ދަނޑުވެރިންނަށް ޚާއްސަ ލޯނު ޕްރޮގުރާމަކަށް ސީއެފްސީއިން ހުޅުވާލައިފި

ކުދި އަދި މެދުފަންތީގެ ދަނޑުވެރިކަމުގެ މަޝްރޫޢުތަކަށް އ.ދގެ ކޮމަން ފަންޑް ފޯ ކޮމޮޑިޓީސް (ސީއެފްސީ) އިން ލޯނު ޕްރޮގްރާމަކަށް ހުޅުވާލައިފިއެވެ.

ދަނޑުވެރިކަމާއި ދިރޭތަކެއްޗާބެހޭ ވުޒާރާއިން ވިދާޅުވީ ރާއްޖެއަކީވެސް ކޮމަން ފަންޑް ފޯ ކޮމޮޑިޓީސް ސީއެފްސީގެ މެމްބަރު ގައުމަކަށްވުމުން މި ލޯނަށް އެދި ހުށަހެޅުމުގެ ފުރުސަތު ދިިވެހި ދަނޑުވެރިންނަށްވެސް ހުޅުވާލެވިފައިވާކަމަށެވެ. އަދި މިއީ ދަނޑުވެރިންގެ ވިޔަފާރިތަށް ފުޅާކުރުމަށް ލިބޭ ރަނގަޅު ފުރުސަތެއްގެގޮތުގައި އެވުޒާރާއިން ދެކެއެވެ.

ދަނޑުވެރިކަމާއި ބެހޭ ވުޒާރާއިން ވިދާޅުވީ ލޯނު ދިނުމުގައި އަންހެން ދަނޑުވެރިންނަށް އަދި އަންހެނުން އިސްކޮށް ހަރަކާތްތެރިވާ ދަނޑުވެރިކަމުގެ ވިޔަފާރިތަކަށް ސީއެފްސީއިން އިސްކަންދޭނެ ކަމަށެވެ. މި ލޯނަށް ޝައުގުވެރިވާ ފަރާތްތަކުން ޕްރޮޕޯސަލް ހުށަހަޅުމުގެ ފުރުސަތު 1 އޭޕްރީލްގެ ނިޔަލަށް ވަނީ ހުޅުވާލެވިފައެވެ. މި ލޯނު ޕްރޮގްރާމާއި ގުޅޭ އިތުރު މަޢުލޫމާތު ސީއެފްސީގެ ވެބްސައިޓުން ލިބެން ހުންނާނެ ކަމަށް ދަނޑުވެރިކަމާއި ބެހޭ ވުޒާރާއިން ވިދާޅުވެއެވެ.

ސީއެފްސީގެ އަމާޒަކީ މި ލޯނު ޕްރޮގްރާމާއި އެކު ދަނޑުވެރިންނަށް އެފަރާތްތަކުގެ ވިޔަފާރިތައް ފުޅާކުރުމާއި އެކު ލިބޭ އާމްދަނީ އިތުރުކުރެވޭނެ މަގެއް ތަނަވަސްކޮށްދިނުމެވެ. އަދި މި ދާއިރާގައި އަންހެނުންގެ ދައުރު އިތުރުކުރުމަކީވެސް މި ލޯނު ޕްރޮގްރާމުގެ މަޤްސަދެއް ކަމަށް ސީއެފްސީއިން ވިދާޅުވެއެވެ.

Common Fund for Commodities (CFC) has announced financial support for small to medium agribusiness projects.
Participants who are interested may submit their proposals to [email protected] before 1st April 2025.
For more information, please refer to https://t.co/SUVklWVp17 pic.twitter.com/ChgZ6RQwEu

— Ministry of Agriculture and Animal Welfare (@MAAWmv) March 16, 2025

އަދި މީގެއިތުރުން މި ލޯނަށް އެދި ހުށަހަޅާ ޕްރޮޕޯސަލްތަކުގެތެރެއިން އިޖާދީ ވަސީލަތްތަކުގެ އެހީގައި ދަނޑުވެރިކަން ކުރުމަށް ހުށަހަޅާ ފަރާތްތަކަށް އިސްކަން ދެވޭނެ ކަމަށް ސީއެފްސީއިން ވިދާޅުވެއެވެ. އެގޮތުން ދަނޑުވެރިކަމުގެ އެކި ދާއިރާތަކުގައި ބޭނުންކުރެވޭނެ ވަސީލަތްތަކުގެ ވިޔަފާރިތަކަށްވެސް މި ލޯނަށް އެދި ހުށަހެޅޭނެ ކަމަށް ސީއެފްސީއިން ވިދާޅުވެއެވެ.