އެފްއޭމް ދިވެހި ޔޫތު ލީގު ނިންމުމުގެ ރަސްމިއްޔާތު ރައީސުލްޖުމްހޫރިއްޔާގެ ނައިބު އަލްއުސްތާޛް ހުސައިން މުހަންމަދު ލަތީފް ޝަރަފުވެރި ކޮށްދެއްވައިފިއެވެ.
ގައުމީ ފުޓުބޯޅަ ދަނޑުގައި ކުރިއަށްދިޔަ ޚާއްސަ ރަސްމިއްޔާތުގައި ނައިބު ރައީސް ވަނީ މުބާރާތުގެ ޗެމްޕިއަން ޓީމުތަކަށް މެޑަލް އާއި ޓްރޮފީ ހަވާލުކޮށްދެވާފައެވެ. ވަކި މަގާމުތަކުގެ ތެރެއިން މުބާރާތުގައި ހޮވާފައިވަނީ 16 އަހަރުން ދަށުގެ އެންމެ ގިނަ ލަނޑުޖެހި ކުޅުންތެރިޔާއެވެ. މިމަގާމު ހޯދީ 16 އަހަރުން ދަށުގެ ލީގުގައި ވާދަކުރި ކުލަބް ވެލެންސިއާގެ އައިދް މުހަންމަދު ޖަވީޒްއެވެ.
އޭނާ ވަނީ ލީގުގައި ކުޅުނު 7 މެޗުން 14 ލަނޑު ޖަހައިދީފައެވެ. މިއުމުރުފުރާގައި ވަނީ 131 ލަނޑު ޖަހާފައެވެ. މިރޭގެ ރަސްމިއްޔާތުގައި ވަނީ މުބާރާތުގެ ރެފްރީންނަށް ހަނދާނީ ލިޔުން ހަވާލުކޮށްދީފައެވެ.
ދިވެހި ޔޫތު ލީގު ކުރިއަށްދިޔައީ 12 އަހަރާއި 14 އަހަރު އަދި 16 އަހަރުން ދަށުގެ ކެޓަގަރީތަކަށް ޚާއްސަކޮށްގެންނެވެ. ކޮންމެ ކެޓަގަރީއަކުން އެންމެ މޮޅު ކޯޗު ހޮވިއިރު ކޮންމެ ކެޓަގަރީއަކުން ވަނީ ފެއާޕްލޭ ޓީމު ހޮވާފައެވެ. ޖުމްލަ 560 ކުޅުންތެރިން މުބާރާތުގައި ވާދަކުރިއިރު މިލީގުގެ 12 އަހަރުން ދަށުގެ ޗެމްޕިއަން ޓީމަކީ ސުޕަ ޔުނައިޓެޑް ސްޕޯޓްސް (ސަސް) އެވެ.
މުބާރާތުގެ 14 އަހަރުން ދަށުގެ ޗެމްޕިއަންކަން ޓީސީ ސްޕޯޓްސް ކުލަބު ހޯދިއިރު 16 އަހަރުން ދަށުގެ ޗެމްޕިއަން ޓީމަކީ ކުލަބު ވެލެންސިއާ އެވެ.
ކޮންމެ ކެޓަގަރީއަކުން 8 ޓީމު ވާދަކުރި މި ލީގުގެ ހުރިހާ މެޗެއް ކުޅުނީ ހެންވޭރު ދަނޑުގައެވެ. މިމުބާރާތް ކުރިއަށްދިޔައީ ހުސްވި ނޮވެންބަރު މަހުގެ 21 އިން ޖެނުއަރީ މަހުގެ 28 އަށެވެ.