ރާއްޖޭގެ މަސްވެރިކަމުގެ ސިނާއަތު ޕްރޮމޯޓް ކުރުމަށް އިންޑިއާއިން އެހީތެރިވަނީ

ރާއްޖޭގެ މަސްވެރިކަމުގެ ސިނާޢަތް ޕްރޮމޯޓް ކުރުމަށް އިންޑިއާއިން އެހީތެރިކަން ފޯރުކޮށްދިނުމަށް މަޝްވަރާ ކުރުމުންދާ ކަމަށް އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖީ. ބަލަސުބްރަމާނިއަމް ވިދާޅުވެއްޖެއެވެ.

އިންޑިއާ ސަފީރު ވަނީ މިކަމާއި ގުޅިގެން ދިވެހި ސަރުކާރާއެކު މަޝްވަރާކުރެވިފައިވާކަން ހާމަކުރައްވާފައެވެ.

ރާއްޖޭގެ މަސްވެރިކަން ޕްރޮމޯޓް ކުރުމަށް، މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިންގ އެންޑް ޕްރޮމޯޝަން ލިމިޓެޑްގެ ނަމުގައި ސަރުކާރުން ވަނީ ކުންފުންޏެއް އުފައްދާފައެވެ. މިކުންފުނި އުފެއްދުމުގެ ބޭނުމަކީ ރާއްޖޭގެ މަސްވެރިކަމުގެ ސިނާއަތް އިތުރަށް ފުޅާކޮށް މުޖުތަމަޢަށް އެސިނާއަތުން ލިބިދޭ މަންފާ އިތުރުކުރުމަށްޓަކައި އެކުއަރކަލްޗަރ އާއި މެރިކަލްޗަރ ފަދަ ކަނޑުފަޅުގެ އެންމެހާ ވަސީލަތްތަކުން އުފައްދާ އުފެއްދުންތައް ހިމެނޭ ގޮތުން، ރާއްޖޭގައި ކުރާ މަސްވެރިކަމުން އުފައްދާ އުފެއްދުންތައް ބައިނަލްއަޤްވާމީ ބާޒާރުގައި އިޝްތިހާރުކޮށް ޕްރޮމޯޓްކުރުން ހިމެނެއެވެ.

ރާއްޖޭގެ މަސްވެރިކަން ޕްރޮމޯޓު ކުރުމަށް ޚާއްސަ ކުންފުންޏެއް އުފައްދައި އެކުންފުނިން މަސްވެރިކަން އިޝްތިހާރު ކުރުމަށް މިއަހަރު މަސައްކަތްތަކެއް ކުރެވޭނެކަން ވަނީ ހާމަކޮށްފައެވެ.

ގއ. ގެމަނަފުށީގެ އައިސް ޕްލާންޓު ހުޅުވުމަށް ބޭއްވި ރަސްމިއްޔާތުގައި ވާހަކަފުުޅު ދައްކަވަމުން އިންޑިއާ ސަފީރު ޖީ. ބާލަސުބްރަމަނިއަމް ވަނީ މަސްވެރިކަން ޕްރޮމޯޓު ކުރުމަށް އުފައްދާފައިވާ މި ކުންފުންޏާއި ގުޅިގެން މަސައްކަތް ކުރަން މަޝްވަރާކުރެވިފައިވާކަން ހާމަކޮށްފައެވެ.

"އަޅުގަނޑާއި މަސްވެރިކަމާއި ބެހޭ ވަޒީރު ޝިޔާމާއި އެކު ބޭއްވި ބައްދަލުވުމުގައި، މަސް އެކްސްޕޯޓް ކުރާ ކުންފުނިތަކާއި ގުޅުން ބަދަހިކުރުމާއި ގުޅޭ މަޝްވަރާތައް ކުރެވުނު. އަޅުގަނޑުމެންގެ އެބަހުރި ކޮޗިންގައި "މެރައިން ޕްރޮޑަކްޓްސް އެކްސްޕޯޓް ޑިވެލޮޕްމެންޓް
އޭޖެންސީއެއް. އަޅުގަނޑުމެން މަސައްކަތް ކުރާނަން ރާއްޖޭގެ މަސްވެރިކަމުގެ ޕްރޮމޯޝަން އޭޖެންސީއާއި ގާތް ގުޅުމެއް އުފައްދަން. އޭރުން ރާއްޖޭގެ ހުރި ވަސީލަތްތައް ބޭނުންކޮށްގެން ރާއްޖޭގެ ތަރައްޤީއަށް މަސައްކަތް ކުރެވޭނެ " އިންޑިއާ ސަފީރު ވިދާޅުވިއެވެ.

ރާއްޖޭގެ މަސްވެރިކަން ޕްރޮމޯޓު ކުރުމަށް އިންޑިއާއިން އެހީވެދޭނެކަން ހާމަކޮށްފައިވާއިރު، އެ ޤައުމުގެ އެހީގައި ރާއްޖޭގެ ރާއްޖޭގެ 6 ސަރަހައްދެއްގައި މަސް ފެކްޓަރީ ތަރައްޤީކުރުމުގެ މަސައްކަތް ދަނީ ކުރަމުންނެވެ. އިންޑިއާ ސަފީރު ވިދާޅުވީ މިމަސައްކަތަކާއިއެކު، ރާއްޖޭގެ މަސްވެރިކަން ކުރިއަރުވަން އަދި ދިވެހި ސަރުކާރުން އިސްކަން ދޭ ދާއިރާތަކަށް އެހީވުމަށް އިނޑިއާއިން ތައްޔާރަށް އޮތް ކަމަށެވެ.

ރާއްޖޭގެ މަސްވެރިކަން ޕްރޮމޯޓް ކުރުމަށް އިންޑިއާއިން އެހީތެރިވެދޭއިރު، މިއަހަރު ތެރޭ މަސްވެރިކަމުގެ ފެއަރތަކުގައި ބައިވެރިވެ ރާއްޖެ ޕްރޮމޯޓް ކުރުމަށް ހަމަޖެހިފައިވާ ކަމަށް މަސްވެރިކަން ޕްރޮމޯޓް ކުރުމަށް އުފައްދާފައިވާ ކުންފުނިން މީގެ ކުރިން ވަނީ ހާމަކޮށްފައެވެ. މީގެ އިތުރުން މަސްވެރިކަމުގެ އުފެއްދުންތައް ރާއްޖެއިން ބޭރަށް އެކްސްޕޯޓް ކުުރަން ދިމާވާ ގޮންޖެހުންތަކަށް ހައްލު ހޯދުމަށް އެކުންފުނިން މަސައްކަތް ކޮށްދޭނެ ކަން އެކުންފުނިން ވަނީ ހާމަކޮށްފައެވެ.