ޔަހޫދީ ފައުޖު ރަފަޙަށް އަރައިގަތުމުން ޣައްޒާގެ އެތައް ހާސް ރައްޔިތުންނެއް އަނެއްކާ ވެސް އެހެން ސަރަޙައްދުތަކަށް
ފަލަސްޠީނުގެ ޣައްޒާއަށް ޔަހޫދީން ދެމުންދާ ޢުދުވާނީ ޙަމަލާތަކުގައި ޔަހޫދީ ފައުޖުން ރަފަޙަށް ވަދެގަތުމުން ޣައްޒާގެ އެތައް ހާސް ރައްޔިތުންނެއް އެ ރަށް ދޫކޮށް އެހެން ސަރަޙައްދުތަކަށް ދާން ފަށައިފިއެވެ. މިއީ 2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހު ޔަހޫދީން ޣައްޒާގެ ރައްޔިތުން ނަސްލެހޭދު ކުރުމަށް ހަނގުރާމަ ފެށި ފަހުން އެންމެ ގިނަ ޢަދަދެއްގެ މީހުން ގެދޮރު ދޫކުރުމަށް މަޖުބޫރުވެ އެހެން ސަރަޙައްދުތަކަށްދާ އެއް ޙާލަތެވެ.
ޔަހޫދީ ފައުޖު ރަފަޙަށް ވަދެގަނެފައި މި ވަނީ ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރުމަށް ހިންގަމުންދާ ޤަތުލުޢާންމު ފުޅާކޮށް، އިތުރު ބިންތަކެއް ފޭރިގަންނާނެ ކަމުގެ އިންޒާރު ޔަހޫދީ އަސްކަރިއްޔާއިން ދިނުމުގެ އެއް ދުވަސް ފަހުންނެވެ. ރަފަޙަކީ ޣައްޒާގެ އެކި ސަރަޙައްދުތަގައި ތިބި މީހުން އެ ސަރަޙައްދުތައް ދޫކޮށް ދިޔުމަށް މަޖުބޫރުވުމުން ރައްކާތެރިކަން ހޯދުމަށް އެ ތަނަކަށް އެތައް ހާސް ބަޔަކު ޖަމާވަމުން ދިޔަ ތަނެކެެވެ.
ޣައްޒާގެ ޞިއްޙީ ވުޒާރާއިން ބުނީ ޔަހޫދީން ދެމުންދާ ޢުދުވާނީ ޙަމަލާތަކުަގައި ފާއިތުވި 24 ގަޑިއިރުގެ ތެރޭގައި ޣައްޒާގެ 97 މީހުން ޝަހީދު ކޮށްލާފައިވާ ކަމަށެވެ. އޭގެ ތެރޭގައި ފަތިސް ގަޑީގައި ޣައްޒާގެ އުތުރުގެ ސަރަޙައްދެއް ކަމަށްވާ ޝުޖާޢިއްޔާއަށް ދިން ވައިގެ ޙަމަލާތަކެއްގައި ޝަހީދު ކޮށްލި 20 މީހުންނާއި ގެދޮރު ގެއްލިފައިވާ ގިނަ ޢަދަދެއްގެ މީހުން ހިޔާވަހިކަން ހޯދަމުންދިޔަ ސުކޫލަކަށް ދިން ޙަމަލާތަކެއްގައި ޝަހީދުވި 27 މީހުން ހިމެނެއެވެ. ޞިއްހީ އެހީތެރިން ބުނީ ތުއްފާޙު އަވަށުގައި ހުންނަ ދާރުލް އަރުޤަމް މަދަރުސާ އިމާރާތަށް ޢަމާޒު ކޮށް ޔަހޫދީން ތިން މިސައިލް ފޮނުވާފައިވާ ކަމަށެވެ. އެ ޙަމަލާގައި ޝަހީދުވި މީހުންގެ ތެރޭގައި ގިނައީ މައުސޫމު ކުޑަކުދިންނާއި ކުށެއް ނެތް އަންހެނުންނެވެ.
ޙަމާސާއި ޔަހޫދީންނާ ދެމެދު ޖަނަވަރީ 19ވަނަ ދުވަހު އަމަލު ކުރަން ފެށި ޢުދުވާން ހުއްޓާލުމުގެ އެއްބަސްވުމެއްގެ ދަށުން ޙަމަލާ ބަދަލު ކުރުން މެދުކަނޑައިލި ނަމަވެސް، އެ އެއްބަސްވުމާ ޚިލާފުވެ މާރިޗު 18ވަނަ ދުވަހު ޔަހޫދީ ފައުޖުން ވަނީ އަލުން ޣައްޒާއަށް ޙަމަލާ ދޭން ފަށައިފައެވެ. ފަހުން ދޭން ފެށި ޙަމަލާތަކުގައި މިހާތަނަށް 1،000އަށްވުރެ ގިނަ މީހުން ޝަހީދު ކޮށްލާފައިވާ އިރު ރަފަޙަށް ޢަމާޒުކޮށް ޔަހޫދީން މިހާރު ދެމުންދާ ޙަމަލާތަކަކީ ހަނގުރާމައިގެ ޙާލަތު އިތުރަށް ގޯސްކުރި ކުރިއެރުމެކެވެ.
ރައްކާތެރިކަން ހޯދުމަށްޓަކައި ރަފަޙު ދޫކޮށް ޚާން ޔޫނިސަށް ދަތުރުކުރަމުން ދިޔަ އެތައް ސަތޭކަ މީހުންގެ ތެރޭގައި ހިމެނޭ މީހަކު ބުނީ ޔަހޫދީން ރަފަޙް ބިމާ ހަމަކޮށް ވުޖޫދުން ފޮހެލާފައިވާ ކަމަށެވެ. ރަފަޙުގައި ހުރި ޢިމާރާތެއް ވިއްޔާ ޔަހޫދީން އެ އިމާރާތެއް ސުންނާފަތި ކުރަމުންދާ ކަމަަށް އޭނާ ވަނީ ބުނެފައެވެ.
ރައްކާތެރިކަން ހޯދުމަށް ޚާން ޔޫނިސަށް ގިނަ ޢަދަދެއްގެ މީހުން ދަތުރު ކުރަމުން ދިޔަ ނަމަވެސް ޚާން ޔޫނިސަށް ވެސް ޔަހޫދީން ދަނީ ވަރުގަދަ ޙަމަލާތައް ދެމުންނެވެ. ހުރިހާ ސަރަޙައްދަކަށް ޔަހޫދީން ޙަމަލާ ދެމުންދާތީ ރަައްކާތެރި އެއްވެސް އަވަށެއް ނެތުމުން ޣައްޒާގެ ރައްޔިތުންނަށް ވަނީ އުންމީދު ގެއްލި މާޔޫސްކަން ކުރިމަތިވެފައެވެ. ބައެއް މީހުން ބުނި ގޮތުގައި ޣައްޒާގެ ރައްޔިތުންނަށް މަރުވުމެކޭ ދިރިހުރުމެކޭ މިހާރު ތަފާތެއް ނެތެވެ.