އައްޑޫ ސިޓީ ހުޅުދޫގައި ސިޓީ ހޮޓަލާއި ގެސްޓްހައުސްތައް ތަރައްޤީކުރުމަށް ބީލަމަށް ހުޅުވާލައިފި

އައްޑޫ ސިޓީ ހުޅުދޫގައި ސިޓީ ހޮޓާގެ އިތުރުން ޓޫރިސްޓް ގެސްޓްހައުސްތައް ތަރައްޤީކުރުމަށް ޝައުޤުވެރިވެރިވާ ފަރާތްތަކަށް ބީލަމަށް ހުށަހެޅުމުގެ ފުރުސަތު ހުޅުވާލައިފިއެވެ. އައްޑޫ ސިޓީ ކައުންސިލުން ވިދާޅުވީ، ޖުމްލަ 240 ކޮޓަރި ޓޫރިސްޓު ވިޔަފާރިއަށް ދޫކުރުމަށް ހަމަޖެހިފައިވާކަމަށެވެ.

އައްޑޫ ސިޓީ ކައުންސިލުން ވިދާޅުވީ، އެސިޓީގެ ހުޅުދޫގައި ސިޓީ ހޮޓަލެއްގެ އިތުރުން ޓޫރިސްޓް ގެސްޓްހައުސްތައް ތަރައްޤީކުރުމަށް ޝައުޤުވެރިވެރިވާ ފަރާތްތަކަށް ބީލަމުގައި ރަޖިސްޓްރީވުމަށް ހުޅުވާލާފައިވާކަމަށެވެ. ބީލަމުގައި ބައިވެރިވެވޭނީ ރަޖިސްޓްރީކޮށްފައިވާ ވަކިވަކި ފަރުދުންގެ ވިޔަފާރިތަކާއި، ކުންފުނިތަކުގެ އިތުރުން ޕަރަޓްނަރޝިޕްގައި ހިމެނޭ ފަރާތްތަކަށްކަމަށް ސިޓީ ކައުންސިލުން ވިދާޅުވެއެވެ.

ހުޅުދޫގައި ސިޓީ ހޮޓަލާއި ޓޫރިސްޓް ގެސްޓްހައުސްތައް ތަރައްޤީކުރުމަށް އެ އަވަށުގެ ދެކުނުގައި ހުންނަ ކެނަރީފް ރިސޯޓް ކައިރިން 4.65 ހެކްޓަރުގެ ބިމެއް ދޫކުރުމަށް ވަނީ ނިންމާފައެވެ. މި ބިމަކީ އާންމުކޮށްވެސް ގެސްޓް ހައުސްތަކާއި ހޮޓަލްތަކާއި ސަޕޯޓް ސާވިސްތަކަށް ދޫކުރާ ބިމެކެވެ.

އައްޑޫ ސިޓީ ކައުންސިލުން ވިދާޅުވީ، ހުޅުމީދޫގައި 11 ގެސްޓްހައުސްއާއި 2 ސިޓީ ހޮޓެލެއް ތަރައްޤީކުރުމަށް މުޅި ޖުމްލަ 13 ޕްލޮޓުގެ ބިން ދޫކުރުމަށް ނިންމާފައިވާކަމަށެވެ. މީގެ ތެރޭގައި ހިމެނެނީ 10 ކޮޓަރީގެ ޓޫރިސްޓް ގެސްޓްހައުސްތައް ތަރައްޤީކުރުމަށް ދޫކުރާ 6 ޕްލޮޓާއި، 15 ކޮޓަރީގެ ގެސްޓްހައުސްތައް ތަރައްޤީކުރުމަށް ދޫކުރާ 4 ޕްލޮޓާއި، 25 ކޮޓަރީގެ ގެސްޓްހައުސް ތަރައްޤީކުރުމަށް ދޫކުރާ 1 ޕްލޮޓެވެ.

މީގެ އިތުރުން، 60 ކޮޓަރީގެ ސިޓީ ހޮޓަލެއް ތަރައްޤީކުރުމަށް 1 ޕްލޮޓާއި، 35 ކޮޓަރީގެ ސިޓީ ހޮޓަލެއް ތަރައްޤީކުރުމަށް 1 ޕްލޮޓުގެ ބިން ދޫކުރުމަށްވެސް ވަނީ ހަމަޖެހިފައެވެ. އައްޑޫ ސިޓީ ކައުންސިލުން ކޮށްފައިވާ އިޢުލާނުގައި، ކުއްޔަށް ދޫކުރާ ބިންތައް ހިމެނޭ ސަރަޙައްދުތަކާއި، ލޮޓް ނަންބަރުތަކުގެ އިތުރުން، ދޫކުރުމަށް ހަމަޖެހިފައިވާ ބިމުގެ ބޮޑުމިނާ ގުޅޭ ޗާޓެއްވެސް ވަނީ ހިމަނާފައެވެ.

އެ ކައުންސިލުން ވިދާޅުވީ، މި ސަރަހައްދު ބީލަމަށް ހުޅުވާލުމުގެ މައިގަނޑު މަޤްޞަދަކީ، ވަޒީފާގެ ފުރުސަތުތައް އިތުރުކޮށް ރައްޔިތުންނަށް ފަތުރުވެރިކަމުގެ ނަފާ ލިބޭނެ މަގު ތަނަވަސްކޮށްދިނުންކަމަށެވެ. އަދި ރާއްޖޭގެ ފަތުރުވެރިކަމުގައި އަމިއްލަ ފަރާތްތަކުގެ އިންވެސްޓްމަންޓްތައް އިތުރުކޮށް އައްޑޫ ސިޓީގެ އިޤްތިޞާދު ކުރިއެރުވުމަކީވެސް މި މަޝްރޫޢުގެ ބޭނުމެއްކަމަށް ސިޓީ ކައުންސިލުން ވިދާޅުވެއެވެ.

އައްޑޫ ސިޓީ ކައުންސިލުން ވިދާޅުވީ، ބީލަމުގައި ރެޖިސްޓްރިވާން ބޭނުންވާ ފަރާތްތަކުން ގެޒެޓުގައިވާ އިޢުލާނުގައި ހިމެނޭ މަޢުލޫމާތުތައް ފުރިހަމަކުރުމަށްފަހު [email protected] އަށް މެއިލްކުރުމަށް އެދޭކަމަށެވެ. ބީލަމަށް ހުށަހެޅުމުގެ ސުންގަޑިއަކީ މި ހިންގާ ޖުލައި މަހުގެ 13ވަނަ ދުވަހުގެ 13:00އެވެ.

އައްޑޫ ސިޓީގައި ފަތުރުވެރިކަން ފުޅާކުރުމަށް ސަރުކާރުންވެސް ގެންދަވަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ގަން އިންޓަނޭޝަނަލް އެއަރޕޯޓުގެ މަސައްކަތް މިއަހަރު ނިންމުމަށް ހަމަޖެހިފައިވާއިރު، އެއަރޕޯޓުގެ ތަރައްޤީގެ މަސައްކަތްތަކާއެކު އައްޑޫއަށް ބައިނަލްއަޤްވާމީ އެއަރލައިންތަކުގެ ދަތުރުތައް ފެށުމަށްވެސް ސަރުކާރުން ދަނީ ކަމާގުޅޭ ފަރާތްތަކާއެކު މަޝްވަރާތައް ކުރަމުންނެވެ.

ހަމަމިއާއެކު، އައްޑޫގައި އިންޓަގްރޭޓެޑް ފަތުރުވެރިކަން ތަރައްޤީކުރުމަށް ހަންކެޑެ ތަރައްޤީގެ މަސައްކަތް ސަރުކާރުން ކުރަމުންދާއިރު އެތަނުގައި 560 ކޮޓަރި ތަރައްޤީކުރުމަށް މިދިޔަ އަހަރުގެ އޮކްޓޫބަރު މަހު ވަނީ ސޮއިކޮށްފައެވެ. މީގެ އިތުރުން އައްޑޫގައި ފަތުރުވެރިކަން ކުރިއެރުވުމަށް ޓުއަރިޒަމް ޒޯންތަކުން ބިންތައް ދޫކޮށްފައިވާއިރު، ސަރުކާރުން ވަނީ އެ ބިންތައް ދޫކޮށްފައިވާ ފަރާތްތަކަށް އިތުރު ލޯންތަކެއް ލިބޭނެ ގޮތް ހަމަޖައްސަވައިދެއްވާނެކަމަށްވެސް ވިދާޅުވެފައެވެ.