ސަސްޕެންޑް ކޮށްފައިވާ ރަޝިޔާގެ ފުޓްބޯޅަ ފެޑަރޭޝަނަށް އަލުން އަނބުރާ ޔޫރަޕުގެ ފުޓްބޯޅައަށް އާދެވޭނީ މިހާރު ކުރިއަށްދާ ހަނގުރާމަ ހުއްޓާލުމުން ކަމުގައި ޔުއެފާގެ ރައީސް އެލެކްޒެންޑަރ ކެފަރިން ބުނެފި އެވެ.
2022 ވަނަ އަހަރު ރަޝިޔާއިން ޔުކްރޭން އާއި ދެކޮޅަށް ފެށި ހަނގުރާމަ އާއިއެކު ޔޫއެފާ އިން ވަނީ ރަޝިޔާއަށް ޔޫރަޕްގެ އެއްވެސް މުބާރާތެއްގައި ވާދަކުރުމުގެ ފުރުސަތު ނުލިބޭ ގޮތަށް އެގައުމުގެ ގައުމީ ޓީމާއި ކްލަބްތައް ސަސްޕެންޑްކޮށްފަ އެވެ.
ސާބިއާގެ ބެލްގްރޭޑްގައި އިއްޔެ ބޭއްވި ޔޫއެފާގެ އަހަރީ އާންމު ބައްދަލުވުމުގައި ވާހަކަ ދައްކަމުން ކެފަރިން ބުނެފައިވަނީ ރަޝިޔާގެ ސަސްޕެންޝަން އުވާލުމާއިމެދު އިތުރު އެއްވެސް ގޮތަކަށް ވިސްނާނީ ހަނގުރާމަ ނިމުމުން ކަމަށެވެ.
"އަހަރެން ވާނީ ތަކުރާރުކޮށް ޔުއެފާގެ ނިންމުމަކީ ކޮބައިކަން ބުނެފަ. ރަޝިޔާގެ ސަސްޕެންޝަން ބަދަލުކުރުމާއިމެދު އިތުރަށް ވިސްނާނީ ހަނގުރާމަ ނިމުމުން." ކެފަރިން ބުންޏެވެ.
"އެންމެ ފުރަތަމަ ރަޝިޔާ ސަސްޕެންޑް ކޮށްފައިވާނީ ފީފާ އާއިއެކު ކުރެވުނު މަޝްވަރާތަކަށްފަހު އަދި އެ ނިންމުން ބަދަލުކުރާނީވެސް އެފަރާތާއި މަޝްވަރާ ކުރުމަށްފަހު. އަދި އެއީ ރަޝިޔާއިން މިހާރު ކުރަމުންދާ ހަނގުރާމަ ނިމުމުން." ކެފަރިން އިތުރަށް ބުންޏެވެ.
ރަޝިޔާ އާއި އިޒްރޭލާއި ދެމެދު ތަފާތެއް އޮތް ކަމަށް ގަބޫލުކުރަންތޯ ނޫސްވެރިއަކު ކުރި ސުވާލެއްގެ ޖަވާބުގައި ކެފަރިން ބުނެފައިވަނީ އެ ދެ ގައުމުގެ ދެމެދުގައި އޮތް ފުޓްބޯޅައިގެ ތަފާތު ރޭންކިންއިން ފެނިގެންދާ ކަމަށާއި ނަމަވެސް ސިޔާސީ ގޮތުން ދެ ގައުމާއި ގުޅޭ ގޮތުން އޭނާއާއި ސުވާލު ނުކުރުމަށްވަނީ ބުނެފަ އެވެ.
ރަޝިޔާގެ ސަސްޕެންޝަނާއި ގުޅޭ ގޮތުން ޔޫއެފާގެ އަހަރީ އާންމު ބައްދަލުވުމުގައި ބައިވެރިވި ފީފާގެ ރައީސް މިޝޭލް ޕްލެޓީނީ ބުނެފައިވަނީ އޭނާގެ އެދުމަކީ ރަޝިޔާއިން އަލުން އަނބުރާ ފުޓްބޯޅައިގެ ތެރެއަށް އައުން ކަމަށެވެ. އަދި ފުޓްބޯޅަ އަކީ އަބަދުވެސް ބައިބައިވުން ނައްތާލާ އެންމެން އެކައްޗަކަށް ހަދާ ކުޅިވަރެއް ކަމަށެވެ.
ރަޝިޔާއިން ވަނީ 2018 ވަނަ އަހަރުގެ ވޯލްޑްކަޕް އެގައުމުގައި ބާއްވާފަ އެވެ. އަދި 2014 ވަނަ އަހަރުގެ ވިންޓަރ އޮލިމްޕިކްސްވެސް ބާއްވާފައިވަނީ ރަޝިޔާގަ އެވެ.