ބައިނަލްއަޤްވާމީ ޖިނާޢީ ކޯޓު، އައިސީސީގެ މެންބަރުކަމުން ވަކިވުމަށް ހަންގެރީގެ ސަރުކާރުން ނިންމައިފިއެވެ. ހަންގެރީގެ ސަރުކާރުން އައިސީސީން ވަކިވުމަށް ނިންމީ ޔަހޫދީ ބޮޑުވަޒީރު ބެންޖަމިން ނަތަންޔާހޫ ހައްޔަރު ކުރުމަށް އައިސީސީން ޢަމުރެއް ނެރެފައި ވަނިކޮށް އޭނާ ހަންގެރީއަަށް ރަސްމީ ދަތުރެއް ކުރަމުން ދަނިކޮށެވެ.
ޣައްޒާގައި ހަނގުރާމައިގެ ޖަރީމާތައް ހިންގުމުގެ ތުހުމަތުގައި ނަތަންޔާހޫއާއި ޔަހޫދީ ދިފާޢީ ވަޒީރު ޔޮއަވް ގަލަންޓް ހައްޔަރު ކުރުމަށް އައިސީސީން ޢަމުރެ ނެރުނީ މިދިޔަ އަހަރުގެ ނޮވެމްބަރު މަހުގެ ތެރޭގައެވެ. ނަތަންޔާހޫ ހަންގެރީއަށް ކުރާ މި ދަތުރަކީ އެ ޢަމުުރު ނެރުނު ފަހުން ޤައުމުން ބޭރަށް އޭނާ ކުރާ ދެވަނަ ދަތުރެވެ. މި އަހަރުގެ ފެބްރުވަރީ މަހުގެ ތެރޭގައި އޭނާ ވަނީ ޔަހޫދީންގެ އެންމެ ބޮޑު މަދަދުގާރު ކަމުގައިވާ އެމެރިކާގެ ރައީސް ޑޮނަލްޑް ޓްރަމްޕާ ބައްދަލު ކުުރުމަށް އެ ޤަައުމަށް ދަތުރު ކޮށްފައެވެ. އިޒްރޭލާއި އެމެރިކާއަކީ އައިސީސީގެ މެންބަރު ޤައުމުތަކެއް ނޫނެވެ.
ހަންގެރީއަށް ޒިޔާރަތް ކުރުމަށް އެ ޤައުމުގެ ބޮޑުބަޒީރު ވިކްޓޯ އޯބާން ނަތަންޔާހޫއަށް ދަޢުވަތު ދެއްވާފައި ވަނީ އައިސީސީއިން ޢަމުރު ނެރުމުގެ އެއް ދުވަސް ފަހުންނެވެ. އައިސީސީ އުފެއްދުމުގައި ބައިވެރިވި ޤައުމުތަކުގެ ތެރޭގައި ހިމެނޭ ހަންގެރީން އެ ކޯޓުން ހައްޔަރު ކުރުމަށް ޢަމުުރު ނެރެފައިވާ ކޮންމެ މީހަކު ވެސް އެ ޤައުމަށް ދަތުރު ކޮށްފި ނަމަ ހައްޔަރުކޮށް އައިސީސީއަށް ޙަވާލު ކުރަން ޖެހެއެވެ. ނަމަވެސް ހަންގެރީގެ ބޮޑުވަޒީރު ވަނީ އައިސީސީގެ ޢަމުރަށް އިޚްތިރާމު ނުކުރާނެ ކަމަށާއި އެ ޢަމުރާ އެއްގޮތަށް ޢަމަލު ނުކުރާނެ ކަމަށް ވިދާޅުވެފައެވެ.
ބޮޑުވަޒީރު އޯބާން ވަނީ އައިސީސީން ނަތަންޔާހޫ ހައްޔަރު ކުރުމަށް ޢަމުުރެއް ނެރުމަކީ ބަލައިގަނެވޭނެ ކަމެއް ނޫން ކަމަށް ވިދާޅުވެފައެވެ. އެއީ ޤާނޫނީ ގޮތުން އައިސީސީއަށް އެޅޭނެ ފިޔަވަޅެއް ނޫން ކަމަށް އިޒްރޭލެކޭ އެއްގޮތަށް ހަންގެރީން ވެސް ޤަބޫލު ކުރެއެވެ.
ހަންގެރީން އައިސީސީ އުފެއްދުމަށް އެކުލަވާލި ރޯމް ސްޓެޓިއުޓް މުއާހަދާގައި ސޮއި ކޮށް އައިސީސީއާ ގުޅޭނެ ކަމަށް އިޤުރާރުވީ 1999ވަނަ އަހަރުގެ ތެރޭގައެވެ. އެ ޤައުމުގެ ޤާނޫނުހަދާ މަޖިލީހުން އެ މުއާހަދާގައި ބައިވެރިވުމަށް ފާސް ކުރުމުން އެ ނިންމުން ތަސްދީޤު ކުރީ 2001ވަނަ އަހަރުގެ ތެރޭގައެވެ. ނިންމުން ތަސްދީޤު ކުރި ނަމަވެސް ހަންގެރީގެ ޤާނޫނީ ނިޒާމުގެ ތެރޭގައި އެ މުއާހަދާ ފުރިހަމައަށް ހިމަނައި ގެޒެޓު ކޮށްފައެއް ނުވެއެވެ. މި މަރުޙަލާ ފުރިހަމަ ކޮށްފައި ނުވާތީ އައިސީސީން އަޅާ އެއްވެސް ފިޔަވަޅެއް ތަންފީޒު ކުރަން ނުޖެހޭނެ ކަމަށް މިދިޔަ ނޮވެމްބަރު މަހުގެ ތެޜޭގައި ހަންގެރީގެ ބޮޑުވަޒީރުގެ ޗީފް އޮފް ސްޓާފް ގާގްލީ ގުލްޔަސް ވަނީ ވިދާޅުވެފައެވެ.
ބުރާސްފަތި ދުވަހު ގުލްޔަސް ވިދާޅުވީ އައިސީސީން ވަކިވުމުގެ މަސައްކަތް ހަންގެރީގެ ސަރުކާރުން އެ ދުވަހުން އެ ދުވަހަށް ފަށާނެ ކަމަށެވެ. އައިސީސީން ވަކިވުމަށް ހަންގެރީން ކުރަން ޖެހޭ މަސައްކަތް އަހަރެއްހާ ދުވަހަށް ދެމިގެންދާނެ ކަމަށް ބެލެވޭއިރު އައިސީސީން ވަކިވުމުގެ ބިލު އެ ޤައުމުގެ ޤާނޫނު ހަދާ މަޖިލީހުން ވަރަށް އަވަހަށް ފާސް ކުރާނެ ކަމަށް ބެލެވެއެވެ.
މިދިޔަ ފެބްރުވަރީ މަހުގެ ތެރޭގައި އައީސީސީގެ ޕްރޮސެކިއުޓަރ ކަރީމް ޚާންއާ ދެކޮޅަށް އެމެރިކާގެ ރައީސް ޑޮނަލްޑް ޓްރަމްޕް ދަތިކުރުމުގެ ފިޔަވަޅު އެޅުއްވުމުން ހަންގެރީގެ ބޮޑުވަޒީރު ވަނީ އެ ޤައުމުން އައިސީސީން ވަކިވާނެ ކަމުގެ އިޝާރާތް ކުރައްވައިފައެވެ. އޭރު އޭނާ ވިދާޅުވީ އެމެރިކާއިން އެ އިދާރާއަކާ ދެކޮޅަށް ދަތިކުރުމުގެ ފިޔަވަޅު އަޅާފައިވާ އިދާރާއެއްގެ މެންބަރެއްގެ ގޮތުގައި ހަންގެރީ އޮތް އޮތުން އަލުން މުރާޖަޢާ ކުރަން ޖެހޭ ކަމަށެވެ.
ހަންގެރީގެ ނިންމުމާ ގުޅޭގޮތުން އައިސީސީން ބުނީ އައިސީސީން ވަކިވުމުގެ ހުރިހާ މަރުޙަލާއެއް ފުރިހަމަވަންދެން ހަންގެރީން އައިސީސީއަށް ޢަދާ ކުރަންޖެހޭ ޒިންމާތައް ފުރިހަމަ ކުރަންޖެހޭނެ ކަމަށެވެ.
ހަންގެރީއަކީ އަބަދު ވެސް އިޒްރޭލާ އެއްކޮޅަށް ވަކާލާތު ކުރާ ޤައުމެކެވެ. އިޒްރޭލަށް ފާޑު ކިޔައި ވިލާތުގެ އިއްތިހާދުން ނެރޭ ބަޔާންތަކާއި އަޅާ ފިޔަވަޅުތަކަށް ހުރަސް އެޅުމަށް ހަންގެރީން އަބަދު ވެސް އޮންނަނީ ތައްޔާރަށެވެ.