮށްލި ސަރަޙައްދަށް ގިނަ ޢަދަދެއްގެ މީހުން އެ ސަރަޙައްދަށް އެއްވުމުގެ ސަބަބުން އެއްބަސްވުމުގައިވާ ގޮތަށް ރެޑު ކުރޮހާ އަސީރުން ޙަވާލު ކުރި ވަގުތު ކަންތައްތައް ހިންގާފައި ވަނީ ވަރަށް ހަލަބޮލިކޮށެވެ. އެކަމާ ހިތްހަމަ ނުޖެހި ޔަހޫދީން ވަނީ ފަލަސްޠީނުގެ ޤައިދީން މިނިވަން ކުރުން ލަސް ކޮށްފައެެވެ. ނަމަވެސް ފަހުން ވަނީ ޤައިދީން މިނިވަން ކޮށްފައެވެ.
ތިންވަނަ ބުރުގައި ދޫކޮށްލި ޔަހޫދީންގެ ގިނަ މީހުން ގެންގޮސްފައިވަނީ ހުޅަނގު އައްސޭރީގެ ރާމަاللهގައި ހުންނަ ރަދާނާ ސަރަޙައްދަށެވެ. ދޫކޮށްލި ޤައިދީންގެ ތެރެއިން 30 މީހުން ގެންދިއުމަށް ހަމަޖެހިފައި ވަނީ ފަލަސްޠީނުން ބޭރަށެވެ.
ޔަހޫދީން ވަނީ މިނިވަންވި ޤައިދީންނަށް މަރުޙަބާ ކިޔުމުގައި އުފާ ފާޅުކުރުން މަނާ ކޮށްފައެވެ. ޤައިދީން ދޫކޮށްލުމުގެ ކުރިން ޔަހޫދީ ފައުޖުގެ ޑްރޯންތަކުން ވަނީ ޤައިދީންނަށް މަރުޙަބާ ކިޔުމުގައި އުފާ ފާޅު ކޮށްގެން ނުވާނެ ކަމަށާއި އެއްވެސް ދިދައެއް ވެސް ބޭނުން ނުކުރެވޭނެ ކަމަށް އިންޒާރު ދީފައިވާ ލީފްލެޓުތައް ޣައްޒާގެ އެކި ސަރަޙައްދުތަކަށް އަޅާފައެވެ. އިންޒާރުތައް ދިން ނަމަވެސް މިނިވަން ކުރި ފަލަސްޠީނުގެ ރައްޔިތުންނަށް މަރުޙަބާ ކިޔުމަށް ރާމަاللهގެ ދޮރާށި ކައިިރިއަށް ގިނަ ޢަދަދެއްގެ ރައްޔިތުން ވަނީ އެއްވެފައެވެ. އަދި މިނިވަންވި މީހުންނަށް ކުލަގަދަކޮށް މަރުޙަބާ ކިޔާ އުފާ ފާޅުކޮށްފައި ވެއެވެ. އެ ސަރަޙައްދުގައި ޔަހޫދީން ވަޒަނާއި ރަބަރު ވަޒަނާއި ގޭސް ބޭނުން ކުރުމުގެ ސަބަބުން އެ ސަރަޙައްދަށް އެއްވެފައި ތިބި މީހުންގެ ތެރެއިން 14 މީހަކަށް އަނިޔާ ވެފައިވާ ކަމަށް ފަލަސްޠީނުގެ ރަސްމީ އިދާރާތަކުން ބުނެއެވެ.