"ބޮޑުތަކުރުފާނުގެ ޖިހާދުގައި ށ. އަތޮޅު ރައްޔިތުން އޭރު ދެއްކެވި ނަމޫނާއިން އިބުރަތް ޙާޞިލްކުރުން މުހިންމު"

މިލަދުންމަޑުލު އުތުރުބުރި ނުވަތަ ށ. އަތޮޅަކީ، ދިވެހިރާއްޖެ ޕޯޗުގީޒުންގެ އަޅުވެތިކަމުން މިނިވަންކުރުމަށް ބޮޑުތަކުރުފާނު ކުރެއްވި ޖިހާދުގައި ފާހަގަކޮށްލެވޭ ވަރަށް ޚާއްސަ އަތޮޅެއް ކަމަށާއި، އެޖިހާދުގައި ށ. އަތޮޅު ރައްޔިތުން އޭރު ދެއްކެވި ނަމޫނާއިން އިބުރަތް ހާސިލްކުރުން މުހިންމުކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.

ވަޒީރު މިހެން ވިދާޅުވީ، ރާއްޖޭގެ ޤައުމީ ދުވަސް އަތޮޅު ފެންވަރުގައި ފާހަގަކުރުމަށް މިލަދުންމަޑުލު އުތުރުބުރީ ބިލެތްފަހީގައި ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

ދިވެހި ގައުމިއްޔަތު ދިރުވައި އާލާކުރުމަށް ކުރެވެމުންދާ މަސައްކަތްތަކުގެ ތެރެއިން، ބޮޑުތަކުރުފާނުގެ ޖިހާދުގެ ތާރީޚަށް އަލިއަޅުވައިލައްވައި ދެއްކެވި ވާހަކަފުޅުގައި، ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް އުމަރު ވަނީ އެޖިހާދުގައި ށ. އަތޮޅުން ވަރަށް ބޮޑު ޚިދުމަތެއް ކޮށްދެއްވާފައިވާކަމަށް ތާރީޙުން ފެންނަންހުރިކަމަށް ވިދާޅުވެފައެވެ.

ވަޒީރު އާދަމް ޝަރީފް ވިދާޅުވީ، ދިވެހިންގެ ޝަރަފާއި ކެރުމުގެ ރަމްޒުކަމުގައިވާ ކަޅުއޮށްފުންމިއަށް ބޭނުންވި ރިޔާ، އެ ޖިހާދުގައި ބޮޑުތަކުރުފާނަށް ލިބިގެންދިޔައީ ށ. މަރޮށިންކަމަށެވެ. މީގެ އިތުރުން، ކަޅުއޮށްފުންމި އައިސް މަޑުކުރަނީވެސް މަރޮށީގައި އެކަމަށް ޚާއްސަކުރެވިފައިވާ ބަނދަރެއްގައި ކަމަށް ތާރީޚު ހެކިދޭ ކަމަށެވެ. މިކަންކަމަކީ ށ. އަތޮޅާއި ބޮޑުތަކުރުފާނުގެ ޖިހާދުގެ ގުޅުން ވަރުގަދަކޮށްދޭ ތާރީޚީ ހަޤީގަތްތަކެއްކަމަށް ވަޒީރު ފާހަގަކުރެއްވިއެވެ.

"އަޅުގަނޑު ހިތުން ޕޯޒުގީޒުންނަށް އަރަން ފަސޭހަ ރަށެއްގައި ކަޅުއޮށްފުންމި އޮންނަކަން މީހަކު ބުނުމުގެ ފުރުސަތު އޮތްކަމެއް އެކަމަކީ. އެހެންނަމަވެސް ވަރަށް އިޙްލާސްތެރިކަމާއި ޤައުމަށް އޮތް ލޯތްބާއެކީގައި ބޮޑުތަކުރުފާނުގެ ޖިހާދުގައި އެވީ ހުރިހާ ދުވަހެއް ވެގެންދިޔައިރުވެސް މަރޮށީގެ ލޮބުވެތި ރައްޔިތުން އެ ޖިހާދުގައި އަމަލި ގޮތުން ބައިވެރި ނުވިއެއްކަމަކު އެދެއްކެވި އިހުލާސްތެރިކަމަކީ އަޅިގަނޑުމެން މިއަދު އިބުރަތް ހާސިލްކުރަންޖެހޭ ކަމެއް." ވަޒީރު އާދަމް ޝަރީފް ވިދާޅުވިއެވެ.

ޕޯޗުގީޒުންފަދަ ކަނޑުގެ ބާޒުގެ ގޮތުގައި މަޝްހޫރުވެފައިވާ ބަޔަކާއި ދެކޮޅަށް ހަނގުރާމަ ކުރެއްވިއިރު، ރާއްޖޭގެ ކަނޑުއޮޅިތަކާއި ރަށްރަށް އުފެދިފައި ހުރިގޮތް ވަރަށް ރަނގަޅަށް ދެނެވަޑައިގަންނަވާ ބޭފުޅަކަށް ބޮޑުތަކުރުފާނު ވާތީ، ދެ ކޮމަންޑޫ ބުރިކޮށްލާފައި، ދެ ކޮމަންޑޫ ދޭތެރެއިން ކަޅުއޮށްފުންމި ދަތުރުކުރި ވާހަކައަށްވެސް ވަޒީރު ވަނީ އަލިއަޅުވާލައްވާފައެވެ. މިއީވެސް މިތާރީޚީ ޖިހާދާއި، ށ. އަތޮޅާއި ގުޅުވައިދޭ މުހިންމު ކަމެއްކަމަށް ވަޒީރު ވިދާޅުވިއެވެ.

ޤައުމިއްޔަތު ދިރުވައި އާލާކުރުމަށް މަސައްކަތް ކުރަމުންދާއިރު، ދިވެހިރާއްޖޭގައި ހުރި އާސާރުތަކާއި، ޒަމާންވީ މަސައްކަތްތައް ދިރުވައި އާލާކުރުމަކީ ޤައުމީ ދުވަސް ފާހަގަކުރާއިރު ވަރަށް މުހިންމު ކަމެއްކަމަށް ވަޒީރު އާދަމް ޝަރީފް ވިދާޅުވިއެވެ.