ދިވެހި މާއްދާގެ ދޭހައިގެ ސުވާލުތަކަށް އަހުލުވެރިކުރުމަށް ޚާއްސަ ފޮތެއް

ސާނަވީ ދަރިވަރުންނަށް އަމާޒުކޮށްގެން ދިވެހި މާއްދާގެ ދޭހައިގެ ސުވާލުތަކަށް އަހުލުވެރިކުރުމަށް ފޮތެއް ނެރެފިއެވެ.

"އަޅުގަނޑުގެ ދޭހަ ފޮތް 2"ގެ ނަމުގައި ތައްޔާރުކޮށްފައިވާ މި ފޮތުގެ ލިޔުންތަކާއި ދޭހައިގެ ސުވާލުތައް ބައްޓަންކޮށްފައިވަނީ ސާނަވީ ދަރިވަރުންގެ މުޤައްރަރާ އެއްގޮތްވާ ގޮތަށެވެ. ދިވެހިބަހަށް ގިނަ ޚިދުމަތްތަކެއްކޮށްދެއްވަމުން ގެންދަވާ އަލްއުސްތާޛު ޙަސަން ޒަހީނު ލިޔުއްވި މިފޮތް ނެރެދެއްވީ މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާގެ އެޑްވައިޒަރު އަދި ދިވެހިބަހުގެ އެކަޑަމީގެ ބަސްކޮމިޓީގެ ރައީސް ހަމްދޫން ހަމީދެވެ.

ފޮތާ ގުޅޭގޮތުން ވާހަކަދައްކަވަމުން މުޞައްނިފު ޙަސަން ޒަހީނު ވިދާޅުވީ ދޭހައިގެ ފިލާވަޅުތައް ނަގައިދިނުމުގައި މި ފޮތް ވާނީ މުދައްރިސުންނަށް ލިބޭ ބޮޑު އެހީއަކަށް ކަމަށެވެ. ފޮތުގައި ހުރި ދޭހަތައް ބައްޓަންކޮށްފައިވަނީ ދަރިވަރުންގެ އުޅުމަށް ހެޔޮ ބަދަލުތަކެއް ގެނެވޭނެ ގޮތަށެވެ. އަދި މިފޮތުގައި ވަޒަންކުރުމާއި މަތީ ދަރަޖައިގެ ސުވާލުތަކާއި އާދައިގެ ގޮތަކަށް ވިސްނަން މަޖުބޫރުކުރުވާ ގިނަ ސުވާލުތަކެއް ހިމެނޭނެކަމަށް ޒަހީނު ވިދާޅުވިއެވެ.

"ކުދިން ޝައުޤުވެރިވާނެ ގޮތަކަށް ފޮޓޯއާއި މަންޒަރު ހިމަނާފައިވާނެ. ފޮތުގެ އެންމެ ފަހު ބައިގައި ހުރިހާ ދޭހައެއްގެ ޖަވާބު އޮންނާނެ. މި ފޮތުގައި ތަފާތު ދާއިރާތަކުގެ ލިޔުންތައް ހިމެނޭނެ." ޒަހީނު ވިދާޅުވިއެވެ.

"އަޅުގަނޑުގެ ދޭހަ ފޮތް 2" އެކި ބުކްޝޮޕްތަކުގައި މިހާރު ލިބެން ހުންނާނެއެވެ. މި ފޮތުގެ އަގަކީ 150 ރުފިޔާއެވެ. މި ފޮތުގެ އެންމެ ފުރަތަމަ ބައި ނެރެފައިވަނީ 2013 ވަނަ އަހަރު އޭރުގެ މުޤައްރަރާ އެއްގޮތަށެވެ.