ފީނުމުގެ ދުނިޔޭގެ ރެކޯޑެއް ރާއްޖެއިން ޤާއިމްކުރަނީ

ފީނުމުގެ ދުނިޔޭގެ ރެކޯޑެއް ރާއްޖެއިން ޤާއިމްކުރުމުގެ މަސައްކަތް ފަށައިފިއެވެ. އެކްރޮސް މޯލްޑިވްސް ނަމުގައި ބާއްވާ މި ހަރަކާތް އޮންނާނީ ދެ ފިޔަވަސަކަށް ބަހާލައިގެންނެވެ.

އޯޝަން ސިކްސް ފިފްޓީ އިން އިންތިޒާމުކޮށްގެން ކުރިއަށް ގެންދާ މި ހަރަކާތުގެ ފުރަތަމަ ފިޔަވަހި އިފްތިތާޙްކުރުމުގެ ރަސްމީއްޔާތު ހުޅުމާލެ ބީޗް ސަރަހައްދުގައި ވަނީ ބާއްވާފައެވެ. މި ރަސްމީއްޔާތު ޝަރަފުވެރިކޮށްދެއްވީ މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަހުމަދު ޝިޔާމެވެ. އެކްރޮސް މޯލްޑިވްސް ހަރަކާތުގެ ތެރެއިން ދެ ރެކޯޑެއް ހެދުމަށް މަސައްކަތް ކުރާނެއެވެ. މި ރަސްމީއްޔާތުގެ ތެރެއިން ފީނުމުގެ ހަރަކާތުގައި ބައިވެރިވާ ޑައިވަރުން ތަޢާރަފްކޮށްދީފައިވެއެވެ. އަދި މި ހަރަކާތްތައް އެހީތެރިކަން ފޯރުކޮށްދޭ ފަރާތްތައް ވަނީ ތަޢާރަފްކޮށްދީފައެވެ.

މި ހަރަކާތުގެ ތެރެއިން ފުރަތަމަ ރެކޯޑު އަންނަ ބުދަ ދުވަހު ހަދާނެއެވެ. އެ ރެކޯޑަކީ ހުޅުމާލެ އާއި ހުޅެލެ ވަށައިގެން 17 ކިލޯމީޓަރު ފީނައިގެން ހެދުމަށް މަސައްކަތް ކުރާ ރެކޯޑެކެވެ. ދުނިޔޭގެ އެންމެ ދިގު "ސިންގަލް އޯޕަން ވޯޓަރ ޑައިވް" ގެ ރެކޯޑު ހެދުމަށް މަސައްކަތް ކުރަނީ 6 ގަޑިއިރަށް ވުރެ ދިގު ނުވާ ގޮތަށް ކަމަށް މި ހަރަކާތް އިންތިޒާމުކުރާ އޯޝަން ސިކްސް ފިފްޓީއިން ބުނެެއެވެ. އަދި މިހާރު ހަރަކާތައް ތައްޔާރުވަމުންދާ ކަމަށް އޯޝަން ސިކްސް ފިފްޓީން ވަނީ ވިދާޅުވެއެވެ.

މި ހަރަކާތް ޝަރަފުވެރިކޮށްދެއްވާ ވާހަކަ ދައްކަވަމުން މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަހުމަދު ޝިޔާމް ވަނީ މިފަދަ ހަރަކާތްތަކަށް ސަރުކާރުން އަބަދުވެސް އެއްބާރުލުން ދޭނެ ކަމަށް ވިދާޅުވެފައެވެ. މިހަރަކާތުގެ ސަބަބުން ކުރިން ރާއްޖެ ނޭނގޭ ބަޔަކަށް ރާއްޖެ ތަޢާރަފްވެގެން ދާނެ ކަމަށް އުއްމީދު ކުރައްވާކަމަށްވެސް ވަޒީރު ވިދާޅުވިއެވެ.

"

ދިވެހި ރާއްޖެއަކީ ފަތުރުވެރިން އެޓްރެކް ކުރުމަށް ތަފާތު ހަރަކާތްތައް ހިންގި. އަޅުގަނޑަށް ޔަޤީން މި ދެ ހަރަކާތް ނިމޭއިރު މީގެ ކުރިން ދެވެހި ރާއްޖެ ތަޢާރަފް ނުވާ އެތައް ކޮމިއުނިޓީއަކަށް ދިވެހި ރާއްޖެ ތަޢާރަފްވެގެންދާނެ ކަން.

މަސްވެރިކަމާއި ބެހޭ ވަޒީރު ޝިޔާމް

އޯޝަން ސިކްސްފިފްޓީގެ ފަރާތުން އެކްރޮސް މޯލްޑިވްސް ހަރަކާތުގައި ދެވަނަ ރެކޯޑު ޤާއިމްކުރަން މަސައްކަތް ކުރާނީ އަންނަ އަހަރުއެވެ. ދެވަނަ ފީނުމުގެ ރެކޯޑު ހެދުމަށް ހަމަޖަހެފިއިވަނީ ހއ. ތުރާކުނުން ފެށިގެން އައްޑޫ ގަމާއި ހަމައަށް ފީނައިގެން ހުރަސްކޮށްގެންނެވެ. މި ހަރަކާތުގައި 460 ކިލޯމީޓަރު ދުރުމިނަށް ފީނާއިރު، ފީނަން ހަމަޖެހިފައިވަނީ ހުރިހާ އަތޮޅެއްގެވެސް ކަނޑައެޅޭ ސަރަހައްދުތަކުގައެވެ.

އެކްރޮސް މޯލްޑިވްސް ހަރަކާތް އިންތިޒާމުކުރާ އޯޝަން ސިކްސް ފިފްޓީން ވަނީ މީގެ ކުރިންވެސް ގިނަ ވަގުތު ފީނުމުގެ ހަރަކާތެއް ކުރިއަށް ގެންގޮސްފައެވެ. އެގޮތުން މޫދަށް ކުނިއެޅުމާއި ދެކޮޅަށް 50 ގަޑިއިރު ފީނުމުގެ ހަރަކާތެއް ވަނީ ކުރިއަށް ގެންގޮސްފައެވެ.