މާލޭގައި ނިމިގެންދިޔަ އައިޓީއެފް ޖޭ30 ޓެނިސް މުބާރާތުގެ ސަބަބުން ރާއްޖޭގެ ކުޅުންތެރިންގެ ފެންވަރު މަތިވެއްޖެ ކަމަށާއި، އެގޮތުން ސިންގަލްސްގެ ސެމީ ފައިނަލަށް ރާއްޖޭގެ ނަބާ ނިޝާން ދިޔުމަކީ ބޮޑު ކާމިޔާބީއެއް ކަމަށް ޑަބަލްސް އިވެންޓުގެ ޗެމްޕިއަންކަން ހޯދި އާރާ އާސަލް އާޒިމް ބުނެފިއެވެ.
ދެވަނަ ހަފްތާގެ ފައިނަލް މެޗު ކާމިޔާބުކުރުމަށްފަހު ޕީއެސްއެމް ނިއުސްއަށް ދިން އިންޓަވިއުއެއްގައި އާރާ ބުނީ ނޫހު އާއި ދާއޫދު ޑަބަލްސްގެ ސެމީ ފައިނަލަށް ދިއުމަކީވެސް ވަރަށް ބޮޑު ކާމިޔާބީއެއް ކަމަށާއި ރާއްޖޭގެ ކުޅުންތެރިން ދެއްކީ ވަރަށް މޮޅު ކުޅުމެއް ކަމަށެވެ.
ޑަބަލްސް އިވެންޓުގެ ޗެމްޕިއަންކަން ހޯދި އާރާ އާއި ތަައިލޭންޑްގެ ޓަރީޓާ ހޮންގޔޮން ބުނީ ފައިނަލަށް ނިކުތީ ވެވުނު އެންމެ ރަނގަޅަކަށް ތައްޔާރުވެގެން ކަމަށެވެ.
ފައިނަލް މެޗުގެ ތަޖުރިބާ ހިއްސާ ކުރަމުން އާރާ ބުނީ ފައިނަލަށް ނިކުތީ ފުރަތަމަ ހަފްތާއިން ވަރަށް ބޮޑަށް ތަޖުރިބާ ހޯދައިގެން ކަމަށެވެ. ޓަރީޓާ ބުނީ ދެވަނަ ހަފްތާގެ ފައިނަލަށް ނިކުތްއިރު ހާސްކަމެއް ހުރި ކަމަށާއި އެހެންނަމަވެސް މެންޓަލީ ވެވުނު އެންމެ ރަނގަޅަކަށް ތައްޔާރުވެ ދެވުނު އެންމެ ރަނގަޅު ފައިޓެއްދީގެން މާބޮޑަށް ހާސްނުވެ ކުޅެވޭތޯ ބެލި ކަމަށެވެ.
އާރާ ބުނީ މި މުބާރާތަށް ތަައްޔާރުވުމަށް އޭނާ ޓްރޭނިން ހަދަމުންދިޔަ ތައިލޭންޑްގެ އެކަޑަމީ ކޯޗުންނާއި ރާއްޖޭގެ ޓެނިސް އެސޯސިއޭޝަންގެ ކޯޗުންނާއި ރާއްޖޭގެ އެކަޑަމީގެ ކޯޗުންވެސް ވަރަށް ބޮޑަށް އެހީތެރިވެދިން ކަމަށެވެ. އަދި މައިންބަފައިންނާއި އާއިލާ އެންމެންގެ ފަރާތުންވެސް ވަރަށް ބޮޑަށް ސަޕޯޓް ލިބުނުކަން ފާހަގަކޮށް އާރާ ވަނީ އެފަރާތްތަކަށް ޝުކުރު އަދާކޮށްފައެވެ.
އާރާ ވަނީ ސިންގަލްސްގައި ކުއާޓަރ ފައިނަލާ ހަމައިން ކަޓާފައެވެ. އެހެންނަމަވެސް ދެ ހަފްތާގައިވެސް ޑަބަލްސް އިން ޗެމްޕިއަންކަން ހޯދާ އާރާ ވަނީ ރާއްޖެއަށް ތާރީހީ ކާމިޔާބީއެއް ހޯދަދީފައެވެ. އެގޮތުން އައިޓީއެފް މުބާރާތެއް ކާމިޔާބުކުރި ފުރަތަމަ އެތުލީޓަކީ އާރާއެވެ.