ތޮއްޑޫ މާސްޓާސް ޓީޓީ ޓޯނަމަންޓް ބާއްވަން ކުޅިވަރު ވުޒާރާއިން އެހީވެދިނުމަކީ ލިބޭ ފަހުރެއް ކަމަަށް ކުޅިވަރާއި ހަށިހެޔޮކަމާއި ބެހޭ ވަޒީރު އަބުދުالله ރާފިޢު ވިދާޅުވެއްޖެއެވެ.
ތޮއްޑޫ މާސްޓާސް ޓީޓީ ޓޯނަމަންޓަކީ އަތޮޅުތަކުގެ ތެރޭގައިވެސް ބައިނަލްއަގްވާމީ މުބާރާތްތައް ބޭއްވޭނެކަން ދައްކުވައިދޭ ކަމެއް ކަމަށް ވަޒީިރު ވިދާޅުވިއެވެ.
”މި މުބާރާތަކަކީ ރާއްޖެ، ރާއްޖޭން ބޭރަށް ދައްކުވައިދިނުމަށް އަދި ރާއްޖޭގެ ރަށްތަކުގައި މިފަދަކަންކަން ކުރެވޭނެކަން ދައްކައިދޭ އަލިގަދަ ހެއްކެއް. މިފަދަ ޕްރޮގްރާމްތައް މިއަހަރު ތެރޭގައިވެސް ރާވާފައި އެބަހުރި. އޭގެ ތެރޭގައި މިއަހަރު ބާއްވާ ކޮމަންވެލްތް ބީޗް ހޭންޑް ބޯޅަ މުބާރާތް ފާހަގަ ކޮށްލަން“ ވަޒީރު ވިދާޅުވިއެވެ.
ބައިނަލްއަގްވާމީ މުބާރާތްތައް ރާއްޖޭގައި ބޭއްވުމަށް ރައީސުލްޖުމްހޫރިއްޔާ ހިތްވަރުދެއްވާކަން ފާހަގަ ކުރައްވާ ވަޒީރު ވިދާޅުވީ ތޮއްޑޫ މާސްޓާސް ޓީޓީ ޓޯނަމަންޓް ފެށުމުގެ ރަސްމިއްޔާތު ރައީސް ޝަރަފުވެރިކޮށްދެއްވިކަމީ ރައީސުލްޖުމްހޫރިއްޔާ ކުޅިވަރަށް ދެއްވާ އަހަންމިއްޔަތުކަން ދައްކުވައިދޭ އަލިގަދަ ހެއްކެއްކަމަށެވެ.
މީގެ ކުރީގައި ފެންނަނީ ރާއްޖޭގެ ޓީމުތައް ރާއްޖޭން ބޭރަށް ގޮސް މުބާރާތްތައް ކުޅޭތަން ކަަމަށާއި އެހެންނަމަވެސް މިހާރު ބައިނަލްއަގްވާމީ މުބާރާތްތައް ރާއްޖެއަށް ގެނެވޭ ކަމަށް ފާހަގަކުރައްވާ ވަޒީރު ވިދާޅުވީ މީގެ ކުރިން ބައިނަލްއަގްވާމީ މުބާރާތްތައް ބޭއްވެނީ ހަމައެކަނި މާލޭގަކަމަށެވެ.
އެހެންނަމަވެސް މިހާރު ރާއްޖޭގެ ރަށްތަކުގައި ބައިނަލްއަގްވާމީ މުބާރާތްތައް ބޭއްވޭކަން ފާހަގަ ކުރައްވާ ވަޒީރު ވިދާޅުވީ ކުޅިވަރު ގާނޫނުގައިވެސް އޮތީ މުޅި ރާއްޖެ ޝާމިލްވާ ގޮތަށް ކުޅިވަރުތައް ކުރިއެރުވުން ކަމަށް ވަޒީރު ވިދާޅުވިއެވެ.
އޭގެތެރޭގައި ޓޭބަލް ޓެނިހަކީ ރާއްޖެއަށް ވަރަށް ފަހުރުވެރި ވަނަތަކެއް ހޯދައިދީފައިވާ ކުޅިވަރެއް ކަމަށާއި މި ކުޅިވަރު ކުރިއެރުވުމަށްޓަކައި މިހާރުވެސް ޓީޓީ ހޯލެއް ގާއިމުކުރުމުގެ މަސައްކަތް ކުރިޔަށް ގެންދާ ކަމަށް ވަޒީރު ފާހަގަ ކުރެއްވިއެވެ.
ވަޒީރު ވިދާޅުވީ މާސްޓަރސް ޓީޓީ ޓޯނަމަންޓް ރާއްޖޭގައި ފުރަތަމަ ފަހަރަށް ބޭއްވޭނެގޮތް ހަމަޖައްސައިދިނީތީ އިހާ އެކަޑަމީ އާއި ތޮއްޑޫ ލޯކަލް ކޮންޕެނީއަށް ޝުކުރު އަދާކުރައްވާކަމަށެވެ.
މި ޓޯނަމަންޓަށް ރައީސް ވަގުތު ދެއްވިކަމީ ކުޅިވަރަށް ރައީސް ދެއްވާ އަހަންމިއްޔަތުކަން ހާމަވާ އަލިގަދަ ހެއްކެއްކަމަށާއި އެހެންކަމުން ކުޅިވަރު އާއިލާގެ ނަމުގައި ރައީސްއަށް ޝުކުރު ދަންނަވާ ކަމަށް ވަޒީރު ވިދާޅުވިއެވެ.
ތޮއްޑޫ މާސްޓާސް ޓީޓީ މުބާރާތަކީ 40 އަހަރުންމަތީގެ އުމުރުފުރާތަކަށް ޚާއްސަކޮށްގެން ކުރިއަށްގެންދާ މުބާރާތެކެވެ. މި މުބާރާތުގައި ހަ އުމުރުފުރައަކުން ކުޅުންތެރިންވާދަކުރެއެވެ. އޭގެ ތެރޭގައި 40 އަހަރުންމަތި، 40 އަހަރާ 49 އަހަރާ ދެމެދު، 50 އަހަރާ 59 އަހަރާ ދެމެދު، 60 އަހަރާ 64 އަހަރާ ދެމެދު، 65 އަހަރާ 69 އަހަރާ ދެމެދު އަދި އޭގެ އިތުރުން 70 އަހަރުންމަތީގެ އުމުރުފުރާ ހިމެނެއެވެ.
މި މުބާރާތުގައި އަށާރަ ގައުމަކުން ސަތޭކައަށްވުރެ ގިނަ ކުޅުންތެރިން ވާދަކުރެއެވެ. އޭގެތެރޭގައި އިންޑިއާ، ރަޝިޔާ އަދި ޗައިނާ ޖަރުމަނު، ސްޕެއިން، ނިއުޒީލެންޑް އަދި އެމެރިކާއިން ބައިވެރިވެއެވެ.
ސިންގަލްސް، ޑަބަލްސް އަދި މިކްސްޑް ޑަބަލްސް ކެޓަގަރީތައް ހިމެނޭނެހެން ކުރިޔަށްދާ މި މުބާރާތުގެ ކުޅުން ކުރިޔަށްދާނީ ތޮއްޑޫ ސްކޫލުގައެވެ. މިއީ ރާއްޖޭގައި މިގޮތަށް ބޭއްވޭ އެންމެ ބޮޑު ޓީޓީ މުބާރާތެވެ.