މާދަމާ ބާރުބޮޑުވާނެކަމަށް ލަފާކޮށް ދުރާލާ އެއަރޕޯޓަށް ދިޔުމަށް އެމްއޭސީއެލުން އިލްތިމާސްކޮށްފި

މާދަމާ މެނދުރު ފަހު ވެލާނާ އެއަރޕޯޓު ބާރުބޮޑުވާނެ ކަމަށް ލަފާކޮށް، ފުރަންދާ ފަރާތްތަކުން ދުރާލާ އެއަރޕޯޓަށް ދިދުމަށް އެ އެއަރޕޯޓް ހިންގާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން އިލްތިމާސްކޮށްފިއެވެ.

އެމްއޭސީއެލްއިން މިކަން ހާމަކޮށް މީސްމީޑިއާގައި ހިއްސާކޮށްފައިވާ ޕޯސްޓެއްގައި ވިދާޅުވީ، މާދަމާ މެނދުރު އެއަރޕޯޓު އާންމު އޮޕަރޭޝަނާއެކު ޢުމްރާއިން މީހުން އެނބުރި އަންނާނެ ކަމަށެވެ. އެހެން ކަމުން އޮޕަރޭޝަންތައް ފަސޭހަކަމާއެކު ކުރިއަށް ގެންދިއުމަށް އެއަރޕޯޓަށްދާ ފަރާތްތަކުން ވީހާވެސް އަވަހަށް ޗެކިން އަދި ސެކިއުރިޓީ ކްލިއަރެންސް ހެދުމަށް ވަނީ އިލްތިމާސްކޮށްފައެވެ.

މީގެ އިތުރުން އެއްވެސް ފަރާތަކަށް އެހީތެރިކަން ބޭނުންވާ ނަމަ އެހީތެރިކަން ފޯރުކޮށްދޭން އެއަރޕޯޓުގައި މުވައްޒަފުން ތިބޭނެ ކަމަށް އެމްއޭސީއެލްއިން ވިދާޅުވިއެވެ.

އެމްއޭސީއެލްއިން ވަނީ އުމްރާއިން މީހުން އަންނަ ފްލައިޓުތައް ދެ ގަޑިއެއްގައި އަންނާނެކަން ހާމަކޮށްފައެވެ. އެއީ މެނދުރުފަހު 2:00 އާއި ހަވީރު 4:00 ގައެވެ. އެކުންފުނިން ދަތުރުފަތުރުގެ ޚިދުމަތް ދެއްވާ ފަރާތްތަކާއި ޓެކްސީތަކުންވެސް މިގަޑިތަކުގައި އެއަރޕޯޓުގެ ޓްރެފިކް ތޮަށްޖެހުން ކުޑަކުރުމަށް އެއްބާރުލުން ދިނުމަށް އެދިވަޑައިގެންފައެވެ.

މި ރަމަޟާން މަހު ޙައްޖު ކޯޕަރޭޝަންގެ ހަވާލުގައި ޖުމްލަ 577 މީހުން ޢުމްރާގެ އަޅުކަން އަދާކުރާނެއެވެ. އޭގެތެރޭގައި މުޅި ރަމަޟާން މަހުގެ ޢުމްރާވެރިންނާ އަދި ފަހު 15އަށް ދަތުރުކުރާ މީހުން ހިމެނެއެވެ. ހައްޖު ކޯޕަރޭޝަން އިތުރުން، އަމިއްލަ ކުންފުނިތަކާއެކުވެސް މިފަހަރު ރޯދަ ޢުމްރާއަށް ގިނަ ބަޔަކު ވަނީ ގޮސްފައެވެ.