މޯލްޑިވިއަނުން އެއަރ އިންޑިއާ އާއެކު އެއްބަސްވުމެއް!
-
އެއަރ އިންޑިއާއިން އަންނަ ފަތުރުވެރިންނަށް ރާއްޖޭގެ 16 މަންޒިލަކަށް ދަތުރުކުރެވޭނެ
-
އިންޑިއާއަކީ، ފަތުރުވެރިކަމުގައި މުހިންމު މާކެޓެއް
ދިވެހިރާއްޖޭގެ ގައުމީ އެއަރލައިން މޯލްޑިވިއަންއާއި، އެއަރ އިންޑިއާއާއި ދެމެދު ދަތުރުފަތުރުގެ ގުޅުންތައް އިތުރަށް ހަރުދަނާ ކުރުމަށް އެއްބަސްވުމެއް ޤާއިމްކޮށްފިއެވެ.
މިއީ، ސަރަޙައްދީ އަދި އެތެރޭގެ އުދުހުންތަކުގައި ފަސެންޖަރުންގެ ދަތުރުފަތުރުގެ ޚިދުމަތްތައް ހަރުދަނާ ކުރުމަށް ޤާއިމްކުރި އެއްބަސްވުމެއް ކަމަށް މޯލްޑިވިއަނުން ވަނީ ވިދާޅުވެފައެވެ.
މި އެއްބަސްވުމުގެ ދަށުން އެއަރ އިންޑިއާއިން ރާއްޖެ އަންނަ ފަތުރުވެރިންނަށް، މޯލްޑިވިއަންއިން ރާއްޖޭގެ 16 ސަރަހައްދަކަށް ދަތުރުކުރާ ފްލައިޓްތަކުގައި ފަސޭހަކަމާއިއެކު ދަތުރުކުރެވޭނެ މަގު ފަހިވެގެންދާނެއެވެ. މީގެ އިތުރުން މި ބައިވެރިވުމުގެ ސަބަބުން މޯލްޑިވިއަންއިން އިންޑިއާއަށް ކުރާ ދަތުރުތަކުގައި ދިއްލީއާއި، މުމްބާއީ ފަދަ ސިޓީތަކުން އިތުރު ފަސެންޖަރުން ހޯދުމަށް މަގުފަހިވެގެންދާނެއެވެ.
މިކަމުގެ ސަބަބުން އިންޑިއާއާއި ދިވެހިރާއްޖެއާ ދެމެދު ދަތުރުކުރާ ފަސެންޖަރުންނަށް ވައިގެ ދަތުރުފަތުރުގެ ގުޅުންތަކާއި، ލިބޭ ފަސޭހަތައް އިތުރަށް ހަރުދަނާ ވެގެންދާނެ ކަމަށް މޯލްޑިވިއަނުން ވަނީ ވިދާޅުވެފައެވެ.
A new connection takes flight.✈️
— MaldivianAero (@MaldivianAero) December 5, 2025
Maldivian and Air India have partnered to offer smoother travel across our network.
Learn More: https://t.co/uyeAuISaIf#Maldivianaero pic.twitter.com/kyF70fARjd
މޯލްޑިވިއަންގެ މެނޭޖިންގ ޑިރެކްޓަރ އިބްރާހީމް އިޔާސް ވިދާޅުވީ، މި ބައިވެރިވުމަކީ ދިވެހިރާއްޖެއަށް ދަތުރުތައް ކުރުމަށް އިތުރަށް ފަސޭހަ ކުރުމަށާއި، މާލެ ފިޔަވައި އެހެން އަތޮޅުތަކަށް ދަތުރުކުރާ ފަސެންޖަރުންނަށް ގުޅުންތައް ފަހިކޮށްދިނުމަށް އެ ކުންފުނިން ކުރާ މަސައްކަތުގައި ލިބުނު ކުރިއެރުމެއް ކަމަށެވެ. މިއާއިއެކު ދެ ޤައުމުގެ ފަތުރުވެރިކަމާއި، ވިޔަފާރިއާއި، ދަތުރުފަތުރުގެ ދާއިރާއަށް ކުރިއެރުންތަކެއް ލިބޭނެ ކަމަށްވެސް އޭނާ ވިދާޅުވިއެވެ.
އެއަރ އިންޑިއާގެ ޗީފް ކޮމާޝަލް އޮފިސަރ ނިޕުން އަގަރަވާލް ވިދާޅުވީ، އިންޑިއާގެ ފަތުރުވެރިންނަށް ދިވެހިރާއްޖެއަކީ އަބަދުވެސް އެންމެ މަޤުބޫލު މަންޒިލް ކަމަށެވެ. އަދި މި އެއްބަސްވުމާއިއެކު އެއަރ އިންޑިއާގެ ފަސިންޖަރުންނަށް ރާއްޖޭގެ އެކި ކަންކޮޅުތަކަށް ދަތުރު ކުރުމުގެ ފުރުސަތު ލިބި، ފަސޭހަވެގެންދާނެ ކަމަށްވެސް އޭނާ ވިދާޅުވިއެވެ.
މި ބައިވެރިވުމާއިއެކު ދެ އެއަރލައިންގެވެސް ސަރަޙައްދީ އެއްބާރުލުން އިތުރުކުރެވި، ނެޓްވޯކް ގުޅުންތައް ހަރުދަނާވެ، ދަތުރުފަތުރުގެ ފަސޭހަތައް ލިބި ކަސްޓަމަރުންނަށް ލިބޭ ތަޖުރިބާ ރަނގަޅު ވެގެންދާނެ ކަމަށް މޯލްޑިވިއަނުން ވަނީ ވިދާޅުވެފައެވެ.