ޚަބަރު

ޑިއުޓީ ބޮޑުކުރުމުގެ އިއުލާނާ އެކު ދުނިޔެއަށް ހާސްކަން، ލީޑަރުންގެ ނުރުހުން ޓްރަމްޕަށް!


އެމެރިކާއަށް އެތެރެކުރާ މުދަލުން ނަގާ ޑިޔުޓީ ބޮޑުކޮށްފައިވާ ކަމަށް ރައީސް ޑޮނަލްޑް ޓްރަމްޕް މިއަދު އިޢުލާނުކުރެއްވުމާ ގުޅިގެން، ގިނަ ޤައުމުތަކުން ކަންބޮޑުވުންފާޅު ކުރަމުންދާއިރު، ބައެއް ޤައުމުތަކުން ރައްދު ދޭނެކަމުގެ އިންޒާރު ދޭން ފަށައިފިއެވެ.

ޓްރަމްޕް މިއަދު އިޢުލާނުކުރެއްވި ގޮތުންނަމަ، އެމެރިކާއަށް ބޭރުގެ ހުރިހާ ޤައުމުތަކަކުން އެތެރެކުރާ މުދަލުން މަދުވެގެން 10 ޕަސެންޓުން ޑިޔުޓީ ވަނީ ބޮޑުކޮށްފައެވެ. ނަމަވެސް، މިހައިތަނަށް އެމެރިކާއާ މެދު ވިޔަފާރީގެ ގޮތުން ނާއިންސާފުން ޢަމަލުކުރާ ޤައުމުތަކަށް އޭގެ ދެގުނައަށް ވުރެ ބޮޑުކޮށް ވަނީ ޑިޔުޓީ މަތިކޮށްފައެވެ. އޭގެތެރޭގައި އެމެރިކާއާ އެންމެ ގާތް ގުޅުމެއް އޮންނަ ރަހުމަތްތެރި ޤައުމުތައް ވެސް ހިމެނެއެވެ.

މިގޮތުން، ޖަޕާނަށް 24 ޕަސެންޓު، ދެކުނު ކޮރެޔާއަށް 25 ޕަސެންޓު، ޓައިވާނަށް 32 ޕަސެންޓު އަދި ވިލާތުގެ ޤައުމުތަކުގެ އިއްތިހާދު، އީޔޫއަށް 20 ޕަސެންޓުން ވަނީ ޑިޔުޓީ ބޮޑުކޮށްފައެވެ.

އެ ޤައުމުތަކުގެ ވެރިން ވަނީ އެމެރިކާގެ އެ ނިންމުމާ ގުޅިގެން ވަރަށް ބޮޑަށް ކަންބޮޑުވުންފާޅުކުރައްވައިފައެވެ.

ޓްރަމްޕް މިއަދު އިޢުލާނުކުރެއްވި ލިސްޓުގެ އެންމެ ކުރީގައި އޮތީ ވާދަވެރި ޗައިނާއެވެ. ޗައިނާއިން އެމެރިކާއަށް އެތެރެކުރާ މުދަލުން 34 ޕަސެންޓުން ޑިޔުޓީ ބޮޑުކޮށްފައެވެ. މިއީ އަދި ޗައިނާއިން އެތެރެކުރާ މުދަލުގެ ބައެއް ބާވަތްތަކުން ކުރިން ބޮޑުކޮށްފައިވާ 25 ޕަސެންޓުގެ އިތުރަށް ނަގާ ޑިޔުޓީއެކެވެ. އެހެންކަމުން، ޗައިނާއިން އެމެރިކާއަށް އެތެރެކުރާ މުދަލުގެ ބައެއް ބާވަތްތަކުން 54 ޕަސެންޓުން ޑިޔުޓީ ވަނީ ބޮޑުވެފައެވެ.

ޗައިނާގެ ކޮމާސް މިނިސްޓްރީން ނެރުނު ބަޔާނެއްގައި ވަނީ އެމެރިކާގެ މި ނިންމުމުގެ ރައްދުގައި، ޗައިނާއަށް އެތެރެކުރާ އެމެރިކާގެ މުދަލުން ވެސް ޑިޔުޓީ ބޮޑުކުރާނެ ކަމުގެ އިންޒާރުދީފައެވެ.

ނަމަވެސް، ވިޔަފާރި އާއި އިޤްތިޞާދީ ގޮތުން ކުރެވޭ މިފަދަ ހަނގުރާމައެއްގައި އެއްވެސް ފަރާތަކަށް ކާމިޔާބީއެއް ނުލިބޭނެކަމަށާއި، މުޅި ދުނިޔޭގެ ވިޔަފާރިއަށް ލޮޅުން އަރައި، ބޮޑެތި ގެއްލުންތައް ލިބޭނެކަމަށް ޗައިނާއިން ވަނީ ބުނެފައެވެ.

ބައެއް ޤައުމުތަކުން ތިބީ، އެމެރިކާ ސަރުކާރާ އެކު މަޝްވަރާކޮށްގެން، ޑިޔުޓީއަށް ލުޔެއް ހޯދޭނެކަމުގެ އުއްމީދުގައެވެ.