ޔުއެފާ ނޭޝަންސް ލީގުގެ ކުއާޓާ ފައިނަލް ދެވަނަ ލެގުގައި ރޭ ޕެނަލްޓީ ޖަހައިގެން ނެދަލަންޑްސް ބަލިކޮށް، މުބާރާތުގެ ސެމީ ފައިނަލަށް ސްޕެއިން ދަތުރުކޮށްފިއެވެ.
ފުރަތަމަ ލެގުގައި މި ދެ ޓީމު ކުޅުނު މެޗު 2-2 ގެ ނަތީޖާއަކުން އެއްވަރުވެފައިވާއިރު ރޭ ކުޅުނު ދެވަނަ ލެގުގެ ފުރިހަމަ ވަގުތު ހަމަވިއިރު 2-2 ގެ ނަތީޖާއަކުން ދެ ޓީމު އެއްވަރުވެފައިވުމުގެ ސަބަބުން އިތުރު ވަގުތުގައި ކުޅުމުގައިވެސް ދެ ޓީމުން ކުރެ ކޮންމެ ޓީމަކުން ވަނީ ލަނޑެއް ޖަހާ މެޗުގެ ނަތީޖާ 3-3 އަށް ބަދަލުކޮށްފަ އެވެ.
ސްޕެއިންގެ މަސްޓެއްލާ ސްޓޭޑިއަމްގައި ކުޅުނު މި މެޗުގެ 8 ވަނަ މިނިޓުގައި ސްޕެއިން އަށް ލިބުނު ޕެނަލްޓީ އަކުން މިކެލް އޮޔަރްޒަބަލް ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ. މި ޕެނަލްޓީ އަކީ އޭރިޔާ ތެރެއިން އޭނާއަށް ކުރި ފައުލަކާއި ގުޅިގެން ލިބުނު ޕެނަލްޓީ އެކެވެ.
މެޗުގެ ފުރަތަމަ ހާފުގެ ކުޅުން ނިމުނުއިރު 1-0 ގެ ނަތީޖާއަކުން ސްޕެއިން ކުރީގައި އޮތް ނަމަވެސް ދެވަނަ ހާފުގެ ކުޅުން ފެށުނުތާ 9 ވަނަ މިނިޓުގައި ނެދަލޭންޑްސް އަށް ލިބުނު ޕެނަލްޓީ އަކުން މެމްފިސް ޑިޕޭ ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ. މިއީ އޭނާ ގައުމީ ޓީމަށް ކުޅުނު 100 ވަނަ މެޗެވެ.
ނަމަވެސް އޭގެ 13 މިނިޓް ފަހުން ސްޕެއިންގެ އޮޔަރްޒަބާލް ވަނީ އިތުރު ލަނޑެއް ޖަހާ ދެވަނަ ފަހަރަށް ސްޕެއިން އަށް ކުރި ހޯދަދީފަ އެވެ.
މި މެޗުގައި ނެދަލޭންޑްސް އިން ދެވަނަ ފަހަރަށް މެޗުގެ ނަތީޖާ އެއްވަރުކޮށްފައިވަނީ މެޗުގެ 79 ވަނަ މިނިޓުގައި އިއާން މާޓްސެން ކާމިޔާބުކޮށްދިން ލަނޑުންނެވެ. މިއީ އޭނާ ނެދަލޭންޑްސްގެ ގައުމީ ޓީމަށް ކުޅުނު ފުރަތަމަ މެޗެވެ.
މެޗުގެ ފުރިހަމަ ވަގުތު ހަމަވިއިރު 2-2 ގެ ނަތީޖާއަކުން ދެ ޓީމު އެއްވަރުވެފައިވާތީ އިތުރު ވަގުތުގެ ކުޅުން ފެށުނުތާ 13 ވަނަ މިނިޓުގައި ލަމީން ޔަމާލް ވަނީ ލަނޑެއް ޖަހާ ސްޕެއިން އަށް ކުރި ހޯދަދީފަ އެވެ. ނަމަވެސް އިތުރު ވަގުތުގެ ދެވަނަ ހާފުގައި ނެދަލޭންޑްސް އަށް ލިބުނު ޕެނަލްޓީ އަކުން ޒަވީ ސައިމަން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފަ އެވެ.
މި މެޗުގައި ސްޕެއިން ޖެހި ފަސް ޕެނަލްޓީގެ ތެރެއިން ނާކާމިޔާބުވެފައިވަނީ ލަމީން ޔަމާލް ޖެހި ޕެނަލްޓީ އެވެ. އަދި ނެދަލޭންޑްސްގެ ނޮއާ ލޭންގްގެ އިތުރުން ޑޮންޔެލް މަލެންގެ ޕެނަލްޓީ ވަނީ ނާކާމިޔާބުވެފަ އެވެ. އެހެންކަމުން ޕެނަލްޓީއިން ސްޕެއިން އަށް ކުރި ލިބިފައިވަނީ 4-3 ގެ ނަތީޖާއަކުންނެވެ.
މި މުބާރާތުގެ ސެމީ ފައިނަލުގައި ސްޕެއިން އާއި ދެކޮޅަށް ނިކުންނާނީ ފްރާންސް އެވެ.