އެއްވެސް ދައްޗެއް ކުރިމަތި ނުވާނެ، ދިރާސީ އަހަރުގެ ކިޔެވުން ފަށާނީ ހުރިހާ ވަޞީލަތެއް ހަމަކޮށްގެން: ވަޒީރު ޝަފީޢު

މިއަހަރުގެ ދިރާސީ އަހަރުގެ ކިޔެވުން ފަށާނީ ހުރިހާ ވަޞީލަތްތަކެއް ހަމަކޮށްގެންކަމަށާއި ދައްޗެއް ނުވެ ކިޔެވުން ކުރިއަށް ގެންދެވޭނެކަމަށް ތަޢުލީމީ ކަންތައްތަކާ ބެހޭ ވަޒީރު ޑރ. އިސްމާއިލް ޝަފީއު ވިދާޅުވެއްޖެއެވެ. ދިރާސީ އައު އަހަރުގެ ކިޔެވުން ފެށޭނީ އަންނަ އޭޕްރީލް މަހުގެ 6ވަނަ ދުވަހުއެވެ.

ޕީއެސްއެމް ނިއުސްއަށް މަޢުލޫމާތުދެއްވަމުން ތަޢުލީމީ ވަޒީރު ޑރ. އިސްމާއިލް ޝަފީއު ވިދާޅުވީ ކޮންމެ އަހަރެއްގެވެސް ދިރާސީ އައު އަހަރު ފެށުމަށް ހަރުދަނާ ނިޒާމެއްގެ ތެރެއިން އަބަދުވެސް ތައްޔާރީތައް ވަމުން އަންނަކަމަށެވެ. އެގޮތުން މިއަހަރުގެ ދިރާސީ އަހަރަށްވެސް ދުރާލާ ތައްޔާރުވެފައިވާކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ ދަރިވަރުން ސްކޫލްއަށް ދާންވާއިރަށް ސްކޫލްތައް ތައްޔާރުކުރުމުގެ ހުރިހާ މަސައްކަތްތަކެއް ކުރިއަށްގެންދާކަމަށާއި ސްކޫލްތަކުގެ މަރާމާތުގެ މަސައްކަތްތައް ކުރިއަށްގެންދިޔުމަށް ޚާޢްސަ ބަޖެޓްގެ ތެރެއިން 15 މިލިޔަން ރުފިޔާ ހަމަޖައްސަވާ ސްކޫލްތަކަށް ހަވާލުކޮށްފައިވާކަމަށް ވަޒީރު ވިދާޅުވިއެވެ. މީގެ އިތުރުން މުދައްރިސުންނާއި ފޮތްތައް ހަމަކުރުމުގެ މަސައްކަތްތައްވެސް ކުރައްވާފައިވާކަމަށާއި ދަރިވަރުންނާއި މުދައްރިސުންނަށް ބޭނުންވާ ހުރިހާ ވަޞީލަތްތަކާއެކު ދިރާސީ އަހަރުގެ ކިޔަވުން ފަށައި ކާމިޔާބު އަހަރަކަށް ވާނެކަމަށް އުންމީދުކުރައްވާކަމަށް ވަޒީރު ވިދާޅުވިއެވެ.

"ދަރިވަރުންގެ ފޮތްތަކަށް އެއްވެސް ދައްޗެއް ނުވާނެ. މުދައްރިސުން ބޭނުންވާ ވަރުގެ އޮޑިޓެއް ހަދާ އެއިން ދެއްކި ގޮތުގައި ދިރާސީ އަހަރުގެ ކިޔެވުން ފަށާއިރު 80 ވަރަކަށް މުދައްރސިުން ބޭނުންވޭ. އެ ހުރިހާ މަސައްކަތްތަކައް މިހާރު ވަނީ ނިންމާފައި" ތަޢުލީމީ ވަޒީރު ޑރ. އިސްލާމިލް ޝަފީޢު ވިދާޅުވިއެވެ.

ދިރާސީ އަހަރުގެ ކިޔެވުން ނިންމައި، ދަރިވަރުން ޗުއްޓީއަށް ދިޔައީ ފެބުރުއަރީ 25 ގައެވެ. އަދި އަންނަ މަހުގެ 6ވަނަ ދުވަހު އައު ދިރާސީ އަހަރު ފެށޭނެއެވެ. އެހެން އަހަރުތަކާ ޚިލާފަށް މިއަހަރުގެ ބޮޑު ޗުއްޓީ ދިމާވީ ރަމަޟާންމަހާއެވެ. ދިރާސީ އަހަރު ނިމޭނީ ޑިސެމްބަރު 28ވަނަ ދުވަހުއެވެ.

ދިރާސީ އަހަރުގެ ކިޔެވުން އަހަރުގެ މެދު ތެރޭގައި ފަށާ ގޮތަށް މިދިޔަ ސަރުކާރުން ނިންމި ނިންމުން ބަދަލުކޮށް ޖެނުއަރީ މަހު ދިރާސީ އަހަރުގެ ކިޔެވުން ފަށާގޮތަށް މިސަރުކާރުން ވަނީ ނިންމަވާފައެވެ. އެގޮތުން ޖެނުއަރީ މަހު ދިރާސީ އަހަރު ފަށާގޮތަށް މުޅިންހެން ބަދަލު ވާނީ 2026 ވަނަ އަހަރުއެވެ.

މި އަހަރުގެ ބޮޑު ޗުއްޓީ ލިބޭނީ ޑިސެމްބަރު 28 އިން ޖެނުއަރީ 27 އަށެވެ. އެއާއެކު 2026 ވަނަ އަހަރު ބޮޑު ޗުއްޓީ ޑިސެމްބަރު މަހަށް ލިބޭނެއެވެ.