ޔަހޫދީންގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫ ހައްޔަރު ކުރުމަށް ބައިނަލްއަޤްވާމީ ޖިނާޢީ ކޯޓު، އައިސީސީން ޢަމުރެއް ނެރެފައި ވަނިކޮށް އޭނާ ހަންގެރީއަށް ދިޔުމަށް ދަތުރު ފަށައިފިއެވެ.
ޣައްޒާގައި ހަނގުރާމައިގެ ޖަރީމާތައް ހިންގުމުގެ ތުހުމަތުގައި ނަތަންޔާހޫއާއި ޔަހޫދީ ދިފާޢީ ވަޒީރު ޔޮއަވް ގަލަންޓް ހައްޔަރު ކުރުމަށް އައިސީސީން ޢަމުރެ ނެރުނީ މިދިޔަ އަހަރުގެ ނޮވެމްބަރު މަހުގެ ތެރޭގައެވެ. ނަތަންޔާހޫ ހަންގެރީއަށް ކުރާ މި ދަތުރަކީ އެ ޢަމުުރު ނެރުނު ފަހުން ޤައުމުން ބޭރަށް އޭނާ ކުރާ ދެވަނަ ދަތުރެވެ. މި އަހަރުގެ ފެބްރުވަރީ މަހުގެ ތެރޭގައި އޭނާ ވަނީ ޔަހޫދީންގެ އެންމެ ބޮޑު މަދަދުގާރު ކަމުގައިވާ އެމެރިކާގެ ރައީސް ޑޮނަލްޑް ޓްރަމްޕާ ބައްދަލު ކުުރުމަށް އެ ޤަައުމަށް ދަތުރު ކޮށްފައެވެ. އިޒްރޭލާއި އެމެރިކާއަކީ އައިސީސީގެ މެންބަރު ޤައުމުތަކެއް ނޫނެވެ.
ހަންގެރީއަށް ޒިޔާރަތް ކުރުމަށް އެ ޤައުމުގެ ބޮޑުބަޒީރު ވިކްޓޯ އޯބާން ނަތަންޔާހޫއަށް ދަޢުވަތު ދެއްވާފައި ވަނީ އައިސީސީއިން ޢަމުރު ނެރުމުގެ އެއް ދުވަސް ފަހުންނެވެ. އައިސީސީ އުފެއްދުމުގައި ބައިވެރިވި ޤައުމުތަކުގެ ތެރޭގައި ހިމެނޭ ހަންގެރީން އެ ކޯޓުން ހައްޔަރު ކުރުމަށް ޢަމުުރު ނެރެފައިވާ ކޮންމެ މީހަކު ވެސް އެ ޤައުމަށް ދަތުރު ކޮށްފި ނަމަ ހައްޔަރުކޮށް އައިސީސީއަށް ޙަވާލު ކުރަން ޖެހެއެވެ. ނަމަވެސް ހަންގެރީގެ ބޮޑުވަޒީރު ވަނީ އައިސީސީގެ ޢަމުރަށް އިޚްތިރާމު ނުކުރާނެ ކަމަށާއި އެ ޢަމުރާ އެއްގޮތަށް ޢަމަލު ނުކުރާނެ ކަމަށް ވިދާޅުވެފައެވެ. ނަތަންޔާހޫ ހަންގެރީއަށް ކުރާ ހަތަރު ދުވަހުގެ ދަތުރުގައި އޯބާންއާ ބައްދަލު ކުރުމަށް ވެސް ވަނީ ހަމަޖެހިފައެވެ.
ބޮޑުވަޒީރު އޯބާން ވަނީ އައިސީސީއިން ނަތަންޔާހޫ ހައްޔަރު ކުރުމަށް ޢަމުުރެއް ނެރުމަކީ ބަލައިގަނެވޭނެ ކަމެއް ނޫން ކަމަށް ވިދާޅުވެފައެވެ. އެއީ ޤާނޫނީ ގޮތުން އައިސީސީއަށް އެޅޭނެ ފިޔަވަޅެއް ނޫން ކަމަށް އިޒްރޭލެކޭ އެއްގޮތަށް ހަންގެރީއިން ވެސް ޤަބޫލު ކުރެއެވެ.
އައިސީސީން ނެރުނު ބަޔާނެއްގައި ބުނީ އެ ކޯޓުގެ ނިންނުންތައް ތަންފީޒު ކުރުމަކީ އައިސީސީގެ މެންބަރު ޤައުމުތަކަށް ލާޒިމުވާ ކަމެއް ކަމަށެވެ. އައިސީސީގެ ނިންމުންތަކަކީ ޤާނޫނީ ގޮތުން ރަނގަޅު ނިންމުންތަކެއްތޯއާ މެދު ގޮތެއް ނިންމުމަކީ މެންބަރު ޤައުމުތަކުން ކުރަން ޖެހޭ ކަމެއް ނޫން ކަމަށް އެ ކޯޓުން ނެރުނު ބަޔާނުގައި ބުނެފައިވެއެވެ.