ޞިއްޙަތަށް ނުރައްކާވާ މިންވަރަށް ވައިނުސާފުވެ ރެޑް އެލާޓްގައި!

ސިއްހަތަށް ނުރައްކާވާ މިންވަރަށް މާލެ ސަރަހައްދުގައި މިއަދު ވައި ނުސާފުކަމަށް އެއަރ ކޮލިޓީ އިންޑެކްސް މޮނިޓާތަކުން ދައްކައިފިއެވެ.

ގައުމީ ޔުނިވާސިޓީގެ ސެންޓަ ފޯ މެރިޓައިމް ސްޓަޑީސްގެ ކެމްޕަސް އިމާރާތުގައި ބަހައްޓާފައިވާ އެއާ ކޮލިޓީ މޮނީޓަރިން ސިސްޓަމުން ދައްކާ ގޮތުން، މާލެ ސަރަހައްދުގެ ވައިގެ ކޮލިޓީ މި ވަގުތު ހުރީ 170 ގައެވެ. އެޗްޕީއޭގެ އިންޑެކްސް ބުނާގޮތުން އެއާ ކޮލިޓީ އިންޑެކްސް 151-200 އާ ދެމެދުގައި ހުންނަ ނަމަ ނެރެނީ ރެޑް އެލާޓެވެ. އޭގެ މަނާއަކީ ވައިގެ ނުސާފުކަން ހުރީ އެންމެންނަށް ނުރައްކާވާ މިންވަރަށެވެ.

މާލެ ސަރަހައްދު ރެޑް އެލާޓުގައި އޮތް އިރު، މިހާލަތުގައި ނާޒުކު ހާލަތްތަކުގައިވާ ފަރާތްތަކުގެ އިތުރުން އެހެން މީހުނަށްވެސް ނޭވާލާ ނިޒާމުގެ މައްސަލަތައް ޖެހުމުގެ ފުރުޞަތު ބޮޑެވެ. ނާޒުކުރު ހާލަތްތަކުގައިވާ މީހުންގެ ތެރޭގައި ތުއްތު ކުދިންނާއި އުމުރުން ދުވަސްވީ މީހުން، މާބަނޑު މީހުން، ނޭވާލާ ނިޒާމާއި ހިތުގެ ބައްޔައް ފަރުވާ ކުރާ މީހުން، އެލާރޖީ މައްސަލަ ހުންނަ މީހުން ހިމެނޭކަމަށް އެޗްޕީއޭއިން ވިދާޅުވިއެވެ.

އެގޮތުން އެފަދަ މީހުން ބޭރުގައި ކުޅިވަރު ކުޅުމާއި ކަސްރަތުކުރުން ފަދަ ކަންތައްތައް ކުރުން މަޑުޖައްސާލުމާއި ބޭރަށް ނުކުންނަން ޖެހޭ ހާލައްތަކުގައި އެން95 މާސްކު އެޅުމަށް އެޗްޕީއޭއިން ވަނީ އިލްތިމާސްކޮށްފައެވެ. އަދި ބޭރުގެ ނުސާފު ވައި ނުވަންނާނެހެން ގޭގެ ދޮރުތައް ލައްޕާފައި ބެހެއްޓުމާއި އެއަރ ޕިއުރިފައިއަރ ބޭނުންކުރުން މުހިންމުކަމަށް ވިދާޅުވިއެވެ.

މާލެ ސަރަޙައްދު ރަތް ސަމާލުގައި އޮތްއިރު މެދުތެރޭގެ ބައެއް ސަރަޙައްދުތައް އޮތީ އޮރެންޖް ސަމާލުގައެވެ. އަދި ރާއްޖޭގެ ބައެއް ސަރަޙައްދުތައް އޮތީ ރީނދޫ ސަމާލުގައެވެ. މިހާލަތުގައިވެސް ނޭވާލާ ނިޒާމުގެ މައްސަލަތައް ޖެހުމުގެ ފުރުޞަތު ބޮޑު، ނާޒުކު ހާލަތުގައިވާ ފަރާތްތައް ބޭރުގައި އުޅުމުން ދުރުހެލިވާން ޖެހެއެވެ. އަދި އެފަދަ ފަރާތްތަކުން ބޭރުގައި ކުޅިވަރު ކުޅުމާއި ކަސްރަތުކުރުން ފަދަ ކަންކަމުން މިހާލަތުގައި ދުރުހެލިވާންޖެހެއެވެ. އަި ބޭރަށް ނުކުންނަން ވާނީ މާސްކު އަޅައިގެނެެވެ.

ވައި ސާފު މިންވަރު ހުންނަ ވަރު ގަވާއިދުން ބައްލަވާ ރައްކާތެރިކަމުގެ ފިޔަވަޅުތައް އެޅުއްވުމަށް ސަމާލުވެލައްވާ!
ވައި ސާފު މިންވަރު ބެލުމަށް މިނިސްޓްރީ އޮފް ޓޫރިޒަމް އެންޑް އެންވަޔަރަމެންޓްގެ ލިންކް އިން https://t.co/A0zz3pEFrP ނުވަތަ IQAir Visual އެޕް އަޅުއްވައިގެން ބައްލަވާ.… pic.twitter.com/SlQyWnA7fr

— Health Protection Agency (@HPA_MV) December 22, 2025

އެޗްޕީއޭއިން ވިދާޅުވީ ވައި ސާފު މިންވަރު ބެލުމަށް މިނިސްޓްރީ އޮފް ޓޫރިޒަމް އެންޑް އެންވަޔަރަމެންޓްގެ އައިކިއު އެއަރ http://iqair.com/maldives ނުވަތަ އެޕް މެދު ވެރިކޮށް ވައި ނުސާފު މިންވަރަށް ބަލާ، ރައްކާތެރިކަމުގެ ފިޔަވަޅުތައް އަޅުން މުހިންމުކަމަށެވެ.

ރާއްޖެ ސަރަޙައްދުގެ ވައި މިދުވަސްވަރު ނުސާފުވެފައިވަނީ، އިރުވައި މޫސުމުގައި ރާއްޖޭގެ އުތުރުން އިންޑިއާ އަދި ހިމާލިޔާ ސަރަޙައްދުން ވައި ޖެހުމާއެކު އަންނަ ދުމާއެކުގައެވެ.