ޚަބަރު

ފަތުރުވެރިކަމުގެ ދާއިރާގެ ނަޒާހަތްތެރިކަން ހަރުދަނާކުރުމާ ގުޅޭ ބައިނަލްއަޤްވާމީ ފޯރަމެއް ރާއްޖޭގައި ބާއްވަނީ


  • މިފޯރަމް އޮންނާނީ މޭއި މަހުގެ 6 އިން 7އަށް

  • ފޯރަމުގައި ބައިވެރިވުމަށް މިހާތަނަށް 50އަށްވުރެ ގިނަ ފަރާތުން ވަނީ ރަޖިސްޓްރީ ކޮށްފައި

އިސްލާމީ ޤައުމުތަކަށް ޚާއްސަކޮށްގެން ސަޢުދި އަރަބިއްޔާގެ އޯވާސައިޓް އެންޑް އެންޓި ކޮރަޕްޝަން އޮތޯރިޓީއާއި ރާއްޖޭގެ އެންޓި ކޮރަޕްޝަން ކޮމިޝަން ގުޅިގެން ފަތުރުވެރިކަމުގެ ދާއިރާގެ ނަޒާހަތްތެރިކަން ހަރުދަނާކުރުމާ ގުޅޭ ބައިނަލްއަޤްވާމީ ފޯރަމެއް ރާއްޖޭގައި ބާއްވަން ނިންމައިފިއެވެ.

ސަޢުދި އަރަބިއްޔާގެ އޯވާސައިޓް އެންޑް އެންޓި ކޮރަޕްޝަން އޮތޯރިޓީ(ނަޒާހާ) އާއި ދިވެހި ރާއްޖޭގެ އެންޓި ކޮރަޕްޝަން ކޮމިޝަން ގުޅިގެން ބާއްވާ މިފޯރަމް ބޭއްވުމުމުގެ މަޤްޞަދަކީ، އިސްލާމީ ޤައުމުތަކުގައި ފަތުރުވެރިކަމުގެ ދާއިރާގައި ހުރި ކޮރަޕްޝަން މައްސަލަތަކަކީ ކޮބައިކަން ދެނެގަނެ އެ ކަންކަމާއި މެދު މަޝްވަރާ ކުރާނެ ޕްލެޓްފޯމެއް ހޯދުންކަމަށް އޭސީސީން ވިދާޅުވެއެވެ.

މިފޯރަމް އޮންނާނީ އަންނަ މޭއި މަހުގެ 6 އިން 7އަށް ވިލާ ނޯޓިކާ ރިސޯޓުގައި ކަމަށް އޭސީސީން ވިދާޅުވެއެވެ. މިފޯރަމްގައި ބައިވެރިވާނީ އޯގަނައިޒޭޝަން ފޯރ އިސްލާމިކް ކަންޓްރީސް، އޯއައިސީގެ މެންބަރު ޤައުމުތަކުގެ އެންޓި ކޮރަޕްޝަން އިދާރާތަކާއި، އެޤައުމުތަކުގެ ފަތުރުވެރިކަމުގެ އިދާރާތަކާއި ބައިނަލްއަޤްވާމީ އެހީ ދޭ ޖަމާޢަތްތަކުންނެވެ.

މިފޯރަމުގައި ބައިވެރިވުމުގެ ފުރުސަތު މިމަހުގެ 10 ވަނަ ދުވަހާއި ހަމައަށް ހުޅުވާލާފައިވާއިރު، މިހާތަނަށް 50އަށްވުރެ ގިނަ ފަރާތުން ރަޖިސްޓްރީކޮށްފައިވާ ކަމަށްވެސް އޭސީސީން ވިދާޅުވިއެވެ.

އެންޓި ކޮރަޕްޝަން ކޮމިޝަންގެ ޑިރެކްޓަރ އޮފް ޕްރިވެންޝަން ފާތިމަތު އިބްނާ ވިދާޅުވީ، ފަތުރުވެރިކަމުގެ ދާއިރާއަށް ޚާއްސަކޮށްގެން މިފޯރަމް ބޭއްވުމަށް ނިންމީ މިއީ މިހާތަނަށް އެހާ ބޮޑަށް ސަމާލުކަން ދެވިފައި ނުވާ ދާއިރާއަކަށް ވުމުން ކަމަށެވެ.

"ދިވެހިރާއްޖޭގެ ތަޖުރިބާގައިވެސް ރިސްކް ބޮޑު ދާއިރާއެއްކަން ފާހަގަކުރެވޭ. ކޮރަޕްޝަން މިގުޅެނީ އިޤްތިޞާދީ ދާއިރާއާއި. ފައިސާ އިންވޯލްވާ ކޮންމެ ކަމަކީ ކޮރަޕްޝަނަށް ހިރާސް އޮތް ކަމަކަށް އެބަވޭ. ފަތުވެރިކަމުގެ ދާއިރާއަކީ ވަރަށް ގިނަ ވަޒީފާތައް އެކުލެވޭ އެތެރެއާއި ބޭރުގެ އިންވެސްޓްމަންޓުތަކަށް ދޮރު ހުޅުވިފައި އޮތް ދާއިރާއެއް. ޓެކްސް އާމްދަނީ އާއި އިޤްތިޞާދީ ކުރިއެރުމާއި ގުޅިފައި އޮތް ދާއިރާއެއް މިއީ. އެހެންވެ މި ދާއިރާ ޚިޔާރު ކުރެވިފައި އޮތީ" އިބްނާ ވިދާޅުވިއެވެ.

މިފޯރަމް ނިމޭއިރު، މިދާއިރާގައި ހުރި ހިރާސްތައް ނައްތާލުމަށް ބޭނުންވާ އުސޫލުތަކެއް އެކުލަވާލެވޭނެ ކަމަށް އެސީސީން ވިދާޅުވިއެވެ. މިއުސޫލުތައް އެކުލަވާނީ، ފޯރަމުގައި ބައިވެރިވާ ޤައުމުތަކުން މައުލޫމާތު ހޯދައިގެން ކަމަށް އޭސީސީން ވިދާޅުވެއެވެ.

މިފޯރަމް ދިވެހިރާއްޖޭގައި ބޭއްވުމަށް ނިންމާފައިވަނީ އޯއައިސީގެ ކޮރަޕްޝަނާއި ދެކޮޅަށް މަސައްކަތް ކުރާ އިދާރާތަކުގެ މަޝްވަރާގެ މަތިން ކަމަށް އޭސީސީން ވިދާޅުވިއެވެ.