ކުޅިވަރު

ނެޓްބޯޅަ އޮފީސް ކުންފުނި މުބާރާތް 2ވަނަ ފަހަރަށް ފަސްކޮށްފި


އިންޓަރ އޮފީސް ކުންފުނިތަކުގެ ނެޓްބޯޅަ މުބާރާތުގައި ބައިވެރިވުމުގެ މުއްދަތު ދެވަނަ ފަހަރަށް އިތުރުކޮށްފިއެވެ.

 ކުރިން މިމުބާރާތުގައި ބައިވެރިވުމުގެ މުއްދަތު މިއަދަށް ހަމަވާގޮތަށް އޮތްނަމަވެސް މިހާރު މިމުބާރާތުގައި ބައިވެރިވުމުގެ އެންމެ ފަހު ތާރީހަކީ މިމަހުގެ 19ވަނަ ދުވަސްކަމަށް ނެޓްބޯޅަ އެސޯސިއޭޝަންއިން މަޢުލުމާތުދިނެވެ. ނެޓްބޯޅަ އެސޯސިއޭޝަންއިންބުނީ 2ވަނަ ފަހަރަށް މުބާރާތް ފަސްކުރަން މިޖެހުނީ މޫސުން ތަންނުދިނުމާ ޓީމްތަކަށް އެކަށީގެންވާ ގޮތުގައި ފަރިތަކުރުންތަށް ކުރިއަށް ނުގެންދެވުމުގެ ސަބަބުން ޓީމްތަކަށް ދިމާވެފައިވާ ދަތިތަކުގެ އިތުރުން ގިނަ އޮފީސް އަދި ކުންފުނިތަކުގެ އެދުމުގެ މަތީންކަމަށް އެ އެސޯސިއޭޝަނުން ބުނެއެވެ. އަދި ކުރިއަށް އީދު ބަންދު އޮތުމާއެކު، އޮފީސް އަދި ކުންފުނިތަކުގެ މުއައްފަޒުން ޢީދު ބަންދާ ދިމާކޮށް ޗުއްޓީއަށް ދާތީ، އެންމެ އެކަށީގެންވާގޮތުގައި ޓީމްތަކަށް ފަރިތަކުރުންތަށްވެސް ކުރިން ނުގެންދެވޭނެކަމަށް އޮފީސް އަދި ކުންފުނިތަކުންވެސް ބުނެފައިވާކަމަށް ނެޓްބޯޅަ އެސޯސިއޭޝަންއިން މަޢުލޫމާތުދިނެވެ. ކުރިން މަމަހުގެ 19 ދުވަހު ފެށުމަށް ހަމަޖެހިފައިވާ މިމުބާރާތުގެ މުއްދަތު އިތުރު ކުރުމުމާ ގުޅިގެން މިހާރު މުބާރާތް ފެށުމަށް ހަމަޖެހިފައިވަނީ މިއަންނަ މަހުގެ 11ވަނަ ދުވަހުކަމަށްވެސް ނެޓްބޯޅަ އެސޯސިއޭޝަންއިން މަޢުލުމާތުދިނެވެ. މިމުބާރާތުގައި މިހާތަނަށް 10 އޮފީހަކުން ބައިވެރިވެފައިވެއެވެ. މިއޮފީސްތަކަކީ ފެނަކަ، މީރާ، ޝީޝާ، އެންވަޔަރމަންޓް މިނިސްޓްރީ، ކަސްޓަމްސް، ފިޝަރީޒް މިނިސްޓްރީ، އެޗްޑީސީ، ޕީޖީއޯ، އެމްއެންޑީއެފް އަދި އެޓާނީ ޖެނެރަލް އޮފީސްއެވެ.